ଓଡ଼ିଆ ବାର୍ତ୍ତା/ କଳାହାଣ୍ଡି (ଲିଙ୍ଗରାଜ ମିଶ୍ର): କଳାହାଣ୍ଡି କଂଗ୍ରେସର ନୂତନ ସଭାପତି ନିର୍ବାଚନ ପରେ ସାରା ଜିଲ୍ଲାର ବିଭିନ୍ନ ବ୍ଲକରେ ସମସ୍ତ ଗ୍ରାମ ପଞ୍ଚାୟତ ସ୍ତରୀୟ ପୁରୁଣା ଓ ନୂଆ କର୍ମୀ ମାନଙ୍କୁ ନେଇ ଅନୁଷ୍ଠିତ ହେଉଛି ସାଂଗଠାନିକ ବୈଠକ। ଆଗରୁ କୋଣ ଠେସା ହୋଇ ମନ ମାରି, ଦଳୀୟ କାର୍ଯ୍ୟକ୍ରମରୁ ଦୂରେଇ ଯାଇ ପଡି ରହିଥିବା କର୍ମୀ ମାନଙ୍କୁ ଦଳ ଏବେ ଖୋଜି ବାହାର କରି ପୁଣି ସେମାନଙ୍କୁ ସଙ୍ଗଠନ ର ମୁଖ୍ୟ ସ୍ରୋତରେ ସାମିଲ କରୁଛି। ମାନ ଅଭିମାନ ଭୁଲି ସଂଗଠନ ପାଇଁ ତ୍ୟାଗପୁତ ଓ ନିଷ୍ଠାପର ମନୋଭାବ ନେଇ କାମ କରି ପୁଣି ଦଳକୁ ଓ ଦଳୀୟ ନେତାଙ୍କ ହାତ ମୁଠାକୁ ମଜବୁତ କରିବା ପାଇଁ ଆହ୍ବାନ ଦିଆଯାଉଛି। ଏହି କ୍ରମରେ ମଙ୍ଗଳାବର ନବ ନିର୍ବାଚିତ ଜିଲ୍ଲା ସଭାପତି ଜଳନ୍ଧର ନାଏକଙ୍କ ନେତୃତ୍ୱରେ ବାଲିପଡା ବଜାର ପ୍ରାଙ୍ଗଣରେ ଏକ ସାଂଗଠାନିକ ବୈଠକ ଅନୁଷ୍ଠିତ ହୋଇଯାଇଛି। ଏଥିରେ ପୂର୍ବତନ ଜିଲ୍ଲା ସଭାପତି ଭାରତ ବେମାଲ, ଭବାନୀପାଟଣା ବ୍ଲକ ସଭାପତି ସୁବାସ ପଧାନ, ପିସିସି ଶୃଙ୍ଖଳା କମିଟି ସଦସ୍ୟ ସୁରଥ ମହାଖୁଡ ପ୍ରମୁଖ ଯୋଗଦାନ କରି କର୍ମୀ ମାନଙ୍କୁ ଉଦବୋଧନ ଦେଇ ଉତ୍ସାହିତ କରିବା ସହ ବର୍ତ୍ତମାନର ଡବଲ ଇଞ୍ଜିନ ସରକାରରେ ନାରୀ ଅସୁରକ୍ଷିତ, ନିତ୍ଯ ବ୍ୟବହାର୍ଯ୍ୟ ଦ୍ରବ୍ୟର ଆକାଶ ଛୁଆଁ ଦରବୃଦ୍ଧିକୁ ନେଇ ସମାଲୋଚନା କରିବା ସହ ବିଜେପି ସରକାର ଉପରେ ଖୁବ ବର୍ଷିଥିଲେ। କର୍ମୀ ମାନଙ୍କୁ ନେଇ ସଙ୍ଗଠନ ଅଭିବୃଦ୍ଧି ର ବିଭିନ୍ନ ଦିଗ ଉପରେ ଆଲୋଚନା କରିଥିଲେ ନେତୃବୃନ୍ଦ। ଏହାପରେ ଦଳର ଆଗାମୀ କାର୍ଯ୍ୟପନ୍ଥା ଉପରେ ମଧ୍ୟ ବୈଠକରେ ପୁଙ୍ଖାନୁପୁଙ୍ଖ ଆଲୋଚନା ହୋଇଥିଲା। କର୍ମୀମାନେ ମଧ୍ୟ ନୂତନ ସଙ୍ଗଠନରେ ସେମାନଙ୍କ ଗୁରୁତ୍ଵ ଓ ଭୂମିକାକୁ ନେଇ ଖୁବ ଉତ୍ସାହିତ ହୋଇଥିବା ପରିଲକ୍ଷିତ ହୋଇଥିଲା। ଏହି ସାଂଗଠାନିକ କାର୍ଯ୍ୟକ୍ରମର ନର୍ଲା ବ୍ଲକ ଅଞ୍ଚଳର ୨୬ ଗୋଟି ଗ୍ରାମ ପଞ୍ଚାୟତର ୧୦୦ ରୁ ଉର୍ଦ୍ଧ୍ବ କର୍ମୀ ଯୋଗଦାନ କରି ଆଲୋଚନାରେ ସକ୍ରୀୟ ଅଂଶ ଗ୍ରହଣ କରିଥିଲେ। ସଙ୍ଗଠନ ସୁଦୃଢ଼ ପାଇଁ ଦଳୀୟ କର୍ମୀ ମାନଙ୍କର ମତାମତ ନିଆଯାଇଥିଲା। କାର୍ଯ୍ୟକ୍ରମ ଶେଷରେ ସଭାପତି ଶ୍ରୀ ନାଏକ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ।
