ଓଡିଶା ପତ୍ରକାର ସଂଘର ୧୧ତମ ବାର୍ଷିକ ଉତ୍ସବ
ରାୟଗଡ (ଶିବ ନାରାୟଣ ଗୈାଡ): ଗଣତନ୍ତ୍ରର ଚତୁର୍ଥ ସ୍ତମ୍ଭ ଭାବେ ସମାଜର ତୃଣମୂଳସ୍ତର ଲୋକଙ୍କ ସମସ୍ୟା ଠାରୁ ଆରମ୍ଭ କରି ଦୁର୍ନିତୀ ଗ୍ରସ୍ତ ଅଧିକାରୀଙ୍କ ମୁଖ୍ୟ ଖୋଲିବାରେ ସାମ୍ବାଦିକଙ୍କ ଭୂମିକା ଗୁରୁତ୍ୱପୂ୍ର୍ଣ୍ଣ । ତେଣୁ ସାମ୍ବାଦିକମାନେ ନିର୍ଭିକ ଓ କର୍ତବ୍ୟନିଷ୍ଠା ଭାବେ ସମାଜର କଲ୍ୟାଣ ପାଇଁ କାର୍ଯ୍ୟ କରିବା ଆବଶ୍ୟକ ବୋଲି ଓଡିଶାର ପୂର୍ବତନ ଉପବାଚସ୍ପତି ତଥା ରାଜ୍ୟ କୃଷି ବିପଶନ ପରିଷଦର ଉପଦେଷ୍ଠା ରାମଚନ୍ଦ୍ର ପଣ୍ଡା ମତବ୍ୟକ୍ତ କରିଛନ୍ତି ।
ରବିବାର ରାୟଗଡ ଜିଲ୍ଳା ସଦର ମହକୁମା ସ୍ଥିତ ଲାୟନ୍ସ କ୍ଳବ ସମ୍ମିଳନୀ କକ୍ଷରେ ଓଡିଶା ପତ୍ରକାର ସଂଘର ୧୧ତମ ବାର୍ଷିକ ଉତ୍ସବରେ ମୁଖ୍ୟ ଅତିଥି ଭାବେ ଯୋଗ ଦେଇ ଶ୍ରୀ ପଣ୍ଡା ଆହୁରି ମଧ୍ୟ କହିଥିଲେ ଯେ,ସାମ୍ବାଦିକମାନେ ନିଷ୍ଠା ଓ କର୍ତବ୍ୟର ସହକାର୍ଯ୍ୟରେ ସମାଜର ଅବହେଳିତ ଲୋକଙ୍କ କଥା ଲୋକ ଲୋଚନକୁ ଆସିପାରିବ,ସାମ୍ବାଦିକ ଏଥିପ୍ରତି ସଜାଗ ହୋଇ କାର୍ଯ୍ୟ କରିବା ଉଚିତ । ଅନ୍ୟରାଜ୍ୟ ଅପେକ୍ଷା ଓଡିଶାର ସାମ୍ବାଦିକ ଅବହେଳିତ ଭାବେ ଅଛନ୍ତି । ମାନ୍ୟବର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସାମ୍ବାଦିକଙ୍କ କଲ୍ୟାଣ ପାଇଁ ଗୁରୁତ୍ୱ ଦେଇଛନ୍ତି । ସ୍ୱାସ୍ଥ୍ୟବୀମା ଠାରୁ ଆରମ୍ଭ କରି କଲ୍ୟାଣ ପାଣ୍ଠି ଗଠନ କରିଛନ୍ତି । କୋଭିଡ ଯୋଦ୍ଧାଙ୍କୁ ଉପଯୁକ୍ତ ସମ୍ମାନ ମଧ୍ୟ ଦେଇଛନ୍ତି । ତେବେ ପତ୍ରକାର ସଂଘ ସାମ୍ବାଦିକଙ୍କୁ ସଂଗଠିତ କରି ଯେଭଳି କାର୍ଯ୍ୟ କରୁଛି ତାହା ସ୍ୱାଗତ ଯୋଗ୍ୟ ପଦକ୍ଷେପ ବୋଲି ଶ୍ରୀ ପଣ୍ଡା କହିଥିଲେ ।
କାର୍ଯ୍ୟକ୍ରମରେ ମୁଖ୍ୟବକ୍ତା ଭାବେ ରାୟଗଡ ଜିଲ୍ଳା ସୂଚନା ଓ ଲୋକ ସଂପର୍କ ଅଧିକାରୀ ବସନ୍ତ କୁମାର ପ୍ରଧାନ ଯୋଗ ଦେଇ ସାମ୍ବାଦିକମାନେ ସମାଜ କଲ୍ୟାଣ ପାଇଁ କାର୍ଯ୍ୟ କରିବା ଉଚିତ ବୋଲି ମତ ବ୍ୟକ୍ତ କରିଥିଲେ । ସଂଘର ପ୍ରତିଷ୍ଠାତା ସଭାପତି ସୁରେନ୍ଦ୍ର ସାହୁଙ୍କ ଅଧ୍ୟକ୍ଷତାରେ ଆୟୋଜିତ ସଭାରେ ସଂଘର ରାଜ୍ୟ ସାଧାରଣ ସଂପାଦକ ରାମଦାସ ଲିମା ସଂପାଦକୀୟ ବିବରଣୀ ପାଠ କରିଥିଲେ । ସେହିପରି ସଂଘର ସଭାପତି ଅବିନାଶ ମିଶ୍ର ଅତିଥିଙ୍କ ପରିଚୟ ଓ ସ୍ୱାଗତ ଭାଷଣ ପ୍ରଦାନ କରିଥିଲେ ।
ସଭାକାର୍ଯ୍ୟ ପୂର୍ବରୁ ଦିବଙ୍ଗତ ସାମ୍ବାଦିକ ଓ କୋଭିଡ ଯୋଦ୍ଧାଙ୍କ ଉଦ୍ଦେଶ୍ୟରେ ୨ମିନିଟ୍ ନୀରବ ପ୍ରାର୍ଥନା କରାଯାଇଥିବା ବେଳେ ଏଥିସହ କୋଭିଡ ଯୋଦ୍ଧା ସମ୍ମାନରେ ଡାକ୍ତର, ସେବିକା, ପୋଲିସ, ଅଙ୍ଗନୱାଡି ଓ ଆଶା କର୍ମୀ, ସୁଇପର ଏବଂ ସାମ୍ବାଦିକଙ୍କୁ ସମ୍ବର୍ଦ୍ଧିତ କରାଯାଇଥିଲା । ମୁଖ୍ୟ ଅତିଥିଙ୍କ ଦ୍ୱାରା ସଂଘର ମୁଖପତ୍ର ପତ୍ରକାର-୨୦୨୦କୁ ଉନ୍ମୋଚନ କରାଯାଇଥିଲା । ଆୟୋଜିତ କାର୍ଯ୍ୟକ୍ରମ କୋଭିଡ-୧୯ଗାଇଡଲାଇନ ପ୍ରକାରେ ଅନୁଷ୍ଠିତ ହୋଇଥିବା ବେଳେ ସଂଘର ସବୁ ଜିଲ୍ଳାର ପ୍ରତିନିଧିମାନେ କାର୍ଯ୍ୟକ୍ରମରେ ଉପସ୍ଥିତ ରହିଥିଲେ । କାର୍ଯ୍ୟକ୍ରମ ଶେଷରେ ସଂଘର ଉପସଭାପତି ସୁରେଣ ଧନ୍ୟବାଦ ଅର୍ପଣ କରିଥିଲେ ।
