ରାୟଗଡ, (ଶିବ ନାରାୟଣ ଗୈାଡ): ମହାମାରୀ କରୋନାର ଦ୍ୱିତୀୟ ଲହରରେ ସାରା ଦେଶରେ ଏବେ ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଉଥିବା ବେଳେ ଓଡିଶାରେ ମଧ୍ୟ ସ୍ଥିତି ଦିନକୁ ଦିନ ବିଗିିଡିବାରେ ଲାଗିଛି । ଏହାକୁ ଦୃଷ୍ଟିରେ ରଖି ପୂର୍ବତଟ ରେଳବାଇ ତରଫରୁ ରେଳଯାତ୍ରୀମାନଙ୍କୁ କୋଭିଡ-୧୯ ଗାଇଡଲାଇନକୁ କଡାକଡି ଭାବେ ପାଳନ କରିବା ପାଇଁ ନିର୍ଦ୍ଦେଶ ଜାରି କରାଯାଇଛି ।
ଏହି ପରିପ୍ରେକ୍ଷୀରେ ୱାଲଟିୟର ଡିଭିଜନ ଅଧିନସ୍ଥ ରାୟଗଡ ରେଳବାଇ ଷ୍ଟେସନରେ ଆଜି ରେଳବାଇ ପୋଲିସ ସୁରକ୍ଷା ବଳ (ଆରପିଏଫ) ଓ ସରକାରୀ ରେଳବାଇ ପୋଲିସ (ଜିଆରପି)ର ମିଳିତରେ ମାସ୍କ ପିନ୍ଧିବା,ସାମାଜିକ ଦୂରତା ବଜାୟ ରଖିବା ଓ ହାତକୁ ନିୟମିତ ଭାବେ ସାବୁନରେ ଧୋଇବା ଓ ସାନିଟାଇଜର ବ୍ୟବହାର କରିବା ନେଇ ରେଳଯାତ୍ରୀଙ୍କ ମଧ୍ୟରେ ଏକ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ।
ଆଜି ଷ୍ଟେସନ ପ୍ଳାଟଫର୍ମ ନମ୍ବର -୧ରେ ଆରପିଏଫ ଥାନା ଅଧିକାରୀ ପଙ୍କଜ କୁମାର ଓ ଜିଆରପିଏସ ଥାନା ଅଧିକାରୀ ସନ୍ତୋଷ ମିର୍ଦ୍ଧାଙ୍କ ନେତୃତ୍ୱରେ ଅନ୍ୟ ପୋଲିସ ଅଧିକାରୀ ଓ କନେଷ୍ଟବଳମାନେ ବ୍ୟାନର ମାଧ୍ୟମରେ ‘ମାସ୍କ ପିନ୍ଧନ୍ତୁ-ଜୀବନ ବଂଚାନ୍ତୁ’ ବୋଲି ସମ୍ବଲପୁର-ରାୟଗଡ ଓ ବିଶାଖାପାଟଣମ-ହଜରତ ନିଜାମୁଦ୍ଦିନ୍ କୋଭିଡ ସ୍ପେଶାଲ ଏକ୍ସପ୍ରେସରୁ ଓହ୍ଳାଇଥିବା ଏବଂ ଉଭୟ ଟ୍ରେନରେ ଯାତ୍ରା କରିବାକୁ ଯାଉଥିବା ରେଳଯାତ୍ରୀମାନଙ୍କୁ କୋଭିଡ-୧୯ ନିର୍ଦ୍ଦେଶାବଳୀକୁ ପାଳନ କରିବା ପାଇଁ ସଚେତନ କରିଥିଲେ । ସେହିପରି ଜିଲ୍ଳା ପ୍ରଶାସନ ପକ୍ଷରୁ ରେଳ ଷ୍ଟେସନରେ ଯାତ୍ରୀମାନଙ୍କୁ ପ୍ରଥମେ ସାମାଜିକ ଦୂରତାରେ ଧାଡି କରାଯାଇ ସ୍କ୍ରିନିଂ କରାଯିବା ସହ ହାତକୁ ସାନିଟାଇଜର କରାଯାଇ ଫେରୁଥିବା ଯାତ୍ରୀଙ୍କ ପଂଜୀକରଣ କରାଯାଉଛି ।
