ଗୁଣୁପୁର/ରାମନାଗୁଡା: ରବିବାର ଦିନ ବିଜେପି ଜିଲ୍ଲା ସମ୍ପାଦକ ରବିଶଙ୍କର ଗମାଙ୍ଗଙ୍କ ନେତୃତ୍ୱରେ ଏକ ଦଶ ଜଣିଆ ଟିମ ଗୁଣପୁର ନିର୍ବାଚନ ମଣ୍ଡଳୀ ଅନ୍ତର୍ଗତ ପଦ୍ମପୁର ଓ ରାମନାଗୁଡା ବ୍ଲକର ବିଭିନ୍ନ ଅଞ୍ଚଳ ପରିଦର୍ଶନ କରିଥିଲେ। ଏହି ସମୟରେ ମୂଖ୍ୟତଃ ପଦ୍ମପୁର ବ୍ଲକର ବିଭିନ୍ନ ସ୍ଥାନରେ କିଭଳି ଚାଷୀ ମାନେ ଧାନ ଅମଳ ପରେ ମଣ୍ଡି ଅବ୍ୟବସ୍ଥା ଯୋଗୁଁ ଧାନ ବିକ୍ରି କରିନପାରି ରାଜରାସ୍ତାରେ ଧାନକୁ ଜଗିରହିଛନ୍ତି ଓ କିଛି ଅଞ୍ଚଳରେ ଆନ୍ଧ୍ର ଦଲାଲ ସରକାରୀ ନିର୍ଦ୍ଧାରିତ ଦର ଠାରୁ ବହୁ କମରେ ଚାଷୀ ଧାନ ବିକ୍ରି କରିବାର ଅଭିଯୋଗ ଶୁଣିଥିଲେ। ଏହା ସହ ଖୁବଶୀଘ୍ର ସ୍ଥାନୀୟ ପ୍ରଶାସନକୁ ଏ ବାବଦରେ ଜଣେଇ ସମାଧାନ କରିବାର ପ୍ରତିଶୃତି ଦେଇଥିଲେ।ସେହିଭଳି ଗତ କିଛିଦିନ ତଳେ ଏକ ଖବର କାଗଜରେ ପ୍ରକାଶିତ ଗୁଣପୁର ବିଧାୟକଙ୍କ ୨ବର୍ଷର ରିପୋର୍ଟ କାର୍ଡରେ ଉଲ୍ଲେଖ ଥିବା ବଂଶଧାରା ନଦୀର ନାଇରା ଲିମାପଦର ଆଦି ଠାରେ ଆଡ଼ି ବନ୍ଧ ନିର୍ମାଣ କାର୍ଯ୍ୟ ଶେଷର ବାସ୍ତବତା ପରଖିବା ପାଇଁ ଯାଇଥିଲେ। ହେଲେ ଚିତ୍ର ସମ୍ପୁର୍ଣ୍ଣ ଅଲଗା ଦେଖିବାକୁ ପାଇଥିଲେ। ବିଧାୟକ ନିଜର ଆତ୍ମ ପ୍ରଚାର କରିବାକୁ ଯାଇ ଏ ଅଞ୍ଚଳ ବାସୀଙ୍କ ଜୀବନ ଜୀବିକା ସହ ଅପମାନ କରିଥିବା ଓ ଏହାକୁ ନେଇ ଆଗାମୀ ଦିନ ଜିଲ୍ଲା ଭାଜପା ରାଜରାସ୍ତାକୁ ଓହ୍ଲାଇବା ପାଇଁ ମତ ରଖିଥିଲେ। ଅନ୍ୟମାନଙ୍କ ମଧ୍ୟରେ ଏହି ଟିମରେ ଜିଲ୍ଲା ଭାଜପା କୃଷକ ମୋର୍ଚ୍ଚା କାର୍ଯ୍ୟକାରିଣୀ ସଦସ୍ୟ ଦେବରାଜ ଗମାଙ୍ଗ, କୃଷକ ମୋର୍ଚ୍ଚା ସମ୍ପାଦକ ଡମ୍ବୁରୁ ଗମାଙ୍ଗ,ପଦ୍ମପୁର ମଣ୍ଡଳ ଉପସଭାପତି ସଇନ ଶବର ଓ ଯୁବ ସଂଗଠକ ପ୍ରଦୀପ ଗମାଙ୍ଗ ପ୍ରମୁଖ ଉପସ୍ଥିତ ଥିଲେ।