● ଅନେକ ଶିଶୁ ପୁଷ୍ଟି ହୀନତାର ଶିକାର
କଳାହାଣ୍ଡି, (ରବିନ୍ଦ୍ର ମିଶ୍ର): ଥୁଆମୂଳ ରାମପୁର ବ୍ଲକ କାଣିଗୁମା ଗ୍ରାମ ପଞ୍ଚାୟତର ନେହେଲା ଗାଁରେ ଗତ ୨୦ ଦିନ ମଧ୍ୟରେ ୪ଜଣଙ୍କ ଅସ୍ବାଭାବିକ ମୃତ୍ୟୁ ହୋଇଛି। ଏହାସହ ୧୦ ଜଣ ଅସୁସ୍ଥ ହୋଇ ଚିକିତ୍ସିତ ହେଉଛନ୍ତି। ଗାଁର ଅନେକ ମହିଳା ଓ ଶିଶୁଙ୍କ ଠାରେ ଅପପୁଷ୍ଟି ଓ ରକ୍ତହୀନତା ଦେଖାଦେଇଛି। ଯାହାକୁ ନେଇ ଅଞ୍ଚଳରେ ଭୟର ବାତାବରଣ ଖେଳିଯାଇଛି। ପ୍ରାପ୍ତ ସୂଚନା ଆଧାରରେ, ପ୍ରଥମେ ଜ୍ବରରେ ଆକ୍ରାନ୍ତ ହୋଇ ଗତ ସେପ୍ଟେମ୍ବର ୮ ତାରିଖ ଦିନ ଏହି ଗାଁର ଧନୁର୍ଜୟ ମାଝୀଙ୍କ ୧୬ ବର୍ଷୀୟ ପୁଅ ଅମର ସିଂର ମୃତ୍ୟୁ ହୋଇଥିଲା। ପରବର୍ତ୍ତୀ ୧୫ ତାରିଖ ଦିନ ୬୦ ବର୍ଷୀୟା ଲାଖିଆ ପରାଭୋଇ, ୧୯ ତାରିଖ ଦିନ ୨୦ ବର୍ଷୀୟା ସୁଶାନ୍ତୀ ନାଏକ ଏବଂ ୨୭ ତାରିଖ ଦିନ ୧୮ ବର୍ଷୀୟା ସୁମନୀ ମାଝୀଙ୍କ ଅକାଳ ବିୟୋଗ ହୋଇଥିଲା। ସମସ୍ତ ମୃତକ ଜ୍ବରରେ ପିଡିତ ଥିବା ପରିବାର ଲୋକ ସୂଚନା ଦେଇଛନ୍ତି। ଏପରିକି ପ୍ରାୟ ୧୦ ଜଣ ଏବେ ମଧ୍ୟ ଜ୍ବରରେ ଆକ୍ରାନ୍ତ ଥିବା ଜଣାପଡିଛି। ସେମାନଙ୍କ ମଧ୍ୟରୁ ଲକ୍ଷ୍ମଣ ମାଝୀଙ୍କ ୨ ବର୍ଷୀୟା ଏକ ଶିଶୁ କନ୍ୟା ଅମ୍ରୀତାର ଅବସ୍ଥା ଅତ୍ୟନ୍ତ ଶୋଚନୀୟ ହୋଇପଡିଛି।
ଅନ୍ୟ ପଟେ ୩୦ ବର୍ଷୀୟ ଡମେନ ମାଝୀ, ୬୦ ବର୍ଷୀୟା ନୂଆଦେଇ ମାଝୀ, ଚମ୍ପା ବେଓ୍ବା, ମହେନ୍ଦ୍ର ମାଝୀ ଓ ଗଙ୍ଗାଧର ମାଝୀ ପ୍ରମୁଖ ଜ୍ବରରେ ଆକ୍ରାନ୍ତ ହେଇଛନ୍ତି। ଏନେଇ ଏକ ଡାକ୍ତରୀ ଦଳ ଗୁରୁବାର ଦିନ ନେହେଲା ଗାଁରେ ପହଞ୍ଚି ୩୫ ପିଡୀତଙ୍କ ରକ୍ତ ପରୀକ୍ଷା କରିଥିଲେ କିନ୍ତୁ ସେମାନଙ୍କ ମଧ୍ୟରୁ ମାତ୍ର ୪ ଜଣଙ୍କ ମ୍ୟାଲେରିଆରେ ଆକ୍ରାନ୍ତ ହେଇଥିବା ଜଣାପଡିଥିଲା। ଶୁକ୍ରବାର ଦିନ ଥୁଆମୂଳ ରାମପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରର ଜନ ସ୍ବାସ୍ଥ୍ୟ ସଂପ୍ରସାରଣ ଅଧିକାରୀ ମମତା ସାହୁ, ଏମ୍.ଟି.ଏସ୍ ଅଜିତ କୁମାର ପଣ୍ଡାଙ୍କ ସମେତ ଜିଲ୍ଲା ମୁଖ୍ୟ ଚିକିତ୍ସାଳୟରୁ ଏଲ୍.ଟି. ବଂଶଧର ସିଂ ଓ ନବିନ ସାହୁ ପହଞ୍ଚି ଲୋକଙ୍କ ରକ୍ତ ନମୁନା ସଂଗ୍ରହ କରିଥିଲେ। ଏହାସହ ଥୁଆମୂଳ ରାମପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରୁ ଡ଼ା. ସମ୍ବିତ ବିଶ୍ବାଳଙ୍କ ନେତୃତ୍ୱରେ ଏକ ଡାକ୍ତରୀ ଦଳ ପହଞ୍ଚି ଲୋକଙ୍କ ସ୍ବାସ୍ଥ୍ୟବସ୍ଥା ବୁଝିଥିଲେ। ନେହେଲା ଗାଁର ଅନେକ ମହିଳା ଓ ଶିଶୁ ପୁଷ୍ଟିକର ଖାଦ୍ୟ ଅଭାବରୁ ରକ୍ତ ହିନତାର ଶିକାର ହୋଇଥିବା ଦେଖାଦେଇଛି।
ଅନ୍ୟ ପକ୍ଷରେ ୪ ଜଣଙ୍କ ମୃତ୍ୟୁର କାରଣ ଖୋଜାଯାଉଥିଲେ ମଧ୍ୟ କୌଣସି ସଠିକ ନିଷ୍ପତ୍ତିରେ ପହଞ୍ଚି ପାରୁନାହିଁ ସ୍ବାସ୍ଥ୍ୟ ବିଭାଗ। ଲୋକଙ୍କ ମଧ୍ୟରେ ଏବେ ମଧ୍ୟ ଅନ୍ଧ ବିଶ୍ବାସ ଲାଗିରହିଛି।ଲୋକେ ସ୍ବାସ୍ଥ୍ୟ ସେବା ବଦଳରେ ଗୁରୁ ଗୁଣିଆ ଉପରେ ବିଶ୍ବାସ କରୁଥିବା ଦେଖିବାକୁ ମିଳୁଛି। ଏହି ଜ୍ବର ଦେବୀଙ୍କ ପ୍ରଭାବରୁ ହେଉଛି।ଔଷଧ ଖାଇଲେ ଦେବୀ ରାଗିଯିବେ ଏଭଳି ମତ ଦେଉଥିବାରୁ ସାଧାରଣ ଲୋକଙ୍କୁ ବୁଝାଇବା ସମ୍ଭବ ହେଉନାହିଁ। ଶିକ୍ଷାର ଅଭାବ ଯୋଗୁଁ ସଚେତନତା ନଥିବା ଆଲୋଚନା ହେଉଛି। ଅନ୍ୟ ପଟେ ‘ସ୍ବାସ୍ଥ୍ୟ ସ୍ବରାଜ’ର କାର୍ଯ୍ୟ ଦକ୍ଷତା ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହେଉଛି। ଅନ୍ୟ ପଟେ ଏହି ସଂସ୍ଥାରେ କାର୍ଯ୍ୟ କରୁଥିବା କର୍ମଚାରୀ ଅଣ ଓଡ଼ିଆ। ତେଣୁ ସାଧାରଣ ଲୋକଙ୍କ କଥା ବୁଝିପାରୁନଥିବାରୁ ଏଭଳି ସମସ୍ୟା ସୃଷ୍ଟି ଦେଖାଦେଇଥିବା ସାଧାରଣରେ ଆଲୋଚନା ହେଉଛି।
ପାନୀୟ ଜଳ ପାଇଁ ନଳକୂପ ଥିଲେ ମଧ୍ୟ ବହୁଲୋକ ନିକଟସ୍ଥ ନାଳର ପାଣି ସ୍ନାନ ଶୌଚାଦି ପାଇଁ ବ୍ୟବହାର କରୁଛନ୍ତି। ଏହି ଗାଁରେ ଅଙ୍ଗନବାଡି କେନ୍ଦ୍ର ଥିଲେ ମଧ୍ୟ ପ୍ରାୟ ୧୦ କିମି ଦୂରରେ ସହାୟିକା ରହୁଥିବାରୁ ଏହି କେନ୍ଦ୍ରର ଶିଶୁ ଓ ମହିଳାଙ୍କୁ ସଠିକ ସମୟରେ ପୁଷ୍ଟିକର ଖାଦ୍ୟ ପାଇବାରୁ ବଞ୍ଚିତ ହେଉଛନ୍ତି। ତେଣୁ ତୁରନ୍ତ ଏଥିପ୍ରତି ସ୍ବାସ୍ଥ୍ୟ ବିଭାଗ ଗୁରୁତ୍ୱ ନଦେଲେ ମଣିଷ ମଡକର ଆଶଙ୍କା ରହିଛି। ଏନେଇ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ଅଧିକାରୀ ଡା. ନିତିଶ ଝା ନିଜ ପ୍ରତିକ୍ରିୟାରେ କହିଛନ୍ତି ଯେ, ଲୋକଙ୍କୁ ବୁଝାଇବା ପାଇଁ ଡାକ୍ତରୀ ଦଳ ପ୍ରୟାସ କରୁଛନ୍ତି। ପ୍ରଥମେ ମ୍ୟାଲେରିଆ ସମେତ କୋଭିଡ୍ ପରୀକ୍ଷା କରାଯାଇଥିଲା। କିନ୍ତୁ ଅନକଙ୍କ ସେଭଳି ଲକ୍ଷଣ ନଥିବା ଜଣାପଡିବା ପରେ ଏବେ ଡେଙ୍ଗୁ ପରୀକ୍ଷା କରାଯାଉଛି ବୋଲି ସୂଚନା ଦେଇଥିଲେ। ଏହାସହ ମହିଳା ମାନେ ପ୍ରାୟତଃ ରକ୍ତ ହିନତା ଥିବା ଜଣାପଡିଛି ବୋଲି ଡା. ଝା ମତବ୍ୟକ୍ତ କରିଛନ୍ତି।
