ନୂଆପଡା,୨୭/୫ : ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଏକ ଜନହିତକର ଯୋଜନା “ବିଜୁ ଏକ୍ସପ୍ରେସ ୱେ” ରାଜ୍ୟର ସହରଠୁ ଗାଁ ଗାଁରେ ପହଞ୍ଚି ପାରିଛି । ତେବେ ନୂଆପଡା ଜିଲ୍ଲାରେ ଏହି ରାସ୍ତାକାମ କିପରି ଚାଲିଛି ସେଥିପ୍ରତି ବୋଧେ କାହାର ନିଘାନାହିଁ । ଅଭିଯୋଗ ଉପରେ ଅଭିଯୋଗ ହେଉଛି ବିଜୁ ଏକ୍ସପ୍ରେସ ୱେର ନିର୍ମାଣ ବ୍ୟାପକ ଅନିୟମିତତା ହେଉଛି । ମନଇଚ୍ଛା କାମକରୁଛନ୍ତି ଠିକାଦାର ।
● ବେଧଡକ ଚାଲିଛି ଠିକାଦାରଙ୍କ ମନମୁଖୀ କାମ
ବିଜୁ ଏକ୍ସପ୍ରେସ ୱେ ରାଜ୍ୟର ବିଭିନ୍ନ ଦୁର୍ଗମ ଅଞ୍ଚଳ ଦେଇ ଯାଇଥିବା ବେଳେ ନୂଆପଡା ଜିଲ୍ଲାର ଅଧିକାଂଶ ଗାଁ ଓ ସହର ଦେଇ ଯାଇଛି । ଘାଟିପଡା ଠାରୁ ଆରମ୍ଭ ହୋଇ ସିନାପାଲି ପର୍ଯ୍ୟନ୍ତ ଏହି ରାସ୍ତା ନୂଆପଡା ଜିଲ୍ଲା ରେ ପ୍ରସାରିତ ହୋଇଅଛି । ଏହି ରାସ୍ତା କୁ ୫ଟି ଭାଗ ରେ ବିଭକ୍ତ କରାଯାଇ ବିଭିନ୍ନ ଠିକାଦାର ମାନଙ୍କୁ ଟେଣ୍ଡର ଜରିଆରେ କାମ ଦିଆ ହୋଇଛି । ସଦର ଠାରୁ ୬ କି.ମି ଦୂର ଘାଟିପଡା ଠାରୁ ଠୋଙ୍ଗୋ ପର୍ଯ୍ୟନ୍ତ ରାସ୍ତା କାମ ଏ.ଭି.ଆର. କନ୍ସଷ୍ଟ୍ରକସନ ନାମକ ଏକ କମ୍ପାନୀ କରୁଛି ତେବେ ଏହି ରାସ୍ତା ନିର୍ମାଣ କାମ ଚାଲିଥିବା ବେଳେ ପଥିକଙ୍କ ସୁରକ୍ଷା ପ୍ରତି ଧ୍ୟାନ ଦିଆଯାଉନଥିବା ଅଭିଯୋଗ ହେଉଛି ।
● ଦିଗ ଫଳକ ଓ ସାବଧାନ ସୁରକ୍ଷା ଫଳକ ନାହିଁ
ନିର୍ମାଣଧିନ ରାସ୍ତାର ଅନେକ ସ୍ଥାନରେ ଖାଳ ରହିଯାଇଛି ଯାହା ଯେ କୌଣସି ସମୟରେ ଦୂର୍ଘଟଣାକୁ ଆମନ୍ତ୍ରଣ କରୁଛି । ରାସ୍ତାର ଅନେକ ସ୍ଥାନରେ ପୋଲ ପୋତା ହେଉଛି କିନ୍ତୁ ସାବଧାନ ସୁରକ୍ଷା ଫଳକ ଓ ଦିଗ ଫଳକ ନାହିଁ । ଏହି ପରିଧି ମଧ୍ୟରେ କେବଳ ୨ ରୁ ୩ଟା ସ୍ଥାନ କୁ ଛାଡିଦେଲେ ଫଳକର ନା’ ଗନ୍ଧ ନାହିଁ । ଏହି ରାସ୍ତାରେ ହଜାର ହଜାର ଯାନବାହାନ ଯିବା ଆସିବା କରେ, ହେଲେ ଦିନ ବେଳେ ଧୂଳି ବଳି ଖାଇ ଲୋକେ ବାଧ୍ୟ ହୋଇ ଯିବା ଆସିବା କରୁଛନ୍ତି କିନ୍ତୁ ରାତି ରେ ଏହି ରାସ୍ତା ଏକ ମୃତ୍ୟୁ ଶଯ୍ୟା ପାଲଟିଛି । ଏହି ରାସ୍ତା ରେ ବର୍ତମାନ ପର୍ଯ୍ୟନ୍ତ କୌଣସି ବଡ ଧରଣର ଦୁର୍ଘଟଣା ହୋଇନାହିଁ ସତ କିନ୍ତୁ ଛୋଟ ଛୋଟ ଦୂର୍ଘଟଣାର ହିସାବ ନାହିଁ । ତେବେ ବର୍ତ୍ତମାନ ଖାମଖିଆଲଭାବେ ନିର୍ମାଣ କାର୍ଯ୍ୟ ଚାଲିଥିବା ସହ ପଥିକ ମାନଙ୍କ ପାଇଁ କୌଣସି ସୂଚନା ବ୍ୟବସ୍ଥା ନଥିବାରୁ ଆଗାମୀ ଦିନରେ ଏହି ରାସ୍ତାରେ ବଡ଼ ଧରଣର ଦୁର୍ଘଟଣାକୁ ଆଡେଇ ହେବନାହିଁ ।
● ପ୍ରବଳ ଖରା ରେ କାମ କରୁଛନ୍ତି ଶ୍ରମିକ
ବର୍ତ୍ତମାନ ନୂଆପଡାରେ ପ୍ରବଳ ଗ୍ରୀଷ୍ମ ଲହରୀ ଅନୁଭୂତ ହେଉଛି । ତାପମାତ୍ରା ୪୦/୪୨ ଡିଗ୍ରୀ ରହୁଥିବାବେଳେ ପ୍ରଶାସନ ପକ୍ଷରୁ ଶ୍ରମିକ ମାନଙ୍କୁ ଖରାରେ କାମ ନକରିବାକୁ ସୂଚନା ଦିଆଯାଇଛି । ଏହି ନିୟମକୁ ଅନେକ ସରକାରୀ ବେସରକାରୀ ସଂସ୍ଥା ମାନିନେଇ ଶ୍ରମିକ ମାନଙ୍କ ସୁରକ୍ଷା ଉପରେ ଅଧିକ ଧ୍ୟାନ ଦେଉଛନ୍ତି । କିନ୍ତୁ ଏହି ରାସ୍ତା ନିର୍ମାଣକାରୀ ଠିକା ସଂସ୍ଥାରେ ଏହି ନିୟମ କାର୍ଯ୍ୟକାରୀ ହେଉନାହିଁ । ସମ୍ପୃକ୍ତ ଠିକାଦାରଙ୍କ ଅଧୀନରେ ଶ୍ରମିକମାନେ ବାଦ୍ଧ୍ୟହୋଇ ପ୍ରଚଣ୍ଡ ଖରାରେ ମଧ୍ୟ କାମ କରୁଥିବାର ଗାଁ ଲୋକ ଙ୍କ ନଜର ରେ ଆସିଛି ।
● ବିଭାଗୀୟ ଅଧିକାରୀ କହିଲେ ଠିକାଦାରଙ୍କୁ ଜଣାଇବି
ରାସ୍ତାନିର୍ମାଣରେ ହେଉଥିବା ବିଭିନ୍ନ ଅନିୟମିତତା ସଂପର୍କରେ ରାସ୍ତା ଓ କୋଠା ଅଧିକାରୀ ଖରିଆର ଶ୍ରୀ କିଶୋର ପଣ୍ଡାଙ୍କୁ ପଚାରିବାରୁ ସେ କହିଲେ ହଁ ଏହା ସତ କଥା ଓ ମୁଁ ଅତିଶୀଘ୍ର ଠିକାଦାରଙ୍କୁ ଜଣାଇ ଉଚିତ ସ୍ଥାନରେ ଦିଗ ଫଳକ ଓ ସାବଧାନ ସୁରକ୍ଷା ଫଳକ ଲଗାଇବାର ବନ୍ଦୋବସ୍ତ କରେଇ ଦେବି ।
● ଲୋକଙ୍କ ଭରଷାକୁ ଭଙ୍ଗା ନଯାଉ
ଆଖ ପାଖ ଗାଁ ତଥା ନୂଆପଡା ଅନେକ ଅଞ୍ଚଳ ବାସୀ ଙ୍କ ପାଇଁ ବିଜୁ ଏକ୍ସପ୍ରେସ ରାସ୍ତା ଦ୍ୱାରା ଅନେକ ସୁଫଳ, ସୁବିଧା ଓ ପରିସ୍ଥିତି ସୁଧିବାର ଅପେକ୍ଷା ରେ ଥିଲା ବେଳେ ବିଭିନ୍ନ ଠିକାଦାର ମାନଙ୍କ ର ମନମୁଖୀ କାମ ଦ୍ୱାରା ଜନସାଧାରଣ ଙ୍କ ସରକାର ଓ ଅଧିକାରୀ ଙ୍କ ଉପରେ ଧୀରେ ଧୀରେ ବିଶ୍ୱାସ ଉଠିବାରେ ଲାଗିଛି । ଜିଲ୍ଲା ପ୍ରଶାସନ ତୁରନ୍ତ ହସ୍ତକ୍ଷେପ କରି ଏଭଳି ସମସ୍ୟା ନ ହେଉ ଓ ଏହି ସମସ୍ୟା ର ତୁରନ୍ତ ସମାଧାନ ହେଉ ବୋଲି ବୁଦ୍ଧିଜୀବୀ ମହଲ ରେ ମତ ପ୍ରକାଶ ପାଇଛି ।
ନୂଆପଡା ଜିଲ୍ଲା ପ୍ରତିନିଧି ମହେନ୍ଦ୍ର କୁମାର ବାଗ (ରାହୁଲ) ଙ୍କ ରିପୋର୍ଟ odiabarta.in
ହ୍ଵାଟ୍ସଆପରେ ଲେଟେଷ୍ଟ ଖବର ଓ ବିଚାର ଅପଡେଟ୍ ପାଇବା ପାଇଁ ତଳେ କ୍ଲିକ୍ କରନ୍ତୁ👇
