ଓଡ଼ିଆ ବାର୍ତ୍ତା/ କଳାହାଣ୍ଡି (ନିଲେଶ କୁମାର ନାଗ): ସରକାରଙ୍କ ନିର୍ଦେଶ କ୍ରମେ କେହି ଅପାଠୁଆ ରହିବେ ନାହିଁ ବା କେହି ଅଧାରୁ ପାଠ ଛାଡିବେନାହିଁ। ସେଥିପାଇଁ ପ୍ରତ୍ୟେକ ଗାଁରେ ବିଦ୍ୟାଳୟ ନିର୍ମାଣ କରାଯାଇଛି ଓ ଛାତ୍ରଛାତ୍ରୀଙ୍କୁ ଆକୃଷ୍ଟ କରିବା ପାଇଁ ସରକାର ଅନେକ ପଦକ୍ଷେପ ଗ୍ରହଣ କରିଥିବା ବେଳେ ମାଗଣା ପୋଷାକ ଠାରୁ ଆରମ୍ଭ କରି ବହିପତ୍ର, ଖେଳ ଉପକରଣ ସମେତ ମଧ୍ୟାହ୍ନ ଭୋଜନର ବ୍ୟବସ୍ଥା ମଧ୍ୟ୍ୟ କରିଛନ୍ତି। କିନ୍ତୁ ଏତେ ସବୁ ସରକାରୀ ବ୍ୟବସ୍ଥା ଭିତରେ ମଧ୍ୟ୍ୟ ଲାଞ୍ଜିଗଡ଼ ବ୍ଳକ ପରାବାହାଲି ଗ୍ରାମର ୧୦ ରୁ ଉର୍ଦ୍ଧ୍ବ ଛାତ୍ରଛାତ୍ରୀ ପାଠ ପଢି଼ବାପାଇଁ ଇଚ୍ଛା ଥିଲେ ମଧ୍ୟ୍ୟ ଅଧପାଠୁଆ ହୋଇ ଗାଁରେ ରହୁଥିଲେ। ଏହାକୁ ନେଇଁ ‘ଓଡିଆ ବାର୍ତ୍ତା’ରେ ଖବର ପ୍ରସାରଣ ହୋଇଥିଲା। ପରେ ତତ୍ପରତା ଦେଖାଇଛି ବ୍ଲକ ପ୍ରଶାସନ। ବୁଧବାର ଲାଞ୍ଜିଗଡ ବ୍ଲକ ମଙ୍ଗଳସମ୍ପ୍ରସାରଣ ଅଧିକାରୀ ପଙ୍କଜ ବଳିଆର ସିଂ ଓ ଭଟାଙ୍ଗପଦର ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ସୁଶାନ୍ତ ମାଝୀ ପରାବାହାଲି ଗାଁକୁ ପହଞ୍ଚି ଛାତ୍ରଛାତ୍ରୀ ଓ ଅଭିଭାବକ ମାନଙ୍କ ସହିତ ଆଲୋଚନା କରିଛନ୍ତି। ଆଗାମୀ ଦିନରେ ସମସ୍ତ ଛାତ୍ରଛାତ୍ରୀଙ୍କୁ ଆବାସିକ ବିଦ୍ୟାଳୟରେ ରହିକି ପାଠ ପଢ଼ିବା ପାଇଁ ବ୍ୟବସ୍ଥା କରାଯିବ ବୋଲି ପ୍ରତିଶୃତି ଦେଇଛନ୍ତି। ସୂଚନାଯୋଗ୍ୟ କଳାହାଣ୍ଡି ଜିଲ୍ଲା ଲାଞ୍ଜିଗଡ ବ୍ଲକ ଭଟାଙ୍ଗପଦର ପଞ୍ଚାୟତ ଅନ୍ତର୍ଗତ ପରାବାହାଲି ଗାଁରେ ପାଠ ପଡିବା ପାଇଁ କୌଣସି ବ୍ୟବସ୍ଥା ନ ଥିବାରୁ ବନପାହାଡ଼ ଘେରା ଆବୁଡ଼ା ଖାବୁଡ଼ା ରାସ୍ତା ଦେଇ ୪କି.ମି ଆମପଦର ଗାଁ ପ୍ରାଥମିକ ବିଦ୍ୟାଳୟକୁ ଯାଇଥାନ୍ତି। କିନ୍ତୁ ସେହି ସ୍କୁଲରେ ପ୍ରଥମରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ରହିଥିବାରୁ ଛାତ୍ରଛାତ୍ରୀ ମାନେ ଉଚ୍ଚ ପ୍ରାଥମିକ ଶିକ୍ଷାରୁ ବଞ୍ଚିତ ରହୁଥିଲେ। କାହିଁକିନା ଆଖପାଖରେ ଉଚ୍ଚ ପ୍ରାଥମିକ ଶିକ୍ଷା ଲାଭକରିବା ପାଇଁ କୌଣସି ବ୍ୟବସ୍ଥା ନାହିଁ। ଫଳରେ ପାଠ ପଡ଼ିବାର ଇଚ୍ଛା ଶକ୍ତି ଥିଲେ ମଧ୍ୟ୍ୟ ଅନେକ ଶିଶୁ ଅଧପାଠୁଆ ହୋଇ ରହୁଥିଲେ। ଉକ୍ତ ଗାଁର ଛାତ୍ର ଛାତ୍ରୀ ମାନେ ଷଷ୍ଠ ଶ୍ରେଣୀରେ ନାମ ଲେଖାଇବା ପାଇଁ ଭଟାଙ୍ଗପଦର ଓ କାଉଗୁଡ଼ା ଆବାସିକ ବିଦ୍ୟାଳୟକୁ ଯାଇଥିଲେ ହେଲେ ସେହି ବିଦ୍ୟାଳୟରେ ନାମ ଲେଖା ସମ୍ପୂର୍ଣ୍ଣ ହୋଇସାରିଛି ଆଉ ଆମେ ନାମ ଲେଖି ପାରିବୁ ନାହିଁ ବୋଲି ସେଠାରେ ସଫାସଫା ମନା କରିଦେବାରୁ ଆମେ ସେଠାରୁ ଫେରି ଆସିଲୁ ବୋଲି ଅଭିଭାବକ ମାନେ ମତପ୍ରକାଶ କରୁଥିଲେ। ତେବେ ‘ଓଡିଆ ବାର୍ତ୍ତା ‘ରେ ଖବର ପ୍ରକାଶ ପରେ ବ୍ଲକ ପ୍ରଶାସନ ଗାଁକୁ ପହଁଚି ତଦନ୍ତ କରି ପିଲାଙ୍କୁ ଆବାସିକ ବିଦ୍ୟାଳୟରେ ରହିକି ପାଠ ପଢ଼ିବାର ବ୍ୟବସ୍ଥା କରାଯିବ ବୋଲି ପ୍ରତିଶୃତି ଦେଲା ପରେ ଛାତ୍ରଛାତ୍ରୀ ଓ ଅଭିଭାବକ ଖୁସିବ୍ୟକ୍ତ କରୁଛନ୍ତି।
