ଓଡ଼ିଆ ବାର୍ତ୍ତା/ ରାୟଗଡ଼ା (ଶିବ ନାରାୟଣ ଗୈାଡ): ଆଜି ଠାରୁ ଗଡିଲା ଭୋଟର ସଚେତନତା ରଥ । ରାୟଗଡ଼ ଉପଜିଲ୍ଲାପାଳଙ୍କ କାର୍ଯ୍ୟାଳୟ ପରିସରରେ ଏହି ରଥକୁ ଅତିରିକ୍ତ ଜିଲ୍ଲାପାଳ ଧର୍ମାନନ୍ଦ ବେହେରା ଓ ଉପଜଲ୍ଲାପାଳ ତଥା ନିର୍ବାଚନ ପଞ୍ଜିକରଣ ଅଧିକାରୀ ଭୀମସେନ ଶବର ସବୁଜ ପତାକା ଦେଖାଇ ଶୁଭାରମ୍ଭ କରିଥିଲେ । ନିର୍ବାଚନ ଡେପୁଟି କଲେକ୍ଟର ନାରାୟଣ ମିଶ୍ର , ରାୟଗଡ଼ ବିଡିଓ ଲକ୍ଷ୍ମି ନାରାୟଣ ସାବତ, ସହକାରୀ ଜିଲ୍ଲାପାଳ ପୁଷ୍ପାଞ୍ଜଳି ଚୌଧୁରୀ, ଜିଲ୍ଲା ପଞ୍ଚାୟତ ଅଧିକାରୀ ସୂର୍ଯ୍ୟ ନାରାୟଣ ମହାରଣା , ରାୟଗଡ଼ ଜିପିଇଓ ଗୋପାଳ ପଣ୍ଡା , ରାୟଗଡ଼ ପୌରପାଳିକାର ନିର୍ବାଚନ ସହାୟକ ଚନ୍ଦ୍ରଶେଖର ରଥ, ଶିକ୍ଷକ ନିଳାଞ୍ଚଳ ମିଶ୍ର ତଥା ଅନ୍ୟ କର୍ମକର୍ତ୍ତା ବୃନ୍ଦ ଉପସ୍ଥିତ ରହି ରଥର ଭବ୍ୟ ସ୍ଵାଗତ ଜଣାଇଥିଲେ । ଏହି ରଥ ପ୍ରଥମ ଦୁଇଦିନ ରାୟଗଡ଼ ପୌରପାଳିକାର ପ୍ରତି ସାହି ବୁଲି ଭୋଟର ନମ୍ବର ସହ ଆଧାର ସଂଯୋଗ ବାର୍ତ୍ତା ପ୍ରଚାର କରିବ । ପରେ ରାୟଗଡ଼ ଓ କାଶିପୁର ବ୍ଲକର ପୁରପଲ୍ଲୀରେ ବୁଲି ଆଧାର – ଭୋଟର ନମ୍ବର ସଂଯୋଗିକରଣ ନିମନ୍ତେ ଏହି ରଥ ପ୍ରଚାର କରିବାର କାର୍ଯ୍ୟକ୍ରମ ରହିଛି । ସହରାଞ୍ଚଳରେ ଆଧାର ସଂଯୋଜିକରଣ କମ୍ ହୋଇଥିବାରୁ ଏଭଳି ଅଭିନବ ପଦକ୍ଷେପ ନିଆଯାଇଥିବା ଉପଜିଲ୍ଲାପାଳ ଶ୍ରୀ ଶବର ପ୍ରକାଶ କରିଛନ୍ତି । ଅତିରିକ୍ତ ଜିଲ୍ଲାପାଳ ନିର୍ଭୁଲ ଭୋଟର ତାଲିକା ପ୍ରସ୍ତୁତି ନିମନ୍ତେ ଅଯୋଗ୍ୟ ବ୍ୟକ୍ତିଙ୍କୁ ବାଦ୍ ଦେବା ସହ ନୂତନ ଓ ଯୋଗ୍ୟ ଭୋଟରଙ୍କ ପଞ୍ଜିକରଣ ଓ ସଂଯୋଗି କରଣ ଆବଶ୍ୟକ ବୋଲି ପ୍ରକାଶ କରିଥିଲେ ।
ସମସ୍ତ ଭୋଟର ନିଜେ ନିଜ ଫୋନରେ ଭୋଟର ହେଲ୍ପ ଲାଇନ ମାଧ୍ୟମରେ ଭୋଟର ନମ୍ବର ସହ ଆଧାର ସଂଯୋଗୀ କରଣ କରିପାରିବେ। ଆବଶ୍ୟକ ସ୍ଥଳେ ବୁଥ ସ୍ତରୀୟ ଅଧିକାରୀଙ୍କ ମାଧ୍ୟମରେ ମଧ୍ୟ ଏହା ସହଜରେ ହୋଇପାରିବ । ଏଥି ନିମନ୍ତେ ସଚେତନତା ରଥ ବିଭିନ୍ନ ପୋଷ୍ଟର, ବ୍ୟାନର, ରଙ୍ଗୀନ ବେଲୁନ ରେ ସଜ୍ଜିତ ହୋଇଥିବା ସ୍ଥଳେ ଡ଼ାକବାଜି ଯନ୍ତ୍ର ସାହାଯ୍ୟରେ ସଚେତନତା ଆହ୍ଵାନ ପ୍ରଚାର କରିଥିଲା । ଜିଲ୍ଲାରେ ଭୋଟର ନମ୍ବର ସହ ଆଧାର ଲିଙ୍କ ହେବା ଫଳରେ ଆଉ ମିଥ୍ୟା ଓ ଦୋହରା ଭୋଟର ରହିବେ ନାହିଁ । ଏଣୁ, ସମସ୍ତ ଜନସାଧାରଣ, ପ୍ରେସ ଓ ଇଲେକ୍ଟ୍ରୋନିକ ମିଡିଆ ବନ୍ଧୁ ତଥା ବିଭାଗୀୟ ଅଧିକାରୀଙ୍କ ସହଯୋଗିତାର ଆବଶ୍ୟକ ରହିଛି ବୋଲି ଜିଲ୍ଲାପାଳ ସ୍ଵଧାଦେବ ସିଂ ଲୋଡିଛନ୍ତି ।
