ଓଡ଼ିଆ ବାର୍ତ୍ତା/ ବଲାଙ୍ଗିର (ମୁନା ଗୌଡ଼): କଣ୍ଟାବାଞ୍ଜି ରେଳୱେ ଷ୍ଟେସନରେ ବଡ଼ ଅଘଟଣ । ରେଳୱେର ଉନ୍ନତିକରଣ ଚାଲିଥିଲା ବେଳେ ଜେସିବି ଓ କାନ୍ଥ ତଳେ ଚାପି ହୋଇ ଜଣେ ଶ୍ରମିକଙ୍କ ମୃତ୍ୟୁ । ତେବେ ଆଉ ଜଣେ ଶ୍ରମିକ ଗୁରୁତର ଥିବା ଜଣାପଡ଼ିଛି । ସୂଚନା ଅନୁସାରେ, କଣ୍ଟାବାଞ୍ଜି ରେଳବାଇ ଷ୍ଟେସନ ଭିତରେ ଅମୃତ ଭାରତ ଯୋଜନାରେ ଉନ୍ନତିକରଣ ଚାଲିଛି । ଜିଆରପି ଆଉଟ ପୋଷ୍ଟ ପାଖରେ ଥିବା ପାଚେରୀକୁ ଜେସିବି ଦ୍ବାରା ଭଙ୍ଗାଯାଉଥିଲା । ଏହି ସମୟରେ ଦୁଇଜଣ ଶ୍ରମିକ ଜେସିବି ଓ କାନ୍ଥ ତଳେ ଚାପି ହୋଇଯାଇଛନ୍ତି । ଜେସିବିର ସାମ୍ନାପଟ ବକେଟରେ ଜଣେ ଶ୍ରମିକ ଫସିଯାଇଥିବା ବେଳେ ଅନ୍ୟଜଣେ ଭଙ୍ଗା କାନ୍ଥ ତଳେ ଚାପି ହୋଇ ରହିଥିଲେ । ଘଟଣାସ୍ଥଳରେ ଜଣେ ଶ୍ରମିକଙ୍କ ମୃତ୍ୟୁ ହୋଇଛି। ରେଳବାଇ ପୁଲିସ , ଆରପିଏଫ ଓ ଅନ୍ୟ ଅଧିକାରୀ ସାମିଲ ରହିଛନ୍ତି । ଅନ୍ୟଜଣେ ଶ୍ରମିକ ଗୁରୁତର ଅବସ୍ଥାରେ ହସ୍ପିଟାଲରେ ଭର୍ତ୍ତି ହୋଇଛନ୍ତି। ମୃତ ଶ୍ରମିକ ଜଣକ ହେଲେ ଉମେଶ ରିଶିଦେଭ ଓ ଗୁରୁତର ଆହତ ଜଣକ ହେଲେ କେଶୁ ରିଶିଦେଭ। ପୋଲିସ ଶବବ୍ୟବଚ୍ଛେଦ ପାଇଁ କଣ୍ଟାବାଞ୍ଜି ଡାକ୍ତରଖାନାକୁ ପଠାଇ ଦେଇଛି।୨ ଜଣ ଶ୍ରମିକ ବିହାର ରାଜ୍ୟର ବୋଲି ଜଣାପଡ଼ିଛି।
