ଜୁନାଗଡ଼,୨୫ : କଳାହାଣ୍ଡି ଜିଲ୍ଲା ଜୁନାଗଡ଼ ବ୍ଲକର ମାଓ ଅଧ୍ୟୁଷିତ ଦୁର୍ଗମ ଅଞ୍ଚଳ କୁସୁମବରା ଗ୍ରାମରେ ୨୦୧୩ ମସିହାରେ ସ୍ଥାପିତ ହୋଇଥିବା ପ୍ରାଥମିକ ବିଦ୍ୟାଳୟରେ କମ ଛାତ୍ରଛାତ୍ରୀ ଥିବା ଯୋଗୁଁ ଏହାକୁ ବନ୍ଦ କରିଦିଆଯାଇଛି । ସ୍କୁଲ ବନ୍ଦ ହେବା ଫଳରେ ଏହି ଗ୍ରାମର ଛାତ୍ରଛାତ୍ରୀ ମାନେ ପାଠର ଡୋରି ବାନ୍ଧିଛନ୍ତି । ସରକାରଙ୍କ ନିୟମ ଅନୁସାରେ ଯେଉଁ ବିଦ୍ୟାଳୟରେ ୧୦ରୁ କମ ଛାତ୍ରଛାତ୍ରୀ ଥିବ ସେହିସ୍କୁଲକୁ ବନ୍ଦ କରିବା ପାଇଁ ଶିକ୍ଷା ବିଭାଗକୁ ନିର୍ଦ୍ଦେଶ ଦିଆଯାଇଥିଲା । ଏହି ପରିପ୍ରେକ୍ଷୀରେ ଜୁନାଗଡ଼ ବ୍ଲକର ୪ଟି ସ୍କୁଲକୁ ବନ୍ଦ କରି ପାଖରେ ଥିବା ସ୍କୁଲରେ ସେହି ଛାତ୍ରଛାତ୍ରୀ ମାନଙ୍କୁ ପାଠ ପଢିବା ପାଇଁ ଅନୁମତି ପ୍ରଦାନ କରାଗଲା । କୁସୁମବରା ନୂତନ ପ୍ରାଥମିକ ବିଦ୍ୟାଳୟରେ ୭ ଜଣ ଛାତ୍ରଛାତ୍ରୀ ଅଧ୍ୟୟନ କରିଥିଲେ । ଏହି ସ୍କୁଲକୁ ବନ୍ଦ କରି ୩ କିଲୋମିଟର ଦୂରରେ ଥିବା ସୁପେଲ ସ୍କୁଲରେ ମିଶାଇ ଦିଆଯାଇଛି । କୁସୁମବରା ଗ୍ରାମରୁ ସୁପେଲ ଗ୍ରାମକୁ ଯିବାକୁ ହେଲେ ୩ କିଲୋମିଟର ପାହାଡି ଅଞ୍ଚଳ ସହିତ ନାଳ ଅତିକ୍ରମ କରି ଯିବାକୁ ପଡିଥାଏ । ଏ ଅଞ୍ଚଳରେ ଭଲ ରାସ୍ତା ନ ଥିବା ବେଳେ ଜଙ୍ଗଲୀ ପାଦଚଲା ରାସ୍ତା ଉପରେ ଗ୍ରାମବାସୀ ନିର୍ଭର କରିଥାନ୍ତି । ଏହି ଅଞ୍ଚଳ ମାଓ କରିଡ଼ର ଭିତରେ ଯାଉଥିବାରୁ ପାଦଚଲା ରାସ୍ତାରେ ରାତିରେ ଯିବା ଆସିବା କରୁନଥିବା ବେଳେ ଦିନ ବେଳେ ଲୋକେ ଏକା ନ ଯାଇ ସାଙ୍ଗସାଥି ହୋଇ ବାଟ ଚାଲିଥାନ୍ତି । ଅନ୍ୟ ପକ୍ଷରେ ଏଭଳି ବିପଦସଂକୁଳ ରାସ୍ତାରେ ପ୍ରଥମ ଦ୍ୱିତୀୟ ଶ୍ରେଣିର କୁନି କୁନି ଛାତ୍ରଛାତ୍ରୀ କିଭଳି ପାଠ ପଢିବା ପାଇଁ ଯିବା ଆସିବା କରିବେ ସେନେଇ ଅଭିଭାବକ ମାନେ ଚିନ୍ତାରେ ପଡିଯାଇଛନ୍ତି । କୁସୁମବରା ସ୍କୁଲ ବନ୍ଦ ହେବା ଦିନ ଠାରୁ ଛାତ୍ରଛାତ୍ରୀ ମାନଙ୍କୁ ଅଭିଭାବକ ମାନେ ଆଉ ୩ କିଲୋମିଟର ଦୂରରେ ଥିବା ସୁପେଲ ସ୍କୁଲକୁ ପାଠ ପଢାବା ପାଇଁ ଛାଡୁ ନାହାନ୍ତି । ଛାତ୍ରଛାତ୍ରୀ ମାନେ ସବୁ ଦିନ ପାଇଁ ପାଠପଢାରେ ଡୋରି ବାନ୍ଧିବା ପରିସ୍ଥିତି ସୃଷ୍ଟି ହୋଇଥିବାରୁ ଏହାର ପ୍ରତିକାର ପାଇଁ ଜିଲ୍ଲା ପ୍ରଶାସନ ଦୃଷ୍ଟିଦେବାକୁ ଗ୍ରାମବାସୀ ଅନୁରୋଧ କରିଛନ୍ତି ।