ଓଡ଼ିଆ ବାର୍ତ୍ତା/ ନୂଆଦିଲ୍ଲୀ: ଶବ୍ଦ ଠାରୁ ଅଧିକ ୧୫ ଗୁଣ ଦୃତରେ ଗତି କରୁଥିବା ଏକ ହାଇପରସୋନିକ୍ ମିସାଇଲ ଲଞ୍ଚ କଲା ଇରାନ। ଇରାନ ଦାବି କରିଛି ଯେ ଫତାହ ନାମକ ଏହି ମିସାଇଲର ଲକ୍ଷ୍ୟ ଭେଦ କରିବାର କ୍ଷମତା ୧୪ଶହ କିମି ରହିଛି। ଏହାର ଗତି ଅଧିକ ସ୍ପିଡ ଥିବା ସହ ଶତ୍ରୁପକ୍ଷଙ୍କ ଟାର୍ଗେଟକୁ ନଷ୍ଟ କରିବାକୁ ଏହା ସକ୍ଷମ। ଇରାନର ରାଷ୍ଟ୍ରପତି ଇବ୍ରାହିମ ରୈସିଙ୍କ ସମ୍ମୁଖରେ ରିଭଲ୍ୟୁସନାରୀ ଗାର୍ଡ ଏହି କ୍ଷେପଣାସ୍ତ୍ର ଉପସ୍ଥାପନ କରିଥିଲେ। ଇରାନ ଦାବି କରିଛି ଯେ ଆମେରିକାର ଅତ୍ୟାଧୁନିକ ଆଣ୍ଟି-ବାଲିଷ୍ଟିକ୍ କ୍ଷେପଣାସ୍ତ୍ର ପ୍ରଣାଳୀ ସମେତ ଇସ୍ରାଏଲର ଆଇରନ୍ ଡୋମ୍ ଉପରେ ଫତାହ କ୍ଷେପଣାସ୍ତ୍ର ଆକ୍ରମଣ କରିବାରେ ସକ୍ଷମ ହେବ। ଏହି ହାଇପରସୋନିକ ମିସାଇଲ ବେଶ ଘାତକ ସୃଷ୍ଟି କରି ପାରେ। ନୂଆ ମିସାଇଲରେ ଏତେ ସବୁ କ୍ଷମତା ଥିବାରୁ ଇରାନ ନିଜକୁ ଆହୁରି ଶକ୍ତିଶାଳୀ କରିବାକୁ ସକ୍ଷମ ହୋଇଛି ବୋଲି ବିଶେଷଜ୍ଞମାନେ କହିଛନ୍ତି। ଆମେରିକା ଏବଂ ୟୁରୋପର ବିରୋଧ ସତ୍ତ୍ୱେ ଇରାନ ଏହାର କ୍ଷେପଣାସ୍ତ୍ର କାର୍ଯ୍ୟକ୍ରମକୁ ଆହୁରି ବିକାଶ କରିବ ବୋଲି କହିଛି। ଏଥି ସହିତ ପାଶ୍ଚାତ୍ୟ ଦେଶଗୁଡିକର ସାମରିକ ବିଶେଷଜ୍ଞମାନେ କହିଛନ୍ତି ଯେ ଇରାନ ସର୍ବଦା ଏହାର କ୍ଷେପଣାସ୍ତ୍ରର କ୍ଷମତାକୁ ବଢାଇ ସମସ୍ତଙ୍କ ସମ୍ମୁଖରେ ଉପସ୍ଥାପନ କରିଥାଏ। ଇରାନ ଏଥର ମଧ୍ୟ ଏହି କ୍ଷେପଣାସ୍ତ୍ରର ଗୁଣ ବିଷୟରେ କୌଣସି ବିଶେଷ ପ୍ରମାଣ ଉପସ୍ଥାପନ କରିନାହିଁ। ଏହାପୂର୍ବରୁ ଗତ ବର୍ଷ ନଭେମ୍ବରରେ ଇରାନର ରିଭଲ୍ୟୁଶନାରୀ ଗାର୍ଡ କମାଣ୍ଡର ଆମୀର ଅଲି ହାଜିଜାଦେହ୍ ଏକ ହାଇପରସୋନିକ୍ କ୍ଷେପଣାସ୍ତ୍ର ତିଆରି କରିଥିବା ଦାବି କରିଥିଲେ। ହାଜିଜାଦେହ୍ କହିଥିଲେ ଯେ ତାଙ୍କ କ୍ଷେପଣାସ୍ତ୍ରକୁ କେହି ଅଟକାଇବା ଅସମ୍ଭବ ହେବ। ଏହା ପ୍ରତ୍ୟେକ ପ୍ରତିରକ୍ଷା ବିରୋଧୀ ପ୍ରଣାଳୀକୁ ନଷ୍ଟ କରିବାରେ ସକ୍ଷମ ହେବ। ମେ ୨୫ ରେ, ଇରାନ ସଫଳତାର ସହିତ ୨,୦୦୦ କିଲୋମିଟର ଦୂରତା ବିଶିଷ୍ଟ ଏକ ବାଲିଷ୍ଟିକ୍ କ୍ଷେପଣାସ୍ତ୍ର ପରୀକ୍ଷା କରିଥିଲା। ଇରାନ କହିଥିଲା ଯେ ଏହି କ୍ଷେପଣାସ୍ତ୍ର ମଧ୍ୟ ପୂର୍ବରେ ଥିବା ଆମେରିକା ଏବଂ ଇସ୍ରାଇଲର ବେସ ପର୍ଯ୍ୟନ୍ତ ପହଞ୍ଚିବାରେ ସକ୍ଷମ ରହିଛି। ଆଇଆରଏନଏ ଅନୁଯାୟୀ, ଏହି କ୍ଷେପଣାସ୍ତ୍ର ପାରସ୍ୟ ଉପସାଗରରେ ପାଟ୍ରୋଲିଂ କରୁଥିବା ଯୁଦ୍ଧ ଜାହାଜ ଏବଂ ବୁଡ଼ାଜାହାଜରେ ନିୟୋଜିତ ହୋଇଛି। ଏହି ବାଲିଷ୍ଟିକ୍ କ୍ଷେପଣାସ୍ତ୍ର ଆମେରିକାର ଟୋମାହାକ୍ ଅପେକ୍ଷା ଅଧିକ ଶକ୍ତିଶାଳୀ। ଏହାର କିଛି ଦିନ ପୂର୍ବରୁ ଏକ ନ୍ୟୁଜ୍ ଏଜେନ୍ସି ଦ୍ୱାରା ପ୍ରକାଶିତ ଏକ ରିପୋର୍ଟରେ କୁହାଯାଇଥିଲା ଯେ ଇରାନ ନିଜର ନ୍ୟୁକ୍ଲିଅର ଫ୍ୟାସିଲିଟିକୁ ଇସ୍ରାଇଲ ଏବଂ ଆମେରିକାର ଆକ୍ରମଣରୁ ରକ୍ଷା କରିବା ପାଇଁ ଚେଷ୍ଟା କରୁଛି। ସେ ବର୍ତ୍ତମାନ ପାର୍ବତ୍ୟ ଅଞ୍ଚଳରେ ପରମାଣୁ ଅସ୍ତ୍ର ତିଆରି କରୁଛି। ଏହାର ସେଟଲାଇଟ ଚିତ୍ର ମଧ୍ୟ ପ୍ରକାଶ ପାଇଥିଲା। ଇରାନକୁ ପରମାଣୁ ଅସ୍ତ୍ର ତିଆରି ନକରିବା ପାଇଁ ନ୍ୟୁକ୍ଲିଅର ଫ୍ୟାସିଲିଟି ଉପରେ ଅନେକ ଥର ଆକ୍ରମଣ କରାଯାଇଛି। ନାନ୍ତାଜ୍ ନ୍ୟୁକ୍ଲିଅର ସାଇଟକୁ ଷ୍ଟକ୍ସନେଟ୍ ଭାଇରସ ଦ୍ୱାରା ଆକ୍ରମଣ କରାଯାଇଥିଲା। ଏହା ଇସ୍ରାଇଲ ଏବଂ ଆମେରିକାରେ ନିର୍ମିତ ଏକ ଭାଇରସ ଥିଲା।
