ଓଡ଼ିଆ ବାର୍ତ୍ତା/ ମୁମ୍ବାଇ: ଉଦ୍ଧବ ବାଲାସାହେବ ଠାକରେର ସଭାପତି ଏବଂ ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ଉଦ୍ଧବ ଠାକରେ ବିଜେପି ଏବଂ ରାଷ୍ଟ୍ରୀୟ ସ୍ୱୟଂସେବକ ସଂଗଠନ (ଆରଏସଏସ) ଉପରେ ଜୋରଦାର ବର୍ଷିଛନ୍ତି। ଗୋମୁତ୍ରକୁ ପ୍ରସଙ୍ଗ କରି ସେ ପ୍ରଶ୍ନ କରିଛନ୍ତି ଯେ ଗୋମୁତ୍ର ଛିଞ୍ଚି ଆମ ଦେଶ ସ୍ୱାଧୀନତା ପାଇଛି କି? ରବିବାର ମହାରାଷ୍ଟ୍ରର ରତ୍ନଗିରି ଜିଲ୍ଲାରେ ଏକ ରାଲିରେ ସେ ଏହି କଥା କହିଛନ୍ତି। ସେ କହିଛନ୍ତି ଗୋମୁତ୍ର ଛିଞ୍ଚିବା ହେତୁ ଆମ ଦେଶ ମୁକ୍ତ ହୋଇଛି କି? ଗୋ ମୁତ୍ର ଛିଞ୍ଚିଗଲା ଏବଂ ଆମେ ସ୍ୱାଧୀନତା ପାଇଲୁ କି? ଏହା ଏପରି ନଥିଲାଃ ବରଂ ସ୍ୱାଧୀନତା ସଂଗ୍ରାମୀଙ୍କ ବଳିଦାନ ହେତୁ ଆମେ ସ୍ୱାଧୀନତା ପାଇଲୁ।
ତାଙ୍କ ଦଳର ପରିଚୟକୁ ନେଇ ବିବାଦ ଉପରେ ଠାକରେ କହିଛନ୍ତି – ନିର୍ବାଚନ କମିଶନ ଶିବସେନାର ନାମ ଏବଂ ନିର୍ବାଚନ ପ୍ରତୀକ ଛଡ଼ାଇ ନେଇଛନ୍ତି। କିନ୍ତୁ ସେମାନେ ଆମଠାରୁ ଦଳ ଛଡ଼ାଇ ନେଇ ପାରିବେ ନାହିଁ। ‘ଆମକୁ ନିଷ୍ପତ୍ତି ନେବାକୁ ହେବ ଯେ ଯେଉଁମାନଙ୍କର ସ୍ୱାଧୀନତା ସଂଗ୍ରାମୀଙ୍କ ସହିତ କୌଣସି ସମ୍ପର୍କ ନାହିଁ ଏବଂ ଯେଉଁମାନଙ୍କର ପଶୁ ପ୍ରବୃତ୍ତି ରହିଛି, ସେମାନଙ୍କୁ ୨୦୨୪ରେ ସମାଧି ଦିଆଯିବା ଉଚିତ। ଆମକୁ ଶପଥ ନେବାକୁ ହେବ ଯେ ଆମେ ଭାରତ ମାତାକୁ ପରାଧୀନତାର କବଳକୁ ଆସିବାକୁ ଦେବୁ ନାହିଁ। ଯଦି ଆମେ ଏହା ନକରିବା ତେବେ ୨୦୨୪ ନିର୍ବାଚନ ଶେଷ ନିର୍ବାଚନ ହେବ’। ଉଦ୍ଧବ ଠାକରେ ଏହା କହିଛନ୍ତି। ଯେଉଁମାନେ ‘ଧନୁ ତୀର’ (ଦଳୀୟ ଚିହ୍ନ) ଚୋରି କରିଛନ୍ତି, ସେମାନଙ୍କୁ ‘ମଶାଲ’ ଧରି ସାମ୍ନା କରିବି। ମହାରାଷ୍ଟ୍ର ଯାହା ନିଷ୍ପତ୍ତି ନେବ ମୁଁ ତାହା କରିବି, ଯଦି ଲୋକେ ମୋତେ ଘରକୁ ଯିବାକୁ କହିବେ, ମୁଁ ଯିବି ବୋଲି ଠାକରେ ରତ୍ନଗିରିରେ କହିଛନ୍ତି।
ଉଲ୍ଲେଖଯୋଗ୍ୟ, ଜୁନ୍ ୨୦୨୨ରେ ଏକନାଥ ସିନ୍ଦେ ଏବଂ ତାଙ୍କ ସହଯୋଗୀ ବିଧାୟକ ଓ ସାଂସଦମାନେ ଶିବସେନା ଭିତରେ ଗୋଷ୍ଠୀ କନ୍ଦଳ ତିଆରି କରିଥିଲେ। ଏହାଫଳରେ ଠାକରେଙ୍କ ନେତୃତ୍ୱାଧୀନ ମହା ବିକାଶ ଆଗାଡି ସରକାର ପତନ ଘଟିଥଲା। ଏହାପରେ ଉଦ୍ଧବ ଠାକରେ ଦଳ ଉପରୁ ନିଜର ନିୟନ୍ତ୍ରଣ ରଖିବାରେ ବିଫଳ ହୋଇଛନ୍ତି।
