ଓଡ଼ିଆ ବାର୍ତ୍ତା/ ଭୁବନେଶ୍ୱର: ଭୁବନେଶ୍ୱର ରେଲଓ୍ୱେ ଷ୍ଟେସନ୍ ସମ୍ମୁଖରେ ଏକ ପ୍ଲାକାର୍ଡ ଧରି ବିକ୍ଷୋଭ ପ୍ରଦର୍ଶନ କରୁଥିବା ବେଳେ ଜିଆରପି ଜଣେ ରୁଷୀୟ ନାଗରିକଙ୍କୁ ଉଠାଇ ନେଇଛି। ଏହି ରୁଷୀୟ ନାଗରିକଙ୍କ ପାଖରେ ଏକ ପ୍ଲାକାର୍ଡ ଥିଲା, ଯେଉଁଥିରେ ସେ ନିଜକୁ ବାସହୀନ ଏବଂ ଯୁଦ୍ଧ (ରୁଷ-ୟୁକ୍ରେନ ଯୁଦ୍ଧ) ବିରୋଧରେ ଦର୍ଶାଇ ସାହାଯ୍ୟ ମାଗୁଥିଲେ। ପ୍ରଦର୍ଶନକାରୀଙ୍କ ଦ୍ୱାରା ପ୍ରଦର୍ଶିତ ପ୍ଲାକାର୍ଡରେ ସେ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ବିରୋଧରେ ଥିବା ଉଲ୍ଲେଖ ରହିଛି। ପୁଲିସ କହିଛି ଯେ ସେ ଟୁରିଷ୍ଟ ଭିସାରେ ଭାରତ ଆସିଥିଲେ, ଯାହାର ଅବଧି ୬ ମାସ ହେବ ଶେଷ ହୋଇଯାଇଛି। ପାଖରେ ଟଙ୍କା ନଥିବାରୁ ରେଲଓ୍ୱେ ଷ୍ଟେସନରେ ଭିକ ମାଗୁଥିଲେ। ଯେହେତୁ ସେ ଇଂରାଜୀ ବୁଝି ପାରୁନାହାନ୍ତି, ତେଣୁ କେହି ତାଙ୍କ ସହ ରୁଷୀୟ ଭାଷାରେ ଯୋଗାଯୋଗ କରିପାରୁନାହାନ୍ତି ବୋଲି ବିଶ୍ୱସ୍ତ ସୂତ୍ରରୁ ଜଣାପଡ଼ିଛି। ତାଙ୍କ ବିଷୟରେ ସୂଚନା ପାଇବା ପରେ ଜିଆରପି ଅଧିକାରୀମାନେ ତାଙ୍କୁ ଭାରତ ଗସ୍ତର ଉଦ୍ଦେଶ୍ୟ ଏବଂ ତାଙ୍କ ସମସ୍ୟା ବିଷୟରେ ପଚରାଉଚରା ପାଇଁ ଅଟକ ରଖିଥିଲେ। ଏହି ରୁଷୀୟ ନାଗରିକଙ୍କ ପାଖରେ ବୈଧ ପାସପୋର୍ଟ ଥିଲେ ମଧ୍ୟ ଭିସା ଦେଖାଇବାରେ ବିଫଳ ହୋଇଛନ୍ତି। ଅଧିକ ପଚରାଉଚରା ପାଇଁ ଜିଆରପି ପରେ ରୁଷୀୟ ନାଗରିକଙ୍କୁ ସ୍ପେଶାଲ ବ୍ରାଞ୍ଚକୁ ହସ୍ତାନ୍ତର କରିଛି। ସେ ରୁଷର ନାଗରିକ। ୫୮ ବର୍ଷୀୟ ଆଣ୍ଡ୍ର୍ୟୁ ଗ୍ଲାଗୋଲେଭ ମସ୍କୋରେ ରୁହନ୍ତି। ୨୦୧୬ ମସିହାରୁ ସେ ଭାରତ ଗସ୍ତରେ ଆସିଥିଲେ। ଭାରତରେ ବୁଲିବାକୁ ଆସି ଅବଧି ଶେଷ ହୋଇଯିବା ପରେ ସେ ଏଠାରେ ଆଶ୍ରୟ ପାଇଁ ଆବେଦନ କରିଥିଲେ। ଏହି ପ୍ରସ୍ତାବ ଉପରେ ବିଚାର ଚାଲିଛି ଏବଂ ସେହି ଆଧାରରେ ସେ ଭାରତରେ ରହୁଛନ୍ତି ବୋଲି ସୂଚନା ରହିଛି। ମିଳିଥିବା ସୂଚନା ଅନୁଯାୟୀ ସେ ତିନି ମାସ ହେବ ଓଡ଼ିଶାରେ ଅଛନ୍ତି। ଏହି ସମୟରେ ସେ କିଛିଦିନ ପୁରୀରେ ରହିଥିଲେ।
