ନୂଆଦିଲ୍ଲୀ: କାନାଡ଼ାରେ ବଢୁଥିବା ଭାରତ ବିରୋଧୀ କାର୍ଯ୍ୟକଳାପ ଏବଂ ରାଜନୈତିକ ଦୃଷ୍ଟିରୁ ଘୃଣା ଅପରାଧ ଓ ହିଂସାକୁ ଦୃଷ୍ଟିରେ ରଖି ଭାରତ ସରକାର ବୁଧବାର କାନାଡ଼ାରେ ରହୁଥିବା ଭାରତୀୟ ନାଗରିକ ଓ ଛାତ୍ରଛାତ୍ରୀଙ୍କ ପାଇଁ ଏକ ଆଡଭାଇଜରି ବା ମାର୍ଗଦର୍ଶିକା ଜାରି କରିଛନ୍ତି। ଦୁଇ ଦେଶର ବିବାଦକୁ ନେଇ ସାରା ଦେଶରେ ବିତର୍କ ଚାଲିଥିବା ବେଳେ ଆଜି ବୈଦେଶିକ ମନ୍ତ୍ରୀ ଏସ ଜୟଶଙ୍କର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଭେଟିଥିଲେ। ଏହାପରେ ମାର୍ଗଦର୍ଶିକା ଜାରି ହୋଇଛି।
ଖଲିସ୍ତାନୀ ଆତଙ୍କବାଦୀ ହରଦୀପ ସିଂହ ନିଜ୍ଜରଙ୍କ ମୃତ୍ୟୁକୁ ନେଇ ଦୁଇ ଦେଶ ମଧ୍ୟରେ ଜାରି ରହିଥିବା ବିବାଦକୁ ଦୃଷ୍ଟିରେ ରଖି କାନାଡା ସରକାର ଭାରତରେ ରହୁଥିବା ନିଜ ନାଗରିକଙ୍କ ପାଇଁ ସମାନ ପରାମର୍ଶ ଜାରି କରିବାର ଗୋଟିଏ ଦିନ ପରେ ଏହି ମାର୍ଗଦର୍ଶିକା ଜାରି ହୋଇଛି।
କାନାଡ଼ାରେ ଭାରତ ବିରୋଧୀ ଏଜେଣ୍ଡାକୁ ବିରୋଧ କରୁଥିବା ଭାରତୀୟ କୂଟନୀତିଜ୍ଞ ଓ ଭାରତୀୟ ସମ୍ପ୍ରଦାୟର ଏକ ଅଂଶକୁ ଏବେ ଜାରି ରହିଥିବା ବିବାଦ ମଧ୍ୟରେ ଧମକ ମିଳିପାରେ ବୋଲି ଆଡଭାଇଜରିରେ ଦାବି କରାଯାଇଛି। ଏହା ମଧ୍ୟ ପରାମର୍ଶ ଦେଉଛି ଯେ କାନାଡ଼ାରେ ଭାରତୀୟ ଛାତ୍ରଛାତ୍ରୀମାନେ କାନାଡ଼ାରେ ଅବକ୍ଷୟ ହେଉଥିବା ସୁରକ୍ଷା ବାତାବରଣ କାରଣରୁ ଅତ୍ୟଧିକ ସତର୍କତା ଅବଲମ୍ବନ କରନ୍ତୁ ଏବଂ ସତର୍କ ରୁହନ୍ତୁ।
ମାର୍ଗଦର୍ଶିକାରେ ଆହୁରି କୁହାଯାଇଛି ଯେ କାନାଡ଼ାରେ ରହୁଥିବା ଭାରତୀୟ ନାଗରିକ ଓ ଛାତ୍ରଛାତ୍ରୀମାନେ ନିଜ ନିଜ ୱେବସାଇଟ୍ ଜରିଆରେ ଓଟାଓ୍ୱାସ୍ଥିତ ଭାରତୀୟ ହାଇକମିଶନର କିମ୍ବା ଟରଣ୍ଟୋ ଓ ଭାଙ୍କୁଭରସ୍ଥିତ ଭାରତୀୟ ବାଣିଜ୍ୟ ଦୂତାବାସରେ ପଞ୍ଜୀକରଣ କରିବା ଆବଶ୍ୟକ। MADAD ପୋର୍ଟାଲ madad.gov.inରେ ବି ପଞ୍ଜିକରଣ କରିହେବ। ଏହି ପଞ୍ଜିକରଣ ଦ୍ୱାରା କୌଣସି ଜରୁରୀକାଳୀନ ପରିସ୍ଥିତି କିମ୍ବା କୌଣସି ଅଘଟଣ ଘଟିଲେ କର୍ତ୍ତୃପକ୍ଷ ସହାୟତା ପ୍ରଦାନ କରିପାରିବେ।
ଏହି ଆଡଭାଇଜରି ଭାରତ ଓ କାନାଡ଼ା ମଧ୍ୟରେ ବଢୁଥିବା ତିକ୍ତତାକୁ ଦର୍ଶାଉଛି। ସୂଚନାଯୋଗ୍ୟ ଯେ, ମାର୍ଗଦର୍ଶିକାରେ କାନାଡାକୁ ସମ୍ପୂର୍ଣ୍ଣ ଭାବେ ଯାତ୍ରା ନକରିବା ପାଇଁ ଚେତାବନୀ ଦିଆଯାଇନାହିଁ। ତେବେ କାନାଡ଼ାରେ ରହୁଥିବା ଭାରତୀୟ ନାଗରିକ ଓ ଛାତ୍ରଛାତ୍ରୀମାନେ ସମ୍ଭାବ୍ୟ ବିପଦ ସମ୍ପର୍କରେ ସଚେତନ ରହିବା ସହ ଆବଶ୍ୟକୀୟ ସତର୍କତା ଅବଲମ୍ବନ କରିବା ଉଚିତ ବୋଲି ଏଥିରେ କୁହାଯାଇଛି।
