ଓଡ଼ିଆ ବାର୍ତ୍ତା/ ସୁବର୍ଣ୍ଣପୁର (ରାଜ କିଶୋର ତ୍ରିପାଠୀ): ପ୍ରାଚୀନ କୃଷି ପରମ୍ପରାର ଆଦ୍ୟ ପାର୍ବଣ ନୂଆଖାଇ ପଶ୍ଚିମ ଓଡିଶା ସାରା ପ୍ରବଳ ଉତ୍ସାହ ଉଦ୍ଦୀପନା ସହ ପାଳିତ ହୋଇଯାଇଛି । ସେହି କ୍ରମରେ ସୁବର୍ଣ୍ଣପୁର ଜିଲ୍ଲାସାରା ବୁଧବାର ପାଳିତ ହୋଇଯାଇଛି ନୂଆଖାଇ ପର୍ବ । କେଉଁ ଏକ ଆବାହମାନ କାଳରୁ ଚଳି ଆସୁଥିବା ନୂଆଖାଇ ସମର୍ପଣ ଓ ଭାଇଚାରାର ପର୍ବ ଭାବେ ନିଜର ସ୍ବତନ୍ତ୍ରତା ପ୍ରତିପାଦନ କରିଥାଏ । କୃଷି କ୍ଷେତ୍ରରୁ ଉତ୍ପାଦିତ ହେଉଥିବା ପ୍ରଥମ ଶସ୍ୟକୁ ନିଜର ଇଷ୍ଟଦେବୀଙ୍କ ନିକଟରେ ଅର୍ପଣ କରିଥାଏ ଚାଷୀ । ନୂଆଁଖାଇ ଆସିଲେ ଏଥିପାଇଁ କେତେ ସଜବାଜ ଚାଲିଥାଏ ପ୍ରତି ପରିବାରରେ । ଘରକୁ ସଫାସୁତରା ସହ ଲିପାପୋଛା କରାଯାଏ ଓ ଲୁଗାପଟା ଠାରୁ ଆରମ୍ଭ କରି ଘରର ଅନେକ ଘରକରଣା ଜିନିଷ ବି ନୁଆ ଭାବରେ ବ୍ୟବହୃତ କରାହୁଏ । ପିଲାଠୁ ବୟସ୍କ ସମସ୍ତେ ସମ୍ବଲପୁରୀ ବସ୍ତ୍ର ପରିଧାନ କରି ନୂଆ ଖାଇବାର ପରମ୍ପରା ରହିଛି । ନବାର୍ଣ ଭକ୍ଷଣ ପରେ ଇଷ୍ଟ ଦେବୀଙ୍କୁ ଦର୍ଶନ ଏବଂ ବୟସ୍କଙ୍କ ସହ ଜୁହାର ଭେଟ କାର୍ଯ୍ୟକ୍ରମ ଏକ ମୁଖ୍ୟ ଆକର୍ଷଣ ପାଲଟିଥାଏ l ଏଥିଲାଗି ସମ୍ବଲପୁରୀ ବସ୍ତ୍ର ବୁଣାକାରମାନେ ଦୀର୍ଘ ଦିନରୁ ନୂଆ ନୂଆ ଡିଜାଇନର ବସ୍ତ୍ର ତିଆରି କରିବାରେ ଲାଗି ପଡିଥାନ୍ତି । ଜିଲ୍ଲାର ସବୁ ସମ୍ବଲପୁରୀ ଲୁଗା ଦୋକାନ ଗୁଡିକରେ ବେଶ୍ ଭିଡ ଜମିଥିବା ଏ ସମୟରେ ଦେଖିବାକୁ ମିଳିଥାଏ । ଯିଏ ଯେତେ ଦୂରରେ ଥାଉ ନା କାହିଁକି ନୂଆଖାଇ ଦିନ ନିଶ୍ଚୟ ନିଜ ଘରକୁ ଫେରିଥାନ୍ତି । ସେ ପରିପ୍ରେକ୍ଷୀରେ ଆଜି ଅତ୍ୟନ୍ତ ଆନନ୍ଦ ଉଲ୍ଲାସର ସହ ପାଳିତ ହେଉଛି ସୁବର୍ଣ୍ଣପୁର ଗଡ଼ଜାତ ସମେତ ପଞ୍ଚରା ଇଲାକାରେ ନୂଆଁଖାଇ ପର୍ବ । ଏହି ପରିପ୍ରେକ୍ଷୀରେ ସୋନପୁର ସମଲେଶ୍ବରୀ ମନ୍ଦିରରୁ ନୂଆ ହାଣ୍ଡିରେ ବିଭିନ୍ନ ସାଜସଜ୍ଜା ରେ ଭରି ପାହୁର୍ ବାହାରି ଗଡ଼ଜାତରେ ଥିବା ଅଷ୍ଟ ଚଣ୍ଡୀଙ୍କ ପାଖରେ ନୂଆଁ ଲାଗିବା ପରେ ପରେ ପୂର୍ବରୁ ଧାର୍ଯ୍ୟ ଲଗ୍ନ ଅନୁଯାୟୀ ସହର ସାରା ଲୋକ ନବାର୍ଣ୍ଣ ଭକ୍ଷଣ କରନ୍ତି । ବାଜା ର ତାଳେ ସହର ର ସମସ୍ତ ଜନତା ବାନା ଧରି ପାହୁଡ ଯାତ୍ରା ରେ ସହର ର ସମସ୍ତ ବ୍ୟକ୍ତି ଆଗ୍ରହ ର ସହ ଏହି ପାହୁଡ ଯାତ୍ରା ରେ ସାମିଲ ହୋଇ ସମଲେଶ୍ଵରୀ ମନ୍ଦିର ଠୁ ସୁରେଶ୍ୱରି ମନ୍ଦିର କୁ ନୂଆ ଲାଗି ପାଇଁ ଯାଆନ୍ତି । ଅଷ୍ଟ ଚଣ୍ଡୀଙ୍କ ପାଖରେ ନୂଆ ଲାଗିବା ପରେ ସମସ୍ତେ ଘରେ ଘରେ ନୂଆ ଖାଇବା ପରେ ଆରମ୍ଭ ହୋଇଥାଏ ନୂଆଁଖାଇ ଜୁହାର ଓ ଭେଟଘାଟ ପରମ୍ପରା ।
