ଲାଞ୍ଜିଗଡ଼,୨୨/୭ : କଳାହାଣ୍ଡି ଜିଲ୍ଲା ଲାଞ୍ଜିଗଡ଼ ବ୍ଲକ ତ୍ରିଲୋଚନପୁର ପଞ୍ଚାୟତ ଅଧିନସ୍ଥ ଗଉଡ଼ଥୁଆଗୁଡା ଗ୍ରାମର ଗୋଟିଏ ପରିବାରର ୬ଜଣ ବିଷାକ୍ତ ଛତୁ ଖାଇ ଅସୁସ୍ଥ ହୋଇଥିବା ଜଣାଯାଇଛି । ସେମାନଙ୍କୁ ଝାଡାବାନ୍ତି ହେବାରୁ ଲାଞ୍ଜିଗଡ଼ ସରକାରୀ ମେଡିକାଲରେ ଭର୍ତ୍ତି କରାଯାଇଛି। ସୂଚନା ମୁତାବକ, ଏହି ପରିବାରର ଆମଠାପଦର ଗାଁ ନିକଟ ଜଙ୍ଗଲରୁ ଛତୁ ସଂଗ୍ରହ କରିଥିଲେ ଓ ରାତି ୯ଟାରେ ରାନ୍ଧି ଖାଇଥିଲେ। ଏହାର ଘଣ୍ଟାକ ପରେ ଅର୍ଥାତ ୧୦ଟା ସମୟରେ ପୁରୁଷୋତ୍ତମ ଗଉଡ଼(୨୮), ସ୍ତ୍ରୀ ଲଷ୍ମୀ ଗଉଡ଼(୨୫), ମା’ ରୂପେନ ଗଉଡ଼(୫୦), ଶଙ୍କର ଗଉଡ଼(୨୦), ମଲ ଗଉଡ଼(୧୪)ଓ ପ୍ରତିମା ଗଉଡ଼(୧୨)ଙ୍କୁ ବାରମ୍ବାର ଝାଡା ଓ ବାନ୍ତି ହୋଇଥିଲା । ଏମାନଙ୍କ ମଧ୍ୟରୁ ଲଷ୍ମୀ ଗଉଡ଼ ଓ ନାବାଳିକା ପ୍ରତିମା ଗଉଡ଼ ଅତ୍ୟନ୍ତ ଗୁରୁତ୍ୱର ଥିବାରୁ ପୋଡ଼ାଶୀ ମାନେ ୪କିମି ତ୍ରିଲୋଚନପୁର ଗାଁକୁ ଆସି ଏକ ଟାଟା ମେଜିକ ଗାଡ଼ି ଡାକି ଆଣି ଗଉଡ଼ ଥୁଆଗୁଡା ଗାଁଠାରୁ ୧୬କିମି ଲାଞ୍ଜିଗଡ଼କୁ ଆଣି ରାତି ୧୧ଟା ୨୦ମିନିଟ ସମୟରେ ଲାଞ୍ଜିଗଡ଼ ସରକାରୀ ମେଡିକାଲରେ ଭର୍ତ୍ତି କରିଥିଲେ।