ମହିଳାଙ୍କ ବ୍ୟାଙ୍କ ଆକାଉଣ୍ଟରେ କୋଟି କୋଟି ଟଙ୍କାର କାରବାର; ୭ ମୋବାଇଲ୍ ଓ ଟାଟା ସଫାରି ଜବତ
ଓଡ଼ିଆ ବାର୍ତ୍ତା/ ବାଲେଶ୍ୱର (କୃଷ୍ଣ କୁମାର ମହାନ୍ତି): ବାଲେଶ୍ୱର ସହରରେ ସକ୍ରିୟ ଅନଲାଇନ୍ ଗେମିଂ ଓ ବେଟିଂ ରାକେଟ୍ର ପର୍ଦ୍ଦାଫାଶ କରିଛି ପୋଲିସ। ଗୋପବନ୍ଧୁ ପାର୍କ ଅଞ୍ଚଳରେ ଚଢ଼ାଉ କରି ଜଣେ ମହିଳାଙ୍କ ସମେତ ୫ ଜଣଙ୍କୁ ଗିରଫ କରାଯାଇଛି। ଗିରଫ ମହିଳାଙ୍କ ବ୍ୟାଙ୍କ ଆକାଉଣ୍ଟରେ କୋଟି କୋଟି ଟଙ୍କାର ଆର୍ଥିକ କାରବାର ହୋଇଥିବା ତଥ୍ୟ ଏହି ଘଟଣାକୁ ଆହୁରି ଗମ୍ଭୀର କରିଛି। ଅଭିଯୁକ୍ତମାନଙ୍କ ଠାରୁ ୭ଟି ମୋବାଇଲ୍ ଫୋନ୍ ଓ ଗୋଟିଏ ଟାଟା ସଫାରି କାର୍ ଜବତ ହୋଇଛି। ଗାନ୍ଧୀ ସ୍ମୃତି ଭବନ ନିକଟସ୍ଥ ଗୋପବନ୍ଧୁ ପାର୍କକୁ କେନ୍ଦ୍ର କରି ଏହି ଗୋଷ୍ଠୀ ସ୍ଥାନୀୟ ଲୋକଙ୍କୁ ଅନଲାଇନ୍ ଗେମିଂ ଓ ବେଟିଂରେ ସାମିଲ କରିବା ସହ ଏହାର ପ୍ରଚାର କରୁଥିଲେ। ବିଶ୍ୱସନୀୟ ସୂତ୍ରରୁ ଖବର ପାଇ ସାଇବର କ୍ରାଇମ୍ ଓ ଇକୋନୋମିକ୍ ଅଫେନ୍ସ ପୋଲିସ ପକ୍ଷରୁ ଏହି ଅଞ୍ଚଳରେ ଚଢ଼ାଉ କରାଯାଇଥିଲା। ପରେ ଅଟକ ଥିବା ୫ ଜଣଙ୍କୁ ଗିରଫ କରାଯାଇଥିଲା। ଗିରଫ ବ୍ୟକ୍ତିମାନେ ହେଲେ ସୋର ଥାନା ଅଞ୍ଚଳର ବିଜୟ କୁମାର ନାୟକ (୩୦), ମୟୂରଭଞ୍ଜର ସବିତା ପାତ୍ର (୪୩), ପଶ୍ଚିମବଙ୍ଗର ସନ୍ତୋଷ ଶ, ବିହାରର ବିବେକ କୁମାର (୩୦) ଏବଂ ପଶ୍ଚିମବଙ୍ଗର ସାଗର କୁମାର (୩୦)। ଅଭିଯୁକ୍ତଙ୍କ ମଧ୍ୟରେ ଓଡ଼ିଶା ସମେତ ପଶ୍ଚିମବଙ୍ଗ ଓ ବିହାରର ବ୍ୟକ୍ତିଙ୍କ ସମ୍ପୃକ୍ତି ଏହି କାରବାରର ଆନ୍ତଃରାଜ୍ୟ ସଂଯୋଗ ଥିବା ଆଶଙ୍କାକୁ ଦୃଢ଼ କରିଛି। ପୋଲିସ ପକ୍ଷରୁ ଆୟୋଜିତ ପ୍ରେସ୍ମିଟ୍ରେ ଏହି ମାମଲା ସମ୍ପର୍କରେ ଅଧିକ ତଥ୍ୟ ପ୍ରକାଶ କରାଯାଇଛି। ବିଶେଷକରି ଗିରଫ ମହିଳାଙ୍କ ବ୍ୟାଙ୍କ ଆକାଉଣ୍ଟରେ କୋଟି କୋଟି ଟଙ୍କାର ଦେଣନେଣ ହୋଇଥିବା ତଥ୍ୟ ସାମ୍ନାକୁ ଆସିଛି। ଏହି ଆକାଉଣ୍ଟକୁ ବେଟିଂ କାରବାରର ଆର୍ଥିକ ଲେନଦେନ ପାଇଁ ବ୍ୟବହାର କରାଯାଉଥିଲା କି ନାହିଁ, ତାହାର ଯାଞ୍ଚ ଚାଲିଛି। ଏହା ପଛରେ ଅନ୍ୟ ବ୍ୟାଙ୍କ ଆକାଉଣ୍ଟ ଓ ଆର୍ଥିକ ମଧ୍ୟସ୍ଥିଙ୍କ ସମ୍ପୃକ୍ତି ଥିବା ସମ୍ଭାବନାକୁ ମଧ୍ୟ ତଦନ୍ତ ପରିସରଭୁକ୍ତ କରାଯାଇଛି।
ଜବତ ହୋଇଥିବା ମୋବାଇଲ୍ ଫୋନ୍ଗୁଡ଼ିକରୁ ବେଟିଂ ସମ୍ପର୍କିତ ଆପ୍ଲିକେସନ୍, ଯୋଗାଯୋଗ, ଟଙ୍କା କାରବାର ଓ ଅନ୍ୟାନ୍ୟ ଡିଜିଟାଲ୍ ପ୍ରମାଣ ସଂଗ୍ରହ କରିବାକୁ ପୋଲିସ ଯାଞ୍ଚ ଜାରି ରଖିଛି। ଏହି ରାକେଟ୍ରେ କେତେଜଣ ଜଡ଼ିତ ଅଛନ୍ତି, କେଉଁମାନେ ଏହାର ମାଷ୍ଟରମାଇଣ୍ଡ ଏବଂ ବିଭିନ୍ନ ଆକାଉଣ୍ଟ ଜରିଆରେ କିପରି ଅର୍ଥ କାରବାର ହେଉଥିଲା, ତାହା ତଦନ୍ତର ମୁଖ୍ୟ ବିଷୟ ହୋଇଛି। ଏହି ଘଟଣାରେ ସାଇବର କ୍ରାଇମ୍ ଥାନାରେ କେସ୍ ନମ୍ବର ୪୮, ତାରିଖ ୧୧.୧୧.୨୦୨୬ରେ ମାମଲା ରୁଜୁ ହୋଇଛି। ବିଏନ୍ଏସ୍ର ଧାରା ୧୧୨(୨), ୬୧(୨), ୩(୫), ଅନଲାଇନ୍ ଗେମିଂ ଆକ୍ଟ-୨୦୨୫ର ଧାରା ୯(୧), ୯(୨), ଓପିଜି ଆକ୍ଟର ଧାରା ୩ ଏବଂ ଆଇଟି ଆକ୍ଟର ଧାରା ୬୬(ଡି) ଅନୁଯାୟୀ ମାମଲା ରୁଜୁ କରାଯାଇଛି।
ପାଞ୍ଚ ଜଣଙ୍କ ଗିରଫଦାରୀ ପରେ ଏହି ରାକେଟ୍ର ସମ୍ପୂର୍ଣ୍ଣ ନେଟୱର୍କ ଓ ଆର୍ଥିକ କାରବାରର ଗୁମର ଖୋଲିବା ନେଇ ଆଶା ବଢ଼ିଛି। ବିଶେଷକରି ମହିଳାଙ୍କ ବ୍ୟାଙ୍କ ଆକାଉଣ୍ଟରେ ହୋଇଥିବା ବିପୁଳ ଅର୍ଥ କାରବାରର ଉତ୍ସ ଓ ଗନ୍ତବ୍ୟସ୍ଥଳ ଚିହ୍ନଟ କରିବା ତଦନ୍ତର ଏକ ଗୁରୁତ୍ୱପୂର୍ଣ୍ଣ ଦିଗ ହୋଇଛି। ଏହି କାରବାରରେ ଆଉ କେଉଁମାନେ ସମ୍ପୃକ୍ତ, ତାହା ଜାଣିବା ପାଇଁ ପୋଲିସ ତଦନ୍ତ ଜାରି ରଖିଛି। ବାଲେଶ୍ବର ଅତିରିକ୍ତ ଏସ୍ପି ଦେବଜ୍ୟୋତି ବେହେରା ଏଠାରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଗଣମାଧ୍ୟମକୁ ଏହି ସୂଚନା ଦେଇଛନ୍ତି। ସମ୍ମିଳନୀରେ ସାଇବର ଥାନାଧିକାରୀ ମୀନା ବିନ୍ଧାଣିଙ୍କ ସହ ଅନ୍ୟମାନେ ମଧ୍ୟ ଉପସ୍ଥିତ ଥିଲେ।
