ଦୀର୍ଘଦିନର ସାଂଗଠନିକ କାର୍ଯ୍ୟକୁ ମିଳିଲା ଗୁରୁତ୍ୱ, ନୂଆ ଦାୟିତ୍ୱକୁ ନେଇ ଶୁଭେଚ୍ଛାର ସୁଅ
ଓଡ଼ିଆ ବାର୍ତ୍ତା/ କୋରାପୁଟ (ସୁନ୍ଦର କୁମାର ପାଣି): ଦଳ ପାଇଁ ନିରବଚ୍ଛିନ୍ନ ଭାବେ କାମ କରିବା, ଯୁବପିଢ଼ିଙ୍କୁ ଏକାଠି କରି ସଂଗଠନକୁ ଆଗକୁ ନେବା ଏବଂ ପଦପଦବୀର ଆଶା ନ ରଖି ଦଳୀୟ କାର୍ଯ୍ୟରେ ସାମିଲ ରହିବାର ଅବଦାନକୁ ମିଳିଛି ନୂଆ ସ୍ୱୀକୃତି। କୋରାପୁଟ ପୌରପାଳିକା ଯୁବ ବିଜୁ ଜନତା ଦଳର ସଭାପତି ଭାବେ ଅମିତ କୁମାର ଖୋସଲାଙ୍କୁ ନୂତନ ଦାୟିତ୍ୱ ମିଳିଛି। ଦୀର୍ଘଦିନ ଧରି ବିଜେଡି ସହ ଜଡ଼ିତ ରହି ଯୁବକ ଓ ଯୁବତୀମାନଙ୍କୁ ସାଥୀ କରି ସଂଗଠନ ପାଇଁ କାର୍ଯ୍ୟ କରିଆସୁଥିବା ଅମିତ ଜଣେ ସକ୍ରିୟ ଯୁବ ସଂଗଠକ ଭାବେ ପରିଚିତ। ଦଳୀୟ କାର୍ଯ୍ୟକ୍ରମରେ ତାଙ୍କର ନିରନ୍ତର ସଂପୃକ୍ତି ଓ ଯୁବପିଢ଼ିଙ୍କୁ ଏକାଠି କରିବାର ପ୍ରୟାସ ତାଙ୍କୁ ଏହି ଦାୟିତ୍ୱ ପାଇଁ ଚର୍ଚ୍ଚାକୁ ଆଣିଛି। ଯୁବପିଢ଼ିଙ୍କୁ ଦଳୀୟ ସଂଗଠନରେ ଉପଯୁକ୍ତ ସୁଯୋଗ ଓ ଦାୟିତ୍ୱ ମିଳିଲେ ସେମାନେ ଅଧିକ ଉତ୍ସାହର ସହ କାମ କରିପାରିବେ। ଅମିତଙ୍କ ନିଯୁକ୍ତି ଆଗାମୀ ଦିନରେ କୋରାପୁଟ ସହରରେ ଯୁବ ବିଜେଡି ସଂଗଠନକୁ ନୂଆ ଉତ୍ସାହ ଦେବା ସହ ନୂତନ ଯୁବପିଢ଼ିଙ୍କୁ ଦଳ ସହ ଯୋଡ଼ିବାରେ ସହାୟକ ହେବ ବୋଲି ଆଶା ପ୍ରକାଶ ପାଇଛି। ଏହି ନିଯୁକ୍ତି ପରେ ଦଳର ସଭାପତି, ପୂର୍ବତନ ବିଧାୟକ, ମହିଳା ସଭାନେତ୍ରୀ, ବ୍ଲକ ସଭାପତି ଓ ଜିଲ୍ଲା ଯୁବ ସଭାପତିଙ୍କ ସମେତ ବହୁ ବିଜେଡି ନେତା ଓ କର୍ମୀ ଅମିତଙ୍କୁ ଶୁଭେଚ୍ଛା ଜଣାଇଛନ୍ତି। ନୂଆ ଦାୟିତ୍ୱକୁ ସେ କିଭଳି ଭାବେ ତୁଲାଉଛନ୍ତି ଏବଂ ଯୁବ ସଂଗଠନକୁ କେତେ ଆଗକୁ ନେଉଛନ୍ତି, ତାହା ଏବେ ଦଳୀୟ ମହଲରେ ଆଗ୍ରହର ବିଷୟ ହୋଇଛି।
