ଓଡ଼ିଆ ବାର୍ତ୍ତା/ ଇସଲାମାବାଦ: ଇଂରେଜ ସମୟରେ ତିଆରି ହୋଇଥିବା ଦେଶଦ୍ରୋହ ଆଇନକୁ ରଦ୍ଦ କରିଛି ପାକିସ୍ତାନ। ପାକିସ୍ତାନ କୋର୍ଟ ବ୍ରିଟିଶ ଯୁଗର ଏହି ଆଇନକୁ ରଦ୍ଦ କରି ଏହାକୁ ଅସାମ୍ବିଧାନିକ ବୋଲି ଘୋଷଣା କରିଛନ୍ତି। ଏହି ଆଇନକୁ ରଦ୍ଦ କରିବାକୁ ଆବେଦନ କରାଯାଇଥିଲା। ଲାହୋର ହାଇକୋର୍ଟର ଜଷ୍ଟିସ ସହିଦ କରିମ ଜଣେ ଆବେଦନକାରୀ ହାରୁନ ଫାରୁକଙ୍କ ଆବେଦେନର ଶୁଣାଣି କରି ଦେଶଦ୍ରୋହ ସମ୍ପର୍କରେ ପାକିସ୍ତାନ ପେନାଲ କୋଡ (ପିପିସି) ର ଧାରା ୧୨୪-ଏକୁ ରଦ୍ଦ କରିଛନ୍ତି।
ଏହା ସହ କୋର୍ଟ କହିଛନ୍ତି ଯେ ଏହି ଆଇନ ପାକିସ୍ତାନର ସମ୍ବିଧାନ ଅନୁଯାୟୀ ନୁହେଁ। ଏହି ନିୟମ ହେତୁ ପାକିସ୍ତାନ ସରକାର କିମ୍ବା ଏହାର ରାଜ୍ୟର ସରକାରଙ୍କୁ ସମାଲୋଚନା କରିବା ଅପରାଧ ବୋଲି ବିବେଚନା କରାଯାଉଥିଲା। ଭାରତରେ ମଧ୍ୟ ଏପରି ଏକ ନିୟମ ରହିଛି, ଯାହାର ଅପବ୍ୟବହାର ସମୟ ସମୟରେ ହେଉଥିବାର ଅଭିଯୋଗ ରହିଛି।
ଭାରତରେ ମଧ୍ୟ ଭାରତୀୟ ଦଣ୍ଡ ସଂହିତା (ଆଇପିସି) ର ଧାରା ୧୨୪-ଏ ଦେଶଦ୍ରୋହ ସମ୍ପର୍କିତ ଆଇନକୁ ବୁଝାଏ। ଏହି ଆଇନ ଅନୁଯାୟୀ, ଯଦି ଜଣେ ବ୍ୟକ୍ତି ସରକାରୀ ବିରୋଧୀ କିଛି ଲେଖନ୍ତି କିମ୍ବା କଥାବାର୍ତ୍ତା କରନ୍ତି, ଏପରି ପ୍ରସଙ୍ଗକୁ ସମର୍ଥନ କରନ୍ତି ଯାହା ଜାତୀୟ ପ୍ରତୀକକୁ ଅପମାନିତ କରୁଥିବ ଏବଂ ସମ୍ବିଧାନକୁ ନିଚା ଦେଖାଇବାକୁ ଚେଷ୍ଟା କରୁଥିବ ତେବେ ଏହା ଦେଶଦ୍ରୋହ ବୋଲି ସରକାରୀ ଭାଷାରେ କୁହାଯାଏ। ଏହା ବ୍ୟତୀତ, ଯଦି ଜଣେ ବ୍ୟକ୍ତି ଅଜାଣତରେ ଜାତୀୟ ବିରୋଧୀ ସଂଗଠନ ବିରୁଦ୍ଧରେ ସମ୍ପର୍କ କରନ୍ତି କିମ୍ବା କୌଣସି ପ୍ରକାରେ ସହଯୋଗ କରନ୍ତି, ତେବେ ସେ ମଧ୍ୟ ଦେଶଦ୍ରୋହର ଅଧୀନରେ ଆସନ୍ତି।
ବ୍ରିଟେନରେ ଏହାକୁ ୨୦୦୯ ରେ ରଦ୍ଦ କରାଯାଇଥିଲା। ବର୍ତ୍ତମାନ ଏହାକୁ ପାକିସ୍ତାନର ଲାହୋର ହାଇକୋର୍ଟ ରଦ୍ଦ କରିଛନ୍ତି। ତେଣୁ ଭାରତ ଏବେ ଦେଶଦ୍ରୋହ ନିୟମକୁ ହଟାଇବ କି ବୋଲି ପ୍ରଶ୍ନ ଉଠିଛି।
ଉଲ୍ଲେଖଯୋଗ୍ୟ, ଜୁଲାଇ ୨୦୨୧ରେ ତତ୍କାଳୀନ ପ୍ରଧାନ ବିଚାରପତି ଏନ.ଭି ରମନ୍ନା ଏହି ପ୍ରସଙ୍ଗରେ କହିଥିଲେ ଯେ ସ୍ୱାଧୀନତାର ୭୫ ବର୍ଷ ପରେ ମଧ୍ୟ ଦେଶଦ୍ରୋହ ଆଇନ କାହିଁକି ଆବଶ୍ୟକ? ସେ କହିଥିଲେ ଯେ ସ୍ୱାଧୀନତା ସଂଗ୍ରାମକୁ ଦମନ କରିବା ପାଇଁ ବ୍ରିଟିଶମାନେ ଏହି ଆଇନ ଆଣିଛନ୍ତି। ସେତେବେଳେ ଆଟର୍ଣ୍ଣି ଜେନେରାଲ କେ.କେ ଭେନୁଗୋପାଲ ଏହାକୁ ରଦ୍ଦ କରିବା ପରିବର୍ତ୍ତେ ଦେଶଦ୍ରୋହ ଆଇନ ପାଇଁ ନିର୍ଦ୍ଦେଶାବଳୀ ପ୍ରସ୍ତୁତ କରିବାକୁ ଜିଦ ଧରିଥିଲେ।
ଆଇନ ମନ୍ତ୍ରୀ କିରଣ ରିଜିଜୁ କହିଥିଲେ ଯେ ବର୍ତ୍ତମାନର ପ୍ରାସଙ୍ଗିକତାକୁ ଦୃଷ୍ଟିରେ ରଖି ସରକାର ଏହି ଆଇନରେ ସଂଶୋଧନ କରିବେ। ସର୍ବୋପରି ଦେଶର ସାର୍ବଭୈମତ୍ୱ ଏବଂ ଅଖଣ୍ଡତାକୁ ଉଲ୍ଲେଖ କରି ସେ କହିଥିଲେ ଯେ ସମସ୍ତ ବ୍ୟବସ୍ଥାକୁ ଦୃଷ୍ଟିରେ ରଖି ଦେଶଦ୍ରୋହ ଆଇନର ପୁନର୍ବିଚାର କରାଯିବ। ଏହି ଆଇନ ସମ୍ବନ୍ଧରେ ସରକାରଙ୍କ ଆଭିମୁଖ୍ୟ ଆଇନ ମନ୍ତ୍ରୀଙ୍କ କଥାରୁ ଆକଳନ କରାଯାଇପାରିବ। ସେଥିପାଇଁ ଏହା କୁହାଯାଇପାରେ ଯେ ବର୍ତ୍ତମାନ ଏହି ଆଇନ ଭାରତରେ ସମ୍ପୂର୍ଣ୍ଣ ରୂପେ ରଦ୍ଦ ହେବ ନାହିଁ।
