ଓଡ଼ିଆ ବାର୍ତ୍ତା/ କଳାହାଣ୍ଡି (ନିଲେଶ କୁମାର ନାଗ): କୋଣାର୍କ ସ୍ପିନିଙ୍ଗ୍ ମିଲ ଓ ଜିନିଙ୍ଗ୍ ମିଲର ପୁନଃଉଦ୍ଧାର ପାଇଁ ସାଇନିଙ୍ଗ୍ କଳାହାଣ୍ଡିର ଅଧ୍ୟକ୍ଷ ଡ଼. ଭବାନୀ ଶଙ୍କର ନିଆଲଙ୍କ ଦ୍ୱାରା ଆଜି ଜିଲ୍ଲାପାଳ ପି. ଅନ୍ଵେଷା ରେଡ୍ଡୀଙ୍କ ଜରିଆରେ ମାନ୍ୟବର ମୁଖ୍ୟମନ୍ତ୍ରୀ ଓଡିଶା ସରକାର ନବୀନ ପଟ୍ଟନାୟକଙ୍କୁ ସ୍ମାରକ ପତ୍ର ଦିଆଯାଇଛି। ଆଉ ଏହାର ପ୍ରତିଲିପି ଜିଲ୍ଲାର ମାନ୍ୟବର ସାଂସଦ ଓ ବିଧାୟକ, ମୁଖ୍ୟ ଶାସନ ସଚିବ, କୃଷି ଓ ବୟନଶିଳ୍ପ ପ୍ରମୁଖ ଶାସନ ସଚିବଙ୍କୁ ଦିଆଯାଇଛି। ସୂଚନା ଯୋଗ୍ୟ ଯେ, କେସିଙ୍ଗାର କୋଣାର୍କ ସ୍ପିନିଙ୍ଗ୍ ଓ ଜିନିଙ୍ଗ୍ ମିଲ ବର୍ତ୍ତମାନ କାର୍ଯ୍ୟକାରୀ ଅବସ୍ଥାରେ ଅଛି କିନ୍ତୁ ଏହାର ପୁନଃଉଦ୍ଧାର ଅତ୍ୟନ୍ତ ଆବଶ୍ୟକତା ପଡୁଛି। ଗତ ଜିଲ୍ଲାପାଳ ଜିନିଙ୍ଗ୍ ମିଲକୁ ଚଲେଇବା ପାଇଁ ପାଖାପାଖି ଦେଢକୋଟି ଆର୍ଥିକ ଅନୁଦାନ ଦେବାପାଇଁ ରାଜ୍ୟ ସରକାରଙ୍କୁ ନିବେଦନ କରିଥିଲେ ଏବଂ ସ୍ପିନିଙ୍ଗ୍ ମିଲକୁ ଚାଲୁ କରିବାପାଇଁ ପାଖାପାଖି ୫୦ କୋଟି ଟଙ୍କାର ବ୍ୟୟବରାଦର ଆବଶ୍ୟକତା ରହୁଛି। ଯଦି ଏହି ଆର୍ଥିକ ଆବଣ୍ଟନ ସ୍ପିନିଙ୍ଗ୍ ମିଲ ଓ ଜିନିଙ୍ଗ୍ ମିଲ ପାଇଁ କରାଯାଏ ତାହେଲେ ନିଶ୍ଚିତ ଭାବରେ କଳାହାଣ୍ଡି, ନୂଆପଡା, ବଲାଙ୍ଗୀର, ରାୟଗଡା ଏବଂ ନବରଙ୍ଗପୁର ଜିଲ୍ଲାର ଚାଷୀ ଏଠି ଉପକୃତ ହେବା ସଙ୍ଗେ ସଙ୍ଗେ ବାର୍ଷିକ ୪୦ ହଜାର କର୍ମସଂସ୍ଥାନ ଯୋଗାଇବାରେ ସକ୍ଷମ ହେଇପାରିବ ଏହି ସ୍ପିନିଙ୍ଗ୍ ମିଲ ଓ ଜିନିଙ୍ଗ୍ ମିଲ। ଏଣୁ ରାଜ୍ୟସରକାରଙ୍କୁ ଏକ ସ୍ମାରକ ପତ୍ର ଜରିଆରେ ସାଇନିଙ୍ଗ୍ କଳାହାଣ୍ଡିର ଅଧ୍ୟକ୍ଷ ଡ଼. ଭବାନୀ ଶଙ୍କର ନିଆଲ ମାନ୍ୟବର ମୁଖ୍ୟମନ୍ତ୍ରୀଙ୍କୁ ଜିଲ୍ଲାପାଳଙ୍କର ଜରିଆରେ ଏକ ସ୍ମାରକ ପତ୍ର ଦେଇ ନିବେଦନ ଜଣାଇଛନ୍ତି। ସୂଚନା ଯୋଗ୍ୟ ଯେ, ଏହି ବିଷୟ ଉପରେ ଗତ ୨୦୧୫ ରୁ ସାଇନିଙ୍ଗ୍ କଳାହାଣ୍ଡି ତରଫରୁ ଲଗାତାର ଭାବରେ ମାନ୍ୟବର ମୁଖ୍ୟମନ୍ତ୍ରୀ ତଥା ରାଜ୍ୟ ସରକାରଙ୍କର ଦୃଷ୍ଟି ଆକର୍ଷଣ କରାଯାଉଅଛି। ତଥା ବିଭିନ୍ନ ଜନସଂଗଠନ, ରାଜନୈତିକ ସଂଗଠନ ଏବଂ ସାମାଜିକ ସଂଗଠନ ମାନେ ଏହା ଉପରେ ରାଜ୍ୟ ସରକାରଙ୍କୁ ବହୁ ଆଗରୁ ଏହାର ପୁନଃଉଦ୍ଧାର ପ୍ରକ୍ରିୟାକୁ ଆରମ୍ଭ କରିବାପାଇଁ ନିବେଦନ ଜଣାଇଛନ୍ତି।
