ଓଡ଼ିଆ ବାର୍ତ୍ତା/ ସୁବର୍ଣ୍ଣପୁର ( ରାଜ କିଶୋର ତ୍ରିପାଠୀ ): ରାଜ୍ୟ ସରକାରଙ୍କ ନିର୍ଦ୍ଦେଶ କ୍ରମେ ସୋନପୁର ପୌରାଞ୍ଚଳରେ ଥିବା ହୋଟେଲ, ରେଷ୍ଟୁରାଣ୍ଟ ଏବଂ ଠେଲା ମାନଙ୍କ ରେ ଖାଦ୍ୟ ନିରାପତ୍ତା ଅଧିକାରୀ ଓ ସ୍ଵତନ୍ତ୍ର ଟିମ ଚଢ଼ାଉ କରିଥିଲେ l ଜିଲ୍ଲା ମୁଖ୍ୟ ଚିକିତ୍ସା ଓ ଜନସ୍ୱାସ୍ଥ୍ୟ ଅଧିକାରୀ ଡା. ପ୍ରଦୀପ କୁମାର ହୋତାଙ୍କ ନିର୍ଦେଶ କ୍ରମେ ଆଜି ଦିବା ୧୧ ଟା ରୁ ସନ୍ଧ୍ୟା ପର୍ଯ୍ୟନ୍ତ ସମସ୍ତ ହୋଟେଲ ରେଷ୍ଟୁରାଣ୍ଟ ମାନଙ୍କରେ ଖାଦ୍ୟ ନିରାପତ୍ତା ଅଧିକାରୀ ଓ ତାଙ୍କ ଟିମର ଚଢ଼ାଉ ଜାରି ରହିଥିଲା l ମୋଟ ୨୭ ଗୋଟି ଦୋକାନରେ ଖାଦ୍ୟର ମାନ ଯାଞ୍ଚ କରିବା ସହ ପାଣିର ନମୁନା ସଂଗ୍ରହ କରି ପରୀକ୍ଷା ପାଇଁ ପଠାଯାଇଛି l ବିଶେଷ କରି ବର୍ତ୍ତମାନ ପରସ୍ଥିତିରେ ତରଳ ଝାଡା ରୋଗ ବ୍ୟାପିବାର ସମ୍ଭାବନା ଥିବାରୁ ଓ ଯାନିଯାତ୍ରା ଲାଗି ରହୁଥିବାରୁ ଲୋକ ଭିଡରେ ସମସ୍ତଙ୍କୁ ବିଶୁଦ୍ଧ ପାନୀୟ ତଥା ତଟକା ଖାଦ୍ୟ ସବୁ ଦେବାକୁ କଡା ନିର୍ଦେଶ ଦିଆଯାଇଥିଲା । ଉକ୍ତ ଟିମରେ ଖାଦ୍ୟ ନିରାପତ୍ତା ଅଧିକାରୀ ସସ୍ମିତା ନାଏକ, ସ୍ୱାସ୍ଥ୍ୟ ପରିଦର୍ଶକ ପ୍ରମୋଦ କୁମାର ସାହୁ, ରାଜୀବ ପଧାନ ଙ୍କ ସହ ପୋଲିସ ଟିମ ସବୁ ସାମିଲ ଥିଲେ । ଚଢ଼ାଉ ବେଳେ ବାସି ଖାଦ୍ୟ ସବୁ ନଷ୍ଟ କରାଯାଇଥିଲା I ଦୂଷିତ ଖାଦ୍ୟ ଓ ପାନୀୟ ଲୋକଙ୍କୁ ନଦେବା ପାଇଁ ତାଗିଦ କରାଯିବା ଓ ଯିଏ ଏହାର ଖିଲାପ କରେ ତାଙ୍କୁ ଉଚିତ ଦଣ୍ଡ ଦିଆଯିଵ ବୋଲି ଦୋକାନୀଙ୍କୁ ସତର୍କ କରାଯାଇଥିଲା । ପ୍ରକାଶ ଥାଉ କି ପୂର୍ବରୁ ଜିଲ୍ଲାର ଉଲୁଣ୍ଡା, ତରଭା ଡୁଙ୍ଗୁରିପାଲି ସହରରେ ମଧ୍ୟ ଏହି ଟିମ ଦ୍ୱାରା ଚଢ଼ାଉ କରି ଖାଦ୍ୟ ର ମାନ ଯାଞ୍ଚ କରାଯାଇଛି l ଆଗକୁ ଜିଲ୍ଲା ର ବିଭିନ୍ନ ସହର ରେ ଅଚାନକ ଚଢ଼ାଉ କରାଯିବ ବୋଲି ଜିଲ୍ଲା ସ୍ଵାସ୍ଥ୍ୟ ବିଭାଗ ପକ୍ଷରୁ ସୂଚନା ମିଳିଛି l
