ଭବାନୀପାଟଣାରେ ଖୋଲା ଆଲୋଚନା ‘କଳାହାଣ୍ଡିର କୃଷି ଓ କୃଷକ’

ଓଡ଼ିଆ ବାର୍ତ୍ତା/ କଳାହାଣ୍ଡି (ଲିଙ୍ଗରାଜ ମିଶ୍ର): ଅତିତର ଆଟବିକ ବିଦ୍ୟାଧର ରାଜ୍ୟ, କାନ୍ତାର, ମହାକାନ୍ତାର, ଇନ୍ଦ୍ରବଣ ଆଦି ବିଭିନ୍ନ ନାମରେ ନାମିତ ‘କଳାହାଣ୍ଡି’ର ଐତିହ୍ୟ ପରମ୍ପରା ପରି କୃଷି ପରମ୍ପରା ମଧ୍ୟ ଅତି ପ୍ରାଚୀନ। କଳାହାଣ୍ଡି ଥିଲା ଚାଷୀର ଗଡ଼। ଆଦି ସଂସ୍କୃତି ସମୟରୁ ଏହି ମାଟିର କୃଷି ପରମ୍ପରା ବିଶ୍ବ କୃଷି ସଭ୍ୟତାକୁ ନୂତନ ଦିଗଦର୍ଶନ ଦେଇଛି। ସମୟ ବଦଳିବା ସହ କୃଷି ପଦ୍ଧତି ଓ ପରିସରର ସଂଜ୍ଞା ମଧ୍ୟ ବଦଳିଛି। ବର୍ତ୍ତମାନର ସମୟରେ ପ୍ରତ୍ୟକ ଜମିକୁ ଜଳସେଚନ, ଅତ୍ୟାଧୁନିକ ଜ୍ଞାନ କୌଶଳର ପ୍ରୟୋଗ ସହ ମାସ୍ କ୍ରପର ବିଶେଷ ଆବଶ୍ୟକତା ରହିଛି। କୃଷି କ୍ଷେତ୍ର ତଥା କୃଷକକଙ୍କ ଅନେକ ସମସ୍ୟା ରହିଛି। ବର୍ତ୍ତମାନର ସମୟରେ କଳାହାଣ୍ଡିଆ ଚାଷୀ ଅଧିକ ଶଶକ୍ତ ହେବାର ଆବଶ୍ୟକତା ରହିଛି। ଏଥିପାଇଁ ସୁଚିନ୍ତିତ ଯୋଜନା ପ୍ରଣୟନ ଓ କାର୍ଯ୍ୟକାରୀ ଜରୁରୀ। ଜିଲ୍ଲାର ହଜାର ହଜାର ହେକ୍ଟର ଚାଷଜମିକୁ ଜଳସେଚନ ହୋଇ ପାରିନାହିଁ। ଆଜି ବି କଳାହାଣ୍ଡିର ଧାନଚାଷ ଇନ୍ଦ୍ର ଓ ଇନ୍ଦ୍ରାବତୀ ଭରସାରେ ଚାଲିଛି। ତେଣୁ କଳାହାଣ୍ଡିରେ ବଡ଼ ଧରଣର କୃଷିଭିତ୍ତିକ ଇଣ୍ଡଷ୍ଟ୍ରି ସ୍ଥାପନର ଆବଶ୍ୟକତା ଅଛି ବୋଲି ଭବାନୀପାଟଣା ସ୍ଥିତ ଏସ.ଏନ ରେସିଡେନସି ଠାରେ ଆୟୋଜିତ ‘କଳାହାଣ୍ଡିର କୃଷି ଓ କୃଷକ’ ଖୋଲା ଆଲୋଚନାରେ ମତ ପ୍ରକାଶ ପାଇଛି। ଏହାସହ କଳାହାଣ୍ଡିରେ କୃଷି ବିଶ୍ଵବିଦ୍ୟାଳୟ ସ୍ଥାପନ ପାଇଁ ଏହି ଆଲୋଚନା ଚକ୍ରରେ ଦାବି ଉଠିଛି। ଓଡ଼ିଶା ସାମ୍ବାଦିକ ୟୁନିଅନ (ଓୟୁଜେ)ର ରାଜ୍ୟ ସାଧାରଣ ସମ୍ପାଦକ କମ୍ବୁପାଣି ମିଶ୍ରଙ୍କ ଅଧ୍ୟକ୍ଷତାରେ ଏନେଇ ଆୟୋଜିତ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ କଳାହାଣ୍ଡି ଜିଲ୍ଲା ପରିଷଦ ଅଧ୍ୟକ୍ଷ ପୁଷ୍ପେନ୍ଦ୍ର ସିଂହଦେଓ, ମୁଖ୍ୟ ବକ୍ତା ଭାବେ ବରିଷ୍ଠ ସାମ୍ବାଦିକ ଉମାଶଙ୍କର କର, ସମ୍ମାନିତ ଅତିଥି ଭାବେ ଜୁନାଗଡ଼ ବିଧାୟକ କ୍ୟାପଟେନ ଦିବ୍ୟ ଶଙ୍କର ମିଶ୍ର, କଳାହାଣ୍ଡି-ନୂଆପଡା କେନ୍ଦ୍ର ସମବାୟ ବ୍ୟାଙ୍କ ସଭାପତି ଗିରିଶ ଚନ୍ଦ୍ର ବେହେରା, ବରିଷ୍ଠ ସାମ୍ବାଦିକ ସ୍ବାଧିନ ପାତ୍ର ଓ ଶାନ୍ତୁନୁ କୁମାର ବେହେରା, ସଫଳ ଚାଷୀ ପ୍ରଶାନ୍ତ ପଟ୍ଟଯୋଶୀ, ଦିପ୍ତି ରଞ୍ଜନ ପ୍ରହରାଜ ଏବଂ କୃଷ୍ଣଚନ୍ଦ୍ର ନାଗ, ବରିଷ୍ଠ ସାମ୍ବାଦିକ ସୁଶାନ୍ତ ମହାପାତ୍ର ପ୍ରମୁଖ ମଞ୍ଚାସୀନ ରହି କଳାହାଣ୍ଡିର କୃଷି ଓ କୃଷକ ଉପରେ ଦିଗଦର୍ଶନ ଦେବା ସହ ଏହାର ସମାଧାନ ଉପରେ ପୁଙ୍ଖାନୁପୁଙ୍ଖ ଭାବେ ଆଲୋଚନା କରିଥିଲେ। ସାମ୍ବାଦିକ ହେମନ୍ତ ସାହୁ ମଞ୍ଚ ପରିଚାଳନା କରିଥିଲେ। ଏହି ଆଲୋଚନା ଚକ୍ରରେ ଅନ୍ୟମାନଙ୍କ ମଧ୍ୟରେ ଜିଲ୍ଲାର ଜଣେ ସଫଳ ଚାଷୀ ତଥା ସାମ୍ବାଦିକ ଇଙ୍ଗିତ ପଣ୍ଡା, ସଙ୍ଗୀତ ନାଟକ ଏକାଡେମୀର ପୂର୍ବ ସଚିବ ପ୍ରବୋଧ ରଥ, ବରିଷ୍ଠ ସାମ୍ବାଦିକ ବିରଞ୍ଚି ନାରାୟଣ ଜାଲ, ଲାଞ୍ଜିଗଡ଼ର ସାମ୍ବାଦିକ ସୁଶିଲ କୁମାର ବାଗ ପ୍ରମୁଖ ନିଜ ନିଜର ସୁଚିନ୍ତିତ ମତ ପ୍ରକାଶ କରିଥିଲେ। ଜିଲ୍ଲାର କୋଣ ଅନୁକୋଣରୁ କୃଷକ, ବୁଦ୍ଧିଜୀବୀ ଓ ସାମ୍ବାଦିକମାନେ ଉପସ୍ଥିତ ଥିଲେ। ଶେଷରେ ବରିଷ୍ଠ ସାମ୍ବାଦିକ ପ୍ରଶାନ୍ତ ସାମନ୍ତରା ଧନ୍ୟବାଦ ଅର୍ପଣ କରିଥିଲେ।