ପୁଣି ଦାଦନ ଖଟି ଯାଉଛନ୍ତିି ଶ୍ରମିକ

ଦାଦନ ସମସ୍ୟା ରୋକିବାରେ ବିଫଳ ସରକାର

ଓଡ଼ିଆ ବାର୍ତ୍ତା/ କଳାହାଣ୍ଡି (ଲିଙ୍ଗରାଜ ମିଶ୍ର): କରୋନା ଆତଙ୍କ ଯୋଗୁଁ ଲକଡାଉନ ସ୍ଥିତିରେ ସମସ୍ତ କଳକାରଖାନା ବନ୍ଦ ହୋଇ ପଡିବା ଫଳରେ ରୋଜଗାର ହରାଇ ବାହାର ରାଜ୍ୟରେ ହନ୍ତସନ୍ତ ହୋଇଥିଲେ ଓଡିଶାରୁ ଦାଦନ ଖଟିଯାଇଥିବା ଓଡିଆ ଶ୍ରମିକ । ଲକଡାଉନ ପରିସ୍ଥିତିରେ ଗରିବ ଶ୍ରମିକ ମାନଙ୍କ ଜୀବନ ମରଣ ସମସ୍ୟା ଉପଲବ୍ଧ କରି ପ୍ରବାସୀ ଓଡିଆଙ୍କୁ ରାଜ୍ୟକୁ ସରକାରୀ ଖର୍ଚ୍ଚରେ ଫେରାଇ ଆଣିଥିଲେ ରାଜ୍ୟ ସରକାର । ହଜାର ହଜାର ସଂଖ୍ୟାରେ ପ୍ରବାସୀ ଓଡିଆ ରାଜ୍ୟକୁ ଫେରିଥିଲେ । ଏହି କ୍ରମରେ କଳାହାଣ୍ଡି ଜିଲ୍ଲାକୁ ମଧ୍ୟ ହଜାର ହଜାର ଶ୍ରମିକ ଫେରିଥିଲେ । ଯେଉଁ ଦାଦନ ଶ୍ରମିକ ମାନେ ଫେରି ପାରିନଥିଲେ । ସେମାନେ ପଶ୍ଚିମ ଓଡିଶାର ପ୍ରମୁଖ ଗଣପର୍ବ ନୂଆଖାଇ ସମୟରେ ଫେରିଥିଲେ ଘରକୁ । କରୋନା ଆଶଙ୍କା ଯୋଗୁଁ ସଙ୍ଗରୋଧରେ ମଧ୍ୟ ରହିଥିଲେ । ଦାଦନ ଶ୍ରମିକଙ୍କ ପାଇଁ କରୋନା କାଳ ବୋଲି ନୁହଁ ସବୁ ସମୟରେ ବିଭିନ୍ନ ସମସ୍ୟାକୁ ନେଇ ରାଜ୍ୟ ସରକାରଙ୍କ ମୁଣ୍ଡବ୍ୟଥା ହୋଇଥାଏ ।
ସରକାରଙ୍କର ମାଗଣାରେ ଚାଉଳ, ଡାଲି ସାଙ୍ଗକୁ ଭତ୍ତା ଟଙ୍କା ମଧ୍ୟ ପ୍ରଦାନ କରୁଛନ୍ତି । ଶ୍ରମିକ ବାହାର ରାଜ୍ୟକୁ ଦାଦନ ଖଟି ନଯାଆନ୍ତୁ ତେଣୁ ମନରେଗାରେ କାମ ଯୋଗାଇ ଦେଉଛନ୍ତି । ହେଲେ ମଧ୍ୟ ଦାଦନ ସମସ୍ୟା କମିବାର ନାଁ ଧରୁନି ନର୍ଲା ଅଞ୍ଚଳରୁ । ନର୍ଲା ଏକ ଅଣ ଜଳସେଚିତ ଅଞ୍ଚଳ ହୋଇଥିବା ବେଳେ ବ୍ଲକ ଅଞ୍ଚଳର କାଁ ଭାଁ କେତେକ ଗାଁକୁ ଛାଡିଦେଲେ ପ୍ରାୟତ ଏଇଠି କେବଳ ଖରିଫ ଚାଷ ହିଁ ଅମଳ ହୋଇଥାଏ । ଏହାପରେ କେତେକ ଅଞ୍ଚଳ ସେହି ଧାନ ବିଲରେ ହିଁ ମୁଗ ଚାଷ କରିଥାନ୍ତି । ମୁଗ ଚାଷ ସମୟରେ ବର୍ଷା ଟିକେ ହେଲା ତ ମୁଗ ଫସଲ ଭଲ ହୋଇଥାଏ ନହେଲେ ସେମିତି ଯାହିତାହି ଭାବରେ ଚାଷୀ ମୁଗ ପାଇଥାନ୍ତି । କେତେକ ଢିପ ଅଞ୍ଚଳର ଚାଷ ଜମିରେ ଅର୍ଥକାରୀ ଫସଲ କପା ମଧ୍ୟ ଅମଳ ହୋଇଥାଏ ନର୍ଲା ଅଞ୍ଚଳରେ । ହେଲେ ଏବେ ଧାନ ଅମଳ ସରିଯାଇଥିବାରୁ ଆଉ ଚାଷୀଙ୍କୁ ଶ୍ରମିକର ଆବଶ୍ୟକତା ପଡୁନି । ଏମିତିରେ ବି ଚାଷ ସମୟରେ ବିଲର ୮୦ ପ୍ରତିଶତ କାମ ମେସିନ ଯୋଗେ କରୁଛନ୍ତି ଚାଷୀ । ଯାହା ଏଇଠି ଉନ୍ନୟନ କାମ ପାଇଁ ଶ୍ରମିକଙ୍କ ଆବଶ୍ୟକତା ପଡିଥାଏ । ନର୍ଲାରେ ମନରେଗା ଯୋଜନା ବାଟବଣା ହୋଇପଡିଥିବା ବେଳେ ଧାନ ଓ କପା ଅମଳ ସରିଯାଇଛି । କାମ ଧନ୍ଦା ଅନ୍ୱେଷଣରେ ଶ୍ରମିକ ମାନେ ବାହାର ରାଜ୍ୟକୁ ଯିବା ଆରମ୍ଭ କଲେଣି । ପ୍ରଶାସନ ଦାଦନ ସମସ୍ୟାକୁ ବିଭିନ୍ନ ଉପାୟରେ ରୋକିବା ପାଇଁ ଚେଷ୍ଟା ଜାରି ରଖିଥିଲେ ମଧ୍ୟ ଏଥିରେ ବିଫଳ ହେଉଥିବା ଦେଖିବାକୁ ମିଳୁଛି । ବସ ଯୋଗେ ନର୍ଲା ନିର୍ବାଚନ ମଣ୍ଡଳୀ ଅଞ୍ଚଳରୁ ଶହ ଶହ ଶ୍ରମିକ ଏପଟେ ଗୁଜୁରାଟ ରାଜ୍ୟ ଓ ସେପଟେ ଦକ୍ଷୀଣ ଭାରତର ତାମିଲନାଡୁ, ଆନ୍ଧ୍ରପ୍ରଦେଶ ଓ କେରଳ ରାଜ୍ୟ ମୁହାଁ ହେଉଥିବା ଦେଖିବାକୁ ମିଳୁଛି । ବିଶେଷ କରି ନର୍ଲା ତଥା ନର୍ଲା ନିର୍ବାଚନ ମଣ୍ଡଳୀର କର୍ଲାମୁଣ୍ଡା, ରିଷିଡା, ମ.ରାମପୁର, ସେରଗଡ, ପଲମ, ଲାଞ୍ଜିଗଡ, କେସିଙ୍ଗା ପ୍ରଭୃତି ସ୍ଥାନରୁ ପ୍ରତ୍ୟହ ଶହଶହ ଶ୍ରମିକ ଦାଦନ ଖଟିବା ପାଇଁ ବାହାର ରାଜ୍ୟକୁ ଯାଉଥିବା ଦେଖିବାକୁ ମିଳୁଛି । ପୁଣି ଆଗକୁ କରୋନା ବିପତ୍ତି ଭଳି ସମସ୍ୟା ନଉପୁଜୁ ଏଣୁ ସରକାର ସ୍ଥାନୀୟ ଶ୍ରମିକ ମାନଙ୍କ ପାଇଁ କର୍ମସଂସ୍ଥାନ ଯୋଗାଡ କରନ୍ତୁ । ଫଳରେ ସ୍ଥାନୀୟ ଶ୍ରମିକ ଦାଦନ ଖଟିବା ପାଇଁ ବାହାର ରାଜ୍ୟକୁ ଯିବେନାହିଁ ବୋଲି ବୁଦ୍ଧିଜୀବି ମାନେ ମତବ୍ୟକ୍ତ କରୁଛନ୍ତି