ଓଡିଆ ବାର୍ତ୍ତା/ କଳାହାଣ୍ଡି (ରଜତ ବଂଶଲ): ଓଡ଼ିଶା ରାଜ୍ୟ ରେଙ୍କିଙ୍ଗ ପାରା ବ୍ୟାଡମିଣ୍ଟନ ଟୁର୍ନାମେଣ୍ଟ ୨୦୨୪ ରେ ଏସ୍ଏଲ୍-୩ ବର୍ଗ ଜିତି କଳାହାଣ୍ଡିର ଆକାଶ ରଞ୍ଜନ ମୁଣ୍ଡ ରାଜ୍ୟ ପାଇଁ ଗୌରବ ଆଣିଛନ୍ତି। ଉଡ଼ାନ୍ ସ୍ପୋର୍ଟସ୍ ଏକାଡେମୀ ଭୁବନେଶ୍ୱର ଓ ରୋଟାରୀ କ୍ଲବ୍ ଅଫ୍ ଭୁବନେଶ୍ୱର ସହାୟତାରେ ଏହି କାର୍ଯ୍ୟକ୍ରମ ଆୟୋଜିତ ହୋଇଥିଲା। କ୍ରୀଡ଼ା ଜଗତର ଅନେକ ବିଶାଳ ବ୍ୟକ୍ତିତ୍ୱଙ୍କ ସମେତ ରୋଟାରୀ ଇଣ୍ଟରନେସନାଲ୍ ସଭାପତି କାର୍ଯ୍ୟକ୍ରମର ସଭାପତି ଗର୍ଡନ୍ ଆର୍ ମ୍ୟାକନେଲି, କାର୍ଯ୍ୟକ୍ରମର ସଭାପତି ରସାନନ୍ଦ ରାଉତ ଓ ସମ୍ପାଦକ ଅନାଦି ଚରଣ ସାହୁ ପ୍ରମୁଖ ଏଥିରେ ଉପସ୍ଥିତ ଥିଲେ। ବିଜୁ ପଟ୍ଟନାୟକ ପୁରସ୍କାର ପ୍ରାପ୍ତ ଶିବ ପ୍ରସାଦ ଦାସ କାର୍ଯ୍ୟକ୍ରମରେ ଯୋଗଦେଇ ଅନ୍ତର୍ଜାତୀୟ ସ୍ତରରେ ଉତ୍ତମ ପ୍ରଦର୍ଶନ ପାଇଁ ଆକାଶଙ୍କୁ ଅଧିକ କୋଚିଂର ଆବଶ୍ୟକତା ରହିଛି ବୋଲି ମତ ପ୍ରକାଶ କରିଥିଲେ। ପିଲାବେଳୁ ଆକାଶଙ୍କ ଗୋଡ଼ ନଥିବା ବେଳେ ସେ କୃତ୍ରିମ ଅଙ୍ଗ ବ୍ୟବହାର କରିଆସୁଛନ୍ତି। ନିଜ ପ୍ରଦର୍ଶନ ପାଇଁ ସେ ଟୋକିଓ ଅଲିମ୍ପିକ୍ସର ସ୍ୱର୍ଣ୍ଣ ପଦକ ବିଜେତା ପଦ୍ମଶ୍ରୀ ପ୍ରମୋଦ ଭଗତଙ୍କ ସମେତ ପ୍ରସିଦ୍ଧ ବ୍ୟକ୍ତିଙ୍କ ଠାରୁ ପ୍ରଶଂସିତ ହୋଇଛନ୍ତି। ଆକାଶଙ୍କ ବିଜୟ କେବଳ ତାଙ୍କ ପ୍ରତିଭାର ପ୍ରଦର୍ଶନ ନୁହେଁ, ବରଂ ଓଡିଶାରେ ପାରା-ଆଥଲେଟ୍ସମାନଙ୍କୁ ଉତ୍ସାହିତ କରିବା ସହ ଆଗକୁ ବଢ଼ିବାର ସୁଯୋଗ ସୃଷ୍ଟି କରିଛି। ସେ ଅନେକ ଭିନ୍ନକ୍ଷମ ଆଥଲେଟ୍ସମାନଙ୍କ ପାଇଁ ପ୍ରେରଣାର ଉତ୍ସ ସାଜିବା ସହ ସେମାନଙ୍କୁ ସଂଘର୍ଷ ପାଇଁ ପ୍ରେରଣା ଯୋଗାଇଛନ୍ତି। ଓଡ଼ିଶା ରାଜ୍ୟ ପାରା ବ୍ୟାଡମିଣ୍ଟନ୍ ଟୁର୍ନାମେଣ୍ଟ ୨୦୨୪ ମାଧ୍ୟମରେ ଆୟୋଜକ ଓ ସହଯୋଗୀମାନେ ଭିନ୍ନକ୍ଷମ କ୍ରୀଡାକୁ ପ୍ରୋତ୍ସାହିତ କରିବା ସହ କ୍ରୀଡ଼ାବିତମାନଙ୍କୁ ଉତ୍ସାହିତ କରିବାର ଏକ ସୁବର୍ଣ୍ଣ ସୁଯୋଗ ସୃଷ୍ଟି କରିଛନ୍ତି। ପରିବର୍ତ୍ତିତ କ୍ରୀଡା ଦୃଶ୍ୟପଟ୍ଟରେ ସମସ୍ତ ଦକ୍ଷତାର ଆଥଲେଟ୍ସମାନଙ୍କୁ ସୁଯୋଗ ଦେବା ସହ ବିବିଧତା ଓ ଅନ୍ତର୍ଭୂକ୍ତି ସହ ପରିଚିତ କରାଇବାରେ ଏଭଳି କାର୍ଯ୍ୟକ୍ରମର ଗୁରୁତ୍ୱପୂର୍ଣ୍ଣ ଭୂମିକା ଥିବାରୁ ତାହାକୁ କ୍ରୀଡ଼ା ମହଲରେ ସ୍ୱାଗତ କରାଯାଇଛି। ତେବେ ଏହି ଅବସରରେ ବୈଜ୍ଞାନିକ ଡ଼ ବିଜୟ କୁମାର ସାହୁ, ସାଂସଦ ସୁଜିତ କୁମାର, ପୂର୍ବତନ ନଗରପାଳ ମାଣିକ୍ୟ ଚାନ୍ଦ ଅଗ୍ରୱାଲ, ଲଡୁଗାଁ କଲେଜ ଅଧ୍ୟାପକ ସଂଜୟ କୁମାର ପୁରୋହିତ ପ୍ରମୂଖ ଶୁଭେଚ୍ଛା ଜ୍ଞାପନ କରିଛନ୍ତି।