ଓଡ଼ିଆ ବାର୍ତ୍ତା/ ବାଲେଶ୍ବର (କୃଷ୍ଣ କୁମାର ମହାନ୍ତି): ଫକୀରମୋହନ ବିଶ୍ୱବିଦ୍ୟାଳୟ ଏବଂ ଚଣ୍ଡିଗଡ଼ ସ୍ଥିତ ପ୍ରାଚୀନ କଳା କେନ୍ଦ୍ର ସହ ଏକ ବୁଝାମଣାପତ୍ର ସ୍ଵାକ୍ଷର ହୋଇଯାଇଛି। ବିଶ୍ୱବିଦ୍ୟାଳୟର କୁଳପତି ପ୍ରଫେସର ସନ୍ତୋଷ କୁମାର ତ୍ରିପାଠୀ, କୁଳସଚିବ କୁକୁମୀନା ଦାସ, ସ୍ନାତକ ପରିଷଦର ଅଧ୍ୟକ୍ଷ ପ୍ରଫେସର ଡକ୍ଟର ସୂର୍ଯ୍ୟେନ୍ଦୁ କୁମାର ଦେ ତଥା ବିଶ୍ଵବିଦ୍ୟାଳୟର ଭାଷା ଓ ସାହିତ୍ୟ ବିଭାଗର ମୁଖ୍ଯ ପ୍ରଫେସର ଦେବାଶିଷ ପାତ୍ର ଓ ଅନ୍ଯ ଅଧ୍ୟାପକ-ଅଧ୍ୟାପିକାମାନଙ୍କ ଉପସ୍ଥିତିରେ ଏହି ବୁଝାମଣାପତ୍ର ସ୍ବାକ୍ଷର କରାଯାଇଛି। ଏହି କାର୍ଯ୍ୟକ୍ରମରେ ପ୍ରାଚୀନ କଳା କେନ୍ଦ୍ରର ସେକ୍ରେଟେରୀ ଶ୍ରୀ ସଜ୍ଜଲ କୋସର ଓ ଓଡିଶା ଆଫେୟାର୍ସର ଇନଚାର୍ଜ ଶ୍ରୀ ବ୍ୟୋମକେଶ ଜେନା ଉପସ୍ଥିତ ହୋଇ ଦୁଇ ଅନୁଷ୍ଠାନ ମଧ୍ଯରେ, ଏକାଡେମିକ୍ କ୍ଷେତ୍ରରେ ସଂଗଠିତ କାର୍ଯ୍ୟକ୍ରମ ତଥା କାର୍ଯ୍ୟକଳାପର ବିକାଶକୁ ସମର୍ଥନ କରିବା ସହିତ ‘ପ୍ରଦର୍ଶନ ଏବଂ ଭିଜୁଆଲ୍ ଆର୍ଟ’ ଯାହା ମାଧ୍ୟମରେ ଛାତ୍ରବୃତ୍ତିକୁ ଆଗକୁ ନିଆଯାଇପାରିବ ସେ ସଂପର୍କରେ ଆଲୋଚନା କରିଥିଲେ। ଏଥିସହିତ ଏହି ବୁଝାମଣାପତ୍ର ଦ୍ବାରା ମିଳିତ ଅନୁସନ୍ଧାନ ପ୍ରକଳ୍ପ, ମିଳିତ ସମ୍ମିଳନୀ, କର୍ମଶାଳା, ସମ୍ମିଳନୀ, ସେମିନାର ଏବଂ ଭାରତୀୟ ଶାସ୍ତ୍ରୀୟ ସଙ୍ଗୀତ, ନୃତ୍ୟ ଏବଂ ଚିତ୍ରକଳା (ପେଣ୍ଟିଂ) କ୍ଷେତ୍ରରେ ତାଲିମ କାର୍ଯ୍ୟକ୍ରମ ଇତ୍ୟାଦି ଅନ୍ତର୍ଭୁକ୍ତ କରାଯିବାର ଉଦ୍ଦେଶ୍ଯ ରଖାଯାଇଛି। ପ୍ରଶିକ୍ଷଣ କାର୍ଯ୍ୟକ୍ରମଗୁଡ଼ିକ ପ୍ରତ୍ୟେକ ଏକାଡେମିକ୍ ଅଧିବେଶନ ଏକ ବର୍ଷିକିଆ ପାଠ୍ୟକ୍ରମ ରୂପେ ଆରମ୍ଭ ହେବ ଓ ପାଠ୍ୟକ୍ରମ ସମାପ୍ତି ଏକ ପରୀକ୍ଷା ମାଧ୍ୟମରେ କରାଯିବ। ଯୋଗ୍ୟତା ହାସଲ କରିଥିବା ଛାତ୍ରଛାତ୍ରୀମାନଙ୍କୁ ଉଭୟ ବିଶ୍ୱବିଦ୍ୟାଳୟ ଦ୍ୱାରା ଦସ୍ତଖତଯୁକ୍ତ ଡିପ୍ଲୋମା ପ୍ରମାଣପତ୍ର ପ୍ରଦାନ କରାଯିବ । ଏହାସହିତ ଉପରୋକ୍ତ ପାଠ୍ୟକ୍ରମ ଗୁଡିକ କ୍ଷେତ୍ରରେ ଅଧ୍ୟାପକ-ଅଧ୍ୟାପିକା, ସ୍ନାତକ ଛାତ୍ର (ପିଏଚଡି) ଏବଂ ପୋଷ୍ଟଡକ୍ଟରାଲ୍ ଗବେଷକଗଣଙ୍କ ସହିତ ଅନୁସନ୍ଧାନର ଆଦାନପ୍ରଦାନ କରାଯିବ।
ଏହି ବୁଝାମଣାପତ୍ରର ସୁଯୋଗ ପୂରଣ ଦିଗରେ ଏକାଡେମିକ୍ ପ୍ରକାଶନ ଏବଂ ଅନ୍ୟାନ୍ୟ ସୂଚନାର ପାରସ୍ପରିକ ଆଦାନପ୍ରଦାନକୁ ମଧ୍ଯ ସ୍ଥାନ ଦିଆଯିବ। ଦୁଇ ଅନୁଷ୍ଠାନର ସହଯୋଗରେ ପାଠ୍ୟକ୍ରମ ସଂପର୍କିତ ଅନ୍ୟାନ୍ୟ ଦିଗର ବିକାଶୀକରଣକୁ ଧ୍ୟାନ ଦିଆଯିବ ଯାହାକି ପ୍ରାଚୀନ କଳା କେନ୍ଦ୍ରର “କଳା ସଙ୍ଗମ” ପ୍ରକଳ୍ପରେ ଅନ୍ତର୍ଭୁକ୍ତ କରାଯାଇପାରିବ। ଏହି ବୁଝାମଣାପତ୍ର ଦ୍ବାରା ଉଭୟ ବିଶ୍ବବିଦ୍ୟାଳୟ ଉପକୃତ ହୋଇପାରିବେ ବୋଲି କୁଳପତି ପ୍ରଫେସର ସନ୍ତୋଷ କୁମାର ତ୍ରିପାଠୀ ଆଶାବ୍ୟକ୍ତ କରିଛନ୍ତି।