ଓଡ଼ିଆ ବାର୍ତ୍ତା/ କଳାହାଣ୍ଡି (ନିଲେଶ କୁମାର ନାଗ): ଲାଞ୍ଜିଗଡ଼ ବ୍ଲକ ଚମ୍ପାଦେଇପୁର ପଞ୍ଚାୟତ ସ୍ଥିତ ହରିହରପୁର ଗ୍ରାମର ହରିଜନ ପଡାରେ ଜଳସଙ୍କଟ ଦେଖାଦେଇଛି। ପ୍ରଚଣ୍ଡ ଗ୍ରୀଷ୍ମପ୍ରବାହ ୪୫ ଡିଗ୍ରୀ ତାପମାତ୍ରା ରହୁଥିବା ବେଳେ ପାଣିସମସ୍ୟା ହନ୍ତସନ୍ତ କରୁଛି ପଡାବାସୀଙ୍କୁ। ପଡାର ମହିଳା ମାନେ ବିଦ୍ୟୁତ ଓ ପାନୀୟ ଜଳ ସମସ୍ୟାକୁ ନେଇ ସୋମବାର ବିଶ୍ୱନାଥପୁର ଠାରୁ ଲାଞ୍ଜିଗଡ଼କୁ ସଂଯୋଗ କରୁଥିବା ମୁଖ୍ୟ ରାସ୍ତାରେ ହାଣ୍ଡି, ଗରା,ବାଲ୍ଟି, ମାଠିଆ ଧରି ରାସ୍ତା ଅବରୋଧ କରିଥିଲେ। ଯାହା ଫଳରେ ମୁଖ୍ୟ ରାସ୍ତାରେ ପ୍ରାୟ ୩ଘଣ୍ଟା କାଳ ଯାତାୟାତ ସମ୍ପୂର୍ଣ୍ଣ ଭାବେ ଠପ୍ ହୋଇଥିଲା। ଖବର ପାଇ ଚମ୍ପାଦେଇପୁର ପଞ୍ଚାୟତ ସରପଞ୍ଚ ନରେନ୍ଦ୍ର ମାଝୀ, ପଞ୍ଚାୟତ ନିର୍ବାହୀ ଅଧିକାରୀ ଗଣେଶ ସାହୁ ଘଟଣା ସ୍ଥଳରେ ପହଞ୍ଚି ବୁଝାସୁଝା କରିବା ପରେ ଯାତାୟତ ସ୍ୱାଭାବିକ ହୋଇଥିଲା। ସୂଚନା ଅନୁସାରେ ଚମ୍ପାଦେଇପୁର ପଞ୍ଚାୟତ ଅଧୀନରେ ଥିବା ହରିହରପୁର ଗ୍ରାମରେ ତିନିଗୋଟି ପଡ଼ାରେ ୧୪୦ରୁ ଉର୍ଦ୍ଧ୍ବ ପରିବାର ବସବାସ କରୁଥିବା ବେଳେ ହରିଜନ ପଡ଼ାରେ ୪୦ ରୁ ଉର୍ଦ୍ଧ୍ବ ପରିବାର ବସବାସ କରୁଛନ୍ତି। ହରିହରପୁର ଗ୍ରାମରେ ଆଜିକୁ ୪ଦିନ ହେଲା ବିଦ୍ୟୁତ ନଥିବା ହେତୁ ପାନୀୟ ଜଳ ସମସ୍ୟା ଦେଖା ଦେଇଥିବା ବେଳେ ପାଣି ଦୋକାନରୁ କିଣି ପିଉଥିବା କହୁଛନ୍ତି ପଡାବାସୀ। ପଡ଼ାରେ ଦୁଇଟି ନଳକୂପ ରହିଥିବା ବେଳେ ଗ୍ରୀଷ୍ମ ଋତୁରେ ପାଣି ନିଅଣ୍ଟ ହେଉଥିବା ବେଳେ ଦୁଇମାସ ହେବ ଖରାପ ହୋଇ ପଡିଛି। ପଞ୍ଚାୟତ ପକ୍ଷରୁ ପାଣି ଟ୍ୱେଙ୍କର ଦ୍ବାରା ଜଳ ଯୋଗାଣ ପାଇଁ ବ୍ୟବସ୍ଥା ରହିଥିଲେ ମଧ୍ୟ ତାହାର ବ୍ୟବସ୍ଥା କାଯାଇନଥିବା ଯୋଗୁଁ ପଡ଼ାରେ ଘୋର ଜଳ ସଙ୍କଟ ଦେଖା ଦେଇଛି। ପଞ୍ଚାୟତ ଠାରୁ ବ୍ଲକ୍ ପର୍ଯ୍ୟନ୍ତ ଯାଇ ବାରମ୍ବାର ଗୁହାରୀ ଜଣାଇବା ସତ୍ତ୍ୱେ ଏହାକୁ ନେଇ ବିଭିନ୍ନ ତ୍ରୁଟି ଦେଖାଉଛନ୍ତି। ବିଦ୍ୟୁତ ବିଭାଗ କିମ୍ବା ପଞ୍ଚାୟତ ଓ ବ୍ଲକର କୌଣସି ଅଧିକାରୀ ଅଭିଯୋଗ ପାଇଁ ଫୋନ କଲେ ଫୋନ କଲ ଗ୍ରହଣ କରୁନାହାନ୍ତି। ବାରମ୍ବାର ଅଭିଯୋଗ ପରେ କେହି କର୍ଣ୍ଣପାତ ନକରିବାରୁ ଆଜି ହରିହରପୁର ହରିଜନ ପଡାର ସବିତା ହରିଜନ, ପ୍ରତିମା ହରିଜନ, ସସ୍ମିତା ହରିଜନ, କଳ୍ପନା ହରିଜନ, କୁନ୍ତୀ ହରିଜନ, ଚଞ୍ଚଳା ହରିଜନ, ସଂଯୁକ୍ତା ହରିଜନ ସମତେ ବହୁସଂଖ୍ୟାରେ ମହିଳା ମାନେ ପାନୀୟ ଜଳ ସମସ୍ୟାକୁ ନେଇ ବିଶ୍ୱନାଥପୁର ଠାରୁ ଲାଞ୍ଜିଗଡ଼କୁ ସଂଯୋଗ କରୁଥିବା ମୁଖ୍ୟ ରାସ୍ତାରେ ସକାଳ ୭ ଘଣ୍ଟା ସମୟରେ ହାଣ୍ଡି, ଗରା, ବାଲ୍ଟି, ନଖି ଧରି ମୁଖ୍ୟ ରାସ୍ତା ଅବରୋଧ କରିଥିବା ପ୍ରକାଶ କରିଛନ୍ତି। ଯାହା ଫଳରେ ରାସ୍ତାର ଦୁଇ ପାର୍ଶ୍ଵରେ ଗାଡି ମୋଟର ଅଟକି ରହିଥିବା ବେଳେ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଥିବା ଦେଖିବାକୁ ମିଳିଥିଲା। ଘଟଣା ସ୍ଥଳରେ ବିଶ୍ୱନାଥପୁର ମଣ୍ଡଳ ସଭାପତି ତୁଳସୀ ମାଝୀ ପହଞ୍ଚି ମହିଳା ମାନଙ୍କୁ ବୁଝାସୁଝା କରିଥିଲେ। ଖବର ପାଇ ଚମ୍ପାଦେଇପୁର ସରପଞ୍ଚ ନରେନ୍ଦ୍ର ମାଝୀ, ଚମ୍ପାଦେଇପୁର ପଞ୍ଚାୟତ ନିର୍ବାହୀ ଅଧିକାରୀ ଗଣେଶ ସାହୁ ପହଞ୍ଚି ଉକ୍ତ ପଡାକୁ ତିନିଚାରି ଘଣ୍ଟା ଭିତରେ ଟ୍ୟାଙ୍କର ଦ୍ୱାରା ପାଣି ଯୋଗାଇ ଦିଆଯିବା ସହିତ ବିଦ୍ୟୁତ ସରବରାହ ପାଇଁ ବିଦ୍ୟୁତ ବିଭାଗ ଯନ୍ତ୍ରୀଙ୍କୁ ଯୋଗାଯୋଗ କରି ତୁରନ୍ତ ବିଦ୍ୟୁତ ସଂଯୋଗ ପାଇଁ କହିଥିଲେ ଏବଂ ନଳକୂପ ତିଆରି ଗାଡି ଉପଲବ୍ଧ ନଥିବା ହେତୁ ଆଜି ସନ୍ଧ୍ୟା କିମ୍ବା ଆସନ୍ତା କାଲି ସୁଦ୍ଧା ନଳକୂପ ତିଆରି କରାଯିବ ବୋଲି ସରପଞ୍ଚ ଶ୍ରୀ ମାଝୀ ମହିଳା ମାନଙ୍କୁ ବୁଝାସୁଝା କରିବା ପରେ ଦୀର୍ଘ ୩ଘଣ୍ଟା ପରେ ଦିନ ୧୦ ଘଣ୍ଟା ସମୟରେ ଯାତାୟତ ସ୍ୱାଭାବିକ ହୋଇଥିଲା।
