ଦେଖ ଦେଖ ଦେଖ ଶଗଡ଼ ଗାଡ଼ି।
ଗଡ଼ ଗଡ଼ ହୋଇ ଯାଉଛି ଗଡ଼ି।।
କେଁଏଁ କଟ କଟ କରି ଶବଦ।
ଯୁଆଳିରେ ବନ୍ଧା ଦୁଇ ବଳଦ।।
ଦୁଇଟି ଚକ ତା’ ଗୋଟିଏ ଅଖ ।
ଏଗାର ଏଗାର ଅରକୁ ଦେଖ।।
ଶଗଡ଼ ଗାଡ଼ିକୁ ବାଟ ଦେଖାଏ ।
ପେଟରେ ଝୁଲୁଛି ଲଣ୍ଠନଟିଏ।।
କାଳିଆ, କସରା, ବଳଦ ଦୁଇ ।
ଶଗଡ଼କୁ ଦେଖ ନିଅନ୍ତି ବୋହି।।
ଶଗଡ଼ିଆ ଭାଇ ଶଗଡ଼େ ବସି ।
ଅଳପ ଅଳପ ଦେଉଛି ହସି।।
ଉଦାସିଆ ଗୀତ ଦେଉଛି ଗାଇ।
ଗଲାଣି ତ ଗଲା କଥାରେ ଭାଇ।।
କାଳିଆ କସରା ଲାଙ୍ଗୁଳ ଧରି ।
ମୋଡ଼ି ଦେଉ ଅଛି ଇଞ୍ଜିନ ପରି।।
ମାଡ଼ି ଆସୁଛିରେ କଳା ବଉଦ।
ଧାଇଁକି ଧୁକୁଡ଼ୁ ଧାଆଁ ବଳଦ।।
ଇନ୍ଧନ ଫିନ୍ଧନ ନାହିଁ ଇଞ୍ଜିନି।
ବଳଦେ ନିଅନ୍ତି ଶଗଡ଼ ଟାଣି।।
ଖାଲ ଖମା କିଛି ନାହିଁ ଖାତର ।
ଗୁଳା ପଡ଼ିଥାଇ ରାସ୍ତା ଉପର।।
ଧନ୍ୟ ଧନ୍ୟ ତୁହି ଶଗଡ଼ ଗାଡ଼ି।
ବିସ୍ମୃତି ଗରଭେ ରହିଲୁ ପଡ଼ି।।
ଶଗଡ଼ ଶୁଣିଛି ମୁହିଁ କାହାଣୀ ।
ଶଗଡ଼ିଆ ଥିଲା ଏକ ମାଗୁଣି।।
ମଟର ଆସିଲା ଜୀବିକା ଗଲା।
ମାଗୁଣି ବିଚରା ଉପାସେ ମଲା।।
କେତେ ନବବଧୂ ଶଗଡ଼ ଚଢ଼ି ।
ଗଲେ ନୂଆ ନୂଆ ସଂସାର ଗଢ଼ି।।
ରୂପା ଶଗଡ଼ିରେ ସୁନା କନିଆଁ ।
ଶାଶୁ ଘର ଯାଏ ଭାରି ଛାନିଆ ।।
ଧନ୍ୟ ଧନ୍ୟ ଆରେ ତୁହି ଶଗଡ଼।
ଇତିହାସ ତୋର ବିଶାଳ ବଡ଼ ।।
କେଁଏଁ କଟର ତୋ ଶୁଭୁନି ଆଉ।
ଶଗଡ଼ ତୋ କଥା ଏତିକି ଥାଉ ।।
ଅର୍ଜୁନୀ ଚରଣ ବେହେରା
ମୋ – 7693091971
