ଧନଜୀବନ ସୁରକ୍ଷାରେ ଅବହେଳା ଚଳିବ ନାହିଁ, ସମସ୍ତ ବିଭାଗକୁ ସଜାଗ ରହିବାକୁ ନିର୍ଦ୍ଦେଶ
ଓଡ଼ିଆ ବାର୍ତ୍ତା/ କୋରାପୁଟ (ସୁନ୍ଦର କୁମାର ପାଣି): ସମ୍ଭାବ୍ୟ ବାତ୍ୟା ‘ଅର୍ଣ୍ଣବ’କୁ ନେଇ କୋରାପୁଟ ଜିଲ୍ଲା ପ୍ରଶାସନର ପ୍ରସ୍ତୁତି ଏବେ ପରୀକ୍ଷାର ସମ୍ମୁଖୀନ। ବାତ୍ୟାଜନିତ ସମ୍ଭାବ୍ୟ ବିପର୍ଯ୍ୟୟରେ ଧନଜୀବନର ସୁରକ୍ଷା ଓ ଜନସାଧାରଣଙ୍କୁ ତୁରନ୍ତ ସହାୟତା ଯୋଗାଇବା ଦିଗରେ ପ୍ରଶାସନର ପଦକ୍ଷେପ କେତେ ଫଳପ୍ରଦ ହେଉଛି, ତାହା ଗୁରୁତ୍ୱପୂର୍ଣ୍ଣ ହେବ। ଏହି ପରିପ୍ରେକ୍ଷୀରେ ବୁଧବାର ଜିଲ୍ଲା ଜରୁରୀକାଳୀନ କାର୍ଯ୍ୟ କେନ୍ଦ୍ରଠାରେ ଜିଲ୍ଲାପାଳ ଓ ଜିଲ୍ଲାର ବରିଷ୍ଠ ଅଧିକାରୀମାନଙ୍କ ସହ ଏକ ସମୀକ୍ଷା ବୈଠକ ହୋଇଥିଲା। ବିପର୍ଯ୍ୟୟ ସମୟରେ ଧନଜୀବନ ସୁରକ୍ଷା, ତ୍ୱରିତ ଉଦ୍ଧାର କାର୍ଯ୍ୟ ଓ ରିଲିଫ୍ ବ୍ୟବସ୍ଥାକୁ ସୁନିଶ୍ଚିତ କରିବା ସହ ସମସ୍ତ ବିଭାଗକୁ ସଜାଗ ରହିବାକୁ କଡ଼ା ନିର୍ଦ୍ଦେଶ ଦିଆଯାଇଛି।
ତେବେ କେବଳ ବୈଠକ ଓ ନିର୍ଦ୍ଦେଶରେ ବିପର୍ଯ୍ୟୟର ମୁକାବିଲା ସମ୍ଭବ ନୁହେଁ। ଜିଲ୍ଲାର ଦୁର୍ଗମ ଅଞ୍ଚଳରେ ରହୁଥିବା ଲୋକଙ୍କ ନିକଟରେ ଆଗୁଆ ସତର୍କ ସୂଚନା ପହଞ୍ଚିବା, ବିପଦସଙ୍କୁଳ ଘରେ ରହୁଥିବା ପରିବାରଙ୍କୁ ସୁରକ୍ଷିତ ସ୍ଥାନକୁ ନେବା, ଆବଶ୍ୟକ ଖାଦ୍ୟ ଓ ଔଷଧ ମହଜୁଦ ରଖିବା ଏବଂ ଜରୁରୀକାଳୀନ ସେବାକୁ ସକ୍ରିୟ ରଖିବା ହିଁ ପ୍ରଶାସନର ପ୍ରକୃତ ପ୍ରସ୍ତୁତିର ମାପକାଠି।
ବିଶେଷକରି ପାହାଡ଼ିଆ ଓ ଦୁର୍ଗମ ଅଞ୍ଚଳରେ ଯୋଗାଯୋଗ ବ୍ୟବସ୍ଥା ବାଧାପ୍ରାପ୍ତ ହେଲେ ଉଦ୍ଧାର ଓ ରିଲିଫ୍ କାର୍ଯ୍ୟ ଯେପରି ବିଳମ୍ବିତ ନ ହୁଏ, ସେଥିପାଇଁ ଆଗୁଆ ଯୋଜନା ଓ ବିଭାଗୀୟ ସମନ୍ୱୟ ଅତ୍ୟନ୍ତ ଜରୁରୀ। ନିର୍ଦ୍ଦେଶର କାର୍ଯ୍ୟକାରିତା ଓ ତୃଣମୂଳସ୍ତରରେ ପ୍ରସ୍ତୁତିର ବାସ୍ତବ ସ୍ଥିତି ଉପରେ ମଧ୍ୟ ନଜର ରହିବା ଆବଶ୍ୟକ।
ବାତ୍ୟା ଆସିବା ପରେ ତତ୍ପରତା ଦେଖାଇବା ଅପେକ୍ଷା ବିପଦ ପୂର୍ବରୁ ଆବଶ୍ୟକ ପଦକ୍ଷେପ ନେବା ହିଁ ପ୍ରଶାସନର ଦାୟିତ୍ୱ। ତେଣୁ ବୈଠକରେ ଦିଆଯାଇଥିବା ନିର୍ଦ୍ଦେଶ କେତେ ଶୀଘ୍ର ଓ କେତେ ଦକ୍ଷତାର ସହ କାର୍ଯ୍ୟକ୍ଷେତ୍ରରେ ରୂପାୟନ ହେଉଛି, ତାହା ଉପରେ ଏବେ ନଜର ରହିବ।
