କଳାହାଣ୍ଡି,୧୯ା୧୧: ଏବର୍ଷର ମର୍ଯାଦାଜନକ ‘ଦେବଗିରି ସାହିତ୍ୟ ସମ୍ମାନ’ ପାଇବେ ବିଶିଷ୍ଟ ଗାଳ୍ପିକ ମନୋଜ ମହାନ୍ତି । କଳାହାଣ୍ଡି ଜିଲ୍ଲା ନର୍ଲା ବ୍ଲକ୍ ବୁଢ଼ୀପଦର ସ୍ଥିତ ଦେବଗିରି ସାଂସ୍କୃତିକ ଅନୁଷ୍ଠାନ ପକ୍ଷରୁ ତାଙ୍କୁ ଏହି ସମ୍ମାନ ପ୍ରଦାନ କରାଯିବ ।
ଓଡ଼ିଆ ଗଳ୍ପରେ ଶ୍ରୀ ମହାନ୍ତିଙ୍କ ନିଜସ୍ୱ ଶୈଳୀ ତାଙ୍କୁ ଏକ ସ୍ୱତନ୍ତ୍ର ପରିଚୟ ପ୍ରଦାନ କରିଛି । ସେଥିରେ ସାଧାରଣ ଜନଜୀବନର କଥା ବେଶ୍ ପ୍ରଭାବଶାଳୀ ଢଙ୍ଗରେ ଉପସ୍ଥାପିତ ହୋଇପାରିଛି । ସାଧାରଣ ଚର୍ଚ୍ଚା ଓ ଖ୍ୟାତି ତଥା ବାଦବିବାଦର ଉଦ୍ଧ୍ୱର୍ରେ ରହି ସେ ନିଜ ସାହିତ୍ୟ ସାଧନା ଜାରି ରଖିଛନ୍ତି । ୨ ସେପ୍ଟେମ୍ବର ୧୯୬୭ରେ ବଲାଙ୍ଗୀର ଜିଲ୍ଲା ଲାଠୋର ଠାରେ ଜନ୍ମିତ ମନୋଜ ବର୍ତ୍ତମାନ କଳାହାଣ୍ଡି ଜିଲ୍ଲାର ଜୁନାଗଡ଼ରେ ଅବସ୍ଥାନ କରୁଛନ୍ତି । ତାଙ୍କ ଗଳ୍ପ ଓଡ଼ିଶାର ବିଭିନ୍ନ ପତ୍ରପତ୍ରିକାରେ ପ୍ରକାଶିତ ହୋଇ ବିପୁଳ ପାଠକୀୟତା ହାସଲ କରିଛି ।
ନଭେମ୍ବର ୨୧ରୁ ୨୩ ତାରିଖ ଯାଏଁ ଆୟୋଜିତ ହେଉଥିବା ଦେବଗିରି ସାଂସ୍କୃତିକ ଅନୁଷ୍ଠାନର ୨୬ତମ ବାର୍ଷିକ ଉତ୍ସବ ତଥା କୁମାରସ୍ୱାମୀ ମହୋତ୍ସବ ଅବସରରେ ତାଙ୍କୁ ସମ୍ମାନିତ କରାଯିବ ବୋଲି ଅନୁଷ୍ଠାନର ସଭାପତି ସଞ୍ଜୟ ଧଙ୍ଗଡ଼ାମାଝୀ ଓ ସଂପାଦକ ସୁନୀଲ କୁମାର ଧଙ୍ଗଡ଼ାମାଝୀ ସୂଚନା ଦେଇଛନ୍ତି ।
ଏଠାରେ ସୂଚନାଯୋଗ୍ୟ ଯେ, ପୂର୍ବରୁ ବିଶିଷ୍ଟ କଥାକାର ସୁକାନ୍ତ ସାହୁ ଓ ଯାଜ୍ଞସେନୀ ସାହା, ବିଶିଷ୍ଟ କବି ଭାରତ ମାଝୀ ଓ ପଦ୍ମଲୋଚନ ମିଶ୍ର ଏହି ସମ୍ମାନ ପାଇଛନ୍ତି ।
