ଓଡ଼ିଆ ବାର୍ତ୍ତା/ ନୂଆଦିଲ୍ଲୀ : ବାଲେଶ୍ୱର ବାହାନଗା ରେଳ ଦୁର୍ଘଟଣାଗ୍ରସ୍ତ ପୀଡିତ ପରିବାର ପାଇଁ ସହାୟତାର ହାତ ବଢ଼ାଇଲା ରିଲାଏନ୍ସ ଫାଉଣ୍ଡେସନ I ରିଲାଏନ୍ସ ତରଫରୁ ପୀଡିତ ପରିବାର ପାଇଁ ପ୍ରକାର ରିଲିଫ୍ ପଦକ୍ଷେପ ଘୋଷଣା କରାଯାଇଛି । ରିଲାଏନ୍ସ ଅଧ୍ୟକ୍ଷ ମୁକେଶ ଅମ୍ବାନୀ କହିଛନ୍ତି ‘ଏହା ଅତ୍ୟନ୍ତ ଦୁଖଦଃ ,ଭାରି ହୃଦୟରେ ମୁଁ ରିଲାଏନ୍ସ ଫାଉଣ୍ଡେସନ ତରଫରୁ ଓଡିଶାରେ ଘଟିଥିବା ଦୁର୍ଘଟଣାରେ ପୀଡିତ ପରିବାର ପ୍ରତି ମୋର ଗଭୀର ସମବେଦନା ଜଣାଉଛି। ଦୁର୍ଘଟଣା ବିଷୟରେ ଜାଣିବା ମାତ୍ରେ, ଆମର ବିଶେଷଜ୍ଞ ବିପର୍ଯ୍ୟୟ ପରିଚାଳନା ଦଳ ତୁରନ୍ତ ତୃଣ ମୂଳ ସ୍ତରରେ ଉଦ୍ଧାର କାର୍ଯ୍ୟକୁ ସହଜ କରିବା ପାଇଁ ନିୟୋଜିତ ହୋଇଥିଲେ I ରିଲାଏନ୍ସ ଫାଉଣ୍ଡେସନ (ଆରଏଫ) ପ୍ରତିଷ୍ଠାତା ତଥା ଅଧ୍ୟକ୍ଷ ନୀତା ଅମ୍ବାନୀ କହିଛନ୍ତି ଯେ ଆମ ଦଳ ଆହତମାନଙ୍କୁ ଦିନରାତି ସହାୟତା ଏବଂ ସହାୟତା ଜାରି ରଖିଛନ୍ତି। ଏହି ଦୁଃଖଦ ଘଟଣାର କ୍ଷତିକୁ ଯଦିଓ ଆମେ ଭରଣା କରିପାରିବୁ ନାହିଁ, କିନ୍ତୁ ଶୋକସନ୍ତପ୍ତ ପରିବାରଗୁଡ଼ିକୁ ସେମାନଙ୍କ ଜୀବନକୁ ପୁଣି ଥରେ ଗଢ଼ି ତୋଳିବା ଓ ଭବିଷ୍ୟତ ଲାଗି ପ୍ରସ୍ତୁତ ରହିବାରେ ସାହାଯ୍ୟ କରିବା ଲାଗି ଆମେ ପୂର୍ଣ୍ଣ ପ୍ରତିବଦ୍ଧ ରହିଛୁ । ଏହି ଦୁର୍ଭାଗ୍ୟଜନକ ଘଟଣାରେ ପ୍ରଭାବିତ ହୋଇଥିବା ଲୋକମାନଙ୍କ ପ୍ରତି ଆମର ଅତୁଟ ସମର୍ଥନ ପ୍ରଦାନ କରିବା ସହିତ ଏହାକୁ ଆମର ଏକମାତ୍ର ଲକ୍ଷ୍ୟ ଭାବେ ଗ୍ରହଣ କରି ଆମେ ୧୦-ସୂତ୍ରୀ କାର୍ଯ୍ୟକ୍ରମ ଘୋଷଣା କରିଛୁ । ଏହି କଠିନ ସମୟରେ ଆମ ଫାଉଣ୍ଡେସନ ଓ ବର୍ଦ୍ଧିତ ରିଲାଏନ୍ସ ପରିବାର ପ୍ରଭାବିତ ଲୋକମାନଙ୍କ ସହିତ ଏକଜୁଟ ହୋଇ ଠିଆ ହୋଇଛି ।’’
ଦୁର୍ଘଟଣାଗ୍ରସ୍ତ ପୀଡିତ ପରିବାର ପାଇଁ ୧୦ -ସୂତ୍ରୀ ରିଲିଫ୍ ପଦକ୍ଷେପ ଯାହା ଦୀର୍ଘକାଳୀନ ଭିତ୍ତିରେ ସମର୍ଥନ କରିବ:
୧ . ବିପର୍ଯ୍ୟୟ ମୁକାବିଲା କାର୍ଯ୍ୟରେ ନିୟୋଜିତ ଆମ୍ବୁଲାନ୍ସଗୁଡ଼ିକୁ ଜିଓ-ବିପି ନେଟ୍ୱର୍କ ଜରିଆରେ ମାଗଣା ଇନ୍ଧନ
୨. ରିଲାଏନ୍ସ ସ୍ମାର୍ଟ ଷ୍ଟୋର୍ଗୁଡ଼ିକ ମାଧ୍ୟମରେ ପ୍ରିୟଜନଙ୍କୁ ହରାଇଥିବା ପ୍ରଭାବିତ ପରିବାରଗୁଡ଼ିକୁ ଆଗାମୀ ଛଅ ମାସ ପର୍ଯ୍ୟନ୍ତ ମାଗଣାରେ ଅଟା, ଚିନି, ଡାଲି, ଚାଉଳ, ଲୁଣ ଏବଂ ଭୋଜନ ପ୍ରସ୍ତୁତି ଲାଗି ତେଲ ଇତ୍ୟାଦି ରାସନ ପ୍ରଦାନ କରାଯିବ
୩. ଶୀଘ୍ର ଆରୋଗ୍ୟ ଲାଭ କରିବା ଲାଗି ଆହତମାନଙ୍କ ଆବଶ୍ୟକତା ପୂରଣ କରିବା ପାଇଁ ସେମାନଙ୍କୁ ମାଗଣାରେ ଆବଶ୍ୟକ ଔଷଧ ପ୍ରଦାନ କରାଯିବ । ଦୁର୍ଘଟଣା ପାଇଁ ହସ୍ପିଟାଲ୍ରେ ଭର୍ତି ହୋଇଥିବା ଲୋକମାନଙ୍କ ପାଇଁ ଚିକିତ୍ସା ବ୍ୟବସ୍ଥା ।
୪. ଆବେଗିକ ଓ ମନୋବୈଜ୍ଞାନିକ ସହାୟତା ଲାଗି ପରାମର୍ଶ ସେବା
୫. ଆବଶ୍ୟକତା ଅନୁଯାୟୀ ମୃତକଙ୍କ ପରିବାରର ଜଣେ ସଦସ୍ୟଙ୍କୁ ଜିଓ ଓ ରିଲାଏନ୍ସ ରିଟେଲ୍ ଜରିଆରେ ନିଯୁକ୍ତି ସୁଯୋଗ ପ୍ରଦାନ କରାଯିବ
୬. ଦିବ୍ୟାଙ୍ଗ ଲୋକମାନଙ୍କୁ ହ୍ୱିଲ୍ଚେୟାର, କୃତ୍ରିମ ଅଙ୍ଗ ଭଳି ସହାୟତା ପ୍ରଦାନ କରିବା ଲାଗି ବ୍ୟବସ୍ଥା
୭. ନୂଆ ନିଯୁକ୍ତି ସୁଯୋଗ ହାସଲ କରିବା ଲାଗି ପ୍ରଭାବିତ ଲୋକମାନଙ୍କ ପାଇଁ ସ୍ୱତନ୍ତ୍ର ଦକ୍ଷତା ତାଲିମ
୮. ପରିବାରର ଏକମାତ୍ର ଆୟକାରୀ ସଦସ୍ୟଙ୍କୁ ହରାଇଥିବା ମହିଳାମାନଙ୍କ ପାଇଁ ମାଇକ୍ରୋଫାଇନାନ୍ସ ଓ ତାଲିମ ସୁଯୋଗ
୯. ଦୁର୍ଘଟଣାରେ ପ୍ରିୟଜନଙ୍କୁ ହରାଇଥିବା ପ୍ରଭାବିତ ଗ୍ରାମୀଣ ପରିବାରଗୁଡ଼ିକୁ ବିକଳ୍ପ ଜୀବନଜୀବିକା ସହାୟତା ପ୍ରଦାନ କରିବା ଲାଗି ଗାଇ, ମଇଁଷି, ଛେଳି, କୁକୁଡ଼ା ଭଳି ପଶୁ ସମ୍ପଦ ପ୍ରଦାନ
୧୦. ନିଜ ଜୀବନକୁ ପୁନର୍ବାର ଗଠନ କରିବାରେ ସହାୟତା ପ୍ରଦାନ କରିବା ଲାଗି ପ୍ରିୟଜନଙ୍କୁ ହରାଇଥିବା ଶୋକସନ୍ତପ୍ତ ପରିବାରଗୁଡ଼ିକର ଜଣେ ସଦସ୍ୟଙ୍କୁ ଏକ ବର୍ଷ ପାଇଁ ମାଗଣା ମୋବାଇଲ୍ ସଂଯୋଗ
ବର୍ଷ ବର୍ଷ ଧରି, ରିଲାଏନ୍ସ ଫାଉଣ୍ଡେସନ ବିପର୍ଯୟ ତଥା COVID-19 ମହାମାରୀ ସମୟରେ ରିଲିଫ ସେବା ପ୍ରଦାନ କରି ଅନେକ ଜୀବନ ଏବଂ ଜୀବିକାର ପୁନଃ ନିର୍ମାଣକରି ୪୮ ମିଲିୟନରୁ ଅଧିକ ଲୋକଙ୍କୁ ସହାୟତା ପ୍ରଦାନ କରିଛି। ସେହିପରି ଓଡ଼ିଶାରେ ରେଳ ଦୁର୍ଘଟଣା ପରେ ରିଲାଏନ୍ସ ଫାଉଣ୍ଡେସନର ସ୍ୱତନ୍ତ୍ର ବିପର୍ଯ୍ୟୟ ପରିଚାଳନା ଟିମ୍ ବାଲେଶ୍ୱର ଜିଲ୍ଲାପାଳଙ୍କ କାର୍ଯ୍ୟାଳୟ ଓ ରାଷ୍ଟ୍ରୀୟ ବିପର୍ଯ୍ୟୟ ପ୍ରଶମନ ବଳ (ଏନ୍ଡିଆର୍ଏଫ୍) ସହିତ ସମନ୍ୱୟ ରକ୍ଷା କରି କାର୍ଯ୍ୟ କରୁଛି । ରିଲାଏନ୍ସ ଫାଉଣ୍ଡେସନ ଆହତମାନଙ୍କୁ ବାହାର କରି ଆମ୍ବୁଲାନ୍ସ ପର୍ଯ୍ୟନ୍ତ ପହଂଚାଇବା, ମାସ୍କ, ଗ୍ଲୋଭ୍ସ, ଓଆରଏସ୍, ବେଡ୍ସିଟ୍, ଖାଦ୍ୟସାମଗ୍ରୀ, ଆଲୋକ ବ୍ୟବସ୍ଥା କରିବା ଏବଂ ଉଦ୍ଧାର କାର୍ଯ୍ୟ ଲାଗି ଆବଶ୍ୟକ ଜରୁରୀ ଉପକରଣ ଯଥା ଗ୍ୟାସ୍ କଟର ଆଦି ତୁରନ୍ତ ଉପଲବ୍ଧ କରାଇଛି । ଉଦ୍ଧାର କାର୍ଯ୍ୟ ନିରବଚ୍ଛିନ୍ନ ଭାବେ ଜାରି ରହିବା ସୁନିଶ୍ଚିତ କରିବା ପାଇଁ ରିଲାଏନ୍ସ ଫାଉଣ୍ଡେସନ ସ୍ଥାନୀୟ ଯୁବ ସ୍ୱେଚ୍ଛାସେବୀଙ୍କ ସହଯୋଗରେ ସ୍ୱଳ୍ପ ସମୟରେ ପ୍ରାୟ ୧୨୦୦ ଲୋକଙ୍କ ପାଇଁ ରନ୍ଧା ଖାଦ୍ୟ ପ୍ରସ୍ତୁତ କରିଥିଲା । ଉଦ୍ଧାର କର୍ମୀ ଏବଂ ଦୁର୍ଘଟଣା ସ୍ଥଳକୁ ଆସିଥିବା ପ୍ରଭାବିତ ଲୋକଙ୍କ ପରିବାର ସଦସ୍ୟଙ୍କୁ ଏହି ଭୋଜନ ପ୍ରଦାନ କରାଯାଇଥିଲା ଏବଂ ପର୍ଯ୍ୟାପ୍ତ ପାନୀୟ ଜଳ ଉପଲବ୍ଧ କରାଯାଇଥିଲା ।
