ଓଡ଼ିଆ ବାର୍ତ୍ତା/ ହାଇଦ୍ରାବାଦ: ତେଲେଙ୍ଗାନା କଂଗ୍ରେସ ପାର୍ଟିର ପୂର୍ବତନ ଅଧ୍ୟକ୍ଷ ଏନ୍ ଉତ୍ତମ କୁମାର ରେଡ୍ଡୀ ଆଠ ବର୍ଷ ପରେ ଶେଷରେ ନିଜର ଦାଢ଼ି କାଟିବାକୁ ଯାଉଛନ୍ତି। ତେଲେଙ୍ଗାନାରେ କଂଗ୍ରେସ ସରକାର ଗଠନ ନହେବା ଯାଏଁ ସେ ଦାଢି କାଟିବେ ନାହିଁ ବୋଲି ଶପଥ ନେଇଥିଲେ। ୨୦୧୬ ରେ ରେଡ୍ଡୀ ଏହି ଶପଥ ନେଇଥିଲେ।
ଉତ୍ତମ କୁମାର ରେଡ୍ଡୀଙ୍କ ଏହି ଶପଥ ଏବେ ଗଣମାଧ୍ୟମର ଦୃଷ୍ଟି ଆକର୍ଷଣ କରିଛି। ଦଳ ପ୍ରତି ତାଙ୍କର ସମର୍ପଣ ଏବଂ ଶେଷରେ କ୍ଷମତାକୁ ଫେରିବା ଉପରେ ତାଙ୍କର ବିଶ୍ୱାସକୁ ଚର୍ଟ୍ଟାର କେନ୍ଦ୍ରବିନ୍ଦୁ ପାଲଟିଛି। ପୂର୍ବ ନିର୍ବାଚନରେ କଂଗ୍ରେସକୁ ବଡ଼ ଧରଣର ଝଟକା ଲାଗିଥିଲେ ମଧ୍ୟ ରେଡ୍ଡୀଙ୍କ ଅତୁଟ ପ୍ରତିବଦ୍ଧତା ଅନେକ ଦଳୀୟ ସମର୍ଥକଙ୍କ ପାଇଁ ଆଶାର ଆଲୋକ ପାଲଟିଛି।
ଭାରତୀୟ ବାୟୁସେନାର ଏହି ପୂର୍ବତନ ଅଧିକାରୀ ଉତ୍ତମ ରେଡ୍ଡୀ ରାଜନୀତିରେ କଂଗ୍ରେସ ହିଁ ଲୋକଙ୍କୁ ସେବା ଯୋଗାଇପାରିବ ବୋଲି ବିଶ୍ବାସ ରଖି ଦଳରେ ଯୋଗ ଦେଇଥିଲେ। ଏବେ କଂଗ୍ରେସ କ୍ଷମତାରେ ବସିବା ପରେ ରେଡ୍ଡୀ ନୂଆ ମନ୍ତ୍ରିମଣ୍ଡଳରେ ଗୃହ ମନ୍ତ୍ରୀ ଭାବେ ଶପଥ ନେଇଛନ୍ତି। ଏହା ତାଙ୍କ ପାଇଁ ଏକ ବଡ ରାଜନୈତିକ ଉପଲବ୍ଧି।
ଉଲ୍ଲେଖଯୋଗ୍ୟ, ତେଲେଙ୍ଗାନା ନିର୍ବାଚନ କେବଳ କଂଗ୍ରେସ ପାଇଁ ନୁହେଁ ବରଂ ଅଜବ ଶପଥ ନେଇଥିବା ଲୋକଙ୍କ ପାଇଁ ମଧ୍ୟ ଖୁସି ଆଣିଛି। ରାଜ୍ୟରେ ହଳଦୀ ବୋର୍ଡ ଗଠନ ନହେବା ଯାଏଁ ଚପଲ ପିନ୍ଧିବେ ନାହିଁ ବୋଲି ୭୧ ବର୍ଷୀୟ ଚାଷୀ ମନୋହର ରେଡ୍ଡୀ ଶପଥ ନେଇଥିଲେ। ଚଳିତ ବର୍ଷ ଅକ୍ଟୋବର ମାସରେ ତେଲେଙ୍ଗାନାରେ ଏକ ନିର୍ବାଚନୀ ସଭାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଜାତୀୟ ହଳଦୀ ବୋର୍ଡ ଗଠନ ନେଇ ଘୋଷଣା କରିବା ପରେ ତାଙ୍କର ଏହି ବ୍ରତ ପୂରଣ ହୋଇଛି।
