ଓଡ଼ିଆ ବାର୍ତ୍ତା/ କଳାହାଣ୍ଡି (ଲିଙ୍ଗରାଜ ମିଶ୍ର): ସଚରାଚର ବିଶ୍ବର ମଙ୍ଗଳବିଧାନ ପାଇଁ ଓଡ଼ିଶା ସମେତ ଦେଶର ବିଭିନ୍ନ ସ୍ଥାନରେ ବିଶ୍ଵଶାନ୍ତି ବ୍ରହ୍ମଯଜ୍ଞ ଅନୁଷ୍ଠିତ ହେଉଛି। ସେହି କ୍ରମରେ କଳାହାଣ୍ଡି ଜିଲ୍ଲା ନର୍ଲା ବ୍ଲକ ଅନ୍ତର୍ଗତ ଟୋଲବ୍ରାହ୍ମଣୀ ସ୍ଥିତ ସିଦ୍ଧ ରତ୍ନକୁଟୀର ଆଶ୍ରମରେ ୬୬ତମ ବିଶ୍ଵଶାନ୍ତି ବ୍ରହ୍ମଯଜ୍ଞ ଓ ମହିମା ମେଳା ମହୋତ୍ସବ-୨୦୨୪ ଆୟୋଜିତ ହେବାକୁ ଯାଉଛି। ଆବାହକ ଓ ଯଜ୍ଞ କର୍ତ୍ତା ବୈଦ୍ୟରାଜ ପବିତ୍ର ଶବରଙ୍କ ପ୍ରତକ୍ଷ୍ୟ ତତ୍ବାବଧାନରେ ତଥା ଗ୍ରାମବାସୀ ଓ ସାଧୁ ଭକ୍ତ ମାନଙ୍କ ସହଯୋଗରେ ସିଦ୍ଧ ରତ୍ନକୁଟିର ଆଶ୍ରମ ଟୋଲବ୍ରାହ୍ମଣୀ ଠାରେ ମାର୍ଚ୍ଚ ୨୩ରୁ ୨୫ତାରିଖ ପର୍ଯ୍ୟନ୍ତ ଏହି ବ୍ରହ୍ମଯଜ୍ଞ ଓ ମହିମା ମେଳା ମହୋତ୍ସବ-୨୦୨୪ ଅନୁଷ୍ଠିତ ହେବ। ଏଥିରେ ଯାଜ୍ଞିକ ଭାବେ ମହିମା ସମାଜ ଲତା ଆଶ୍ରମ ପରିଚାଳନା ସମିତିର ସଭାପତି ବ୍ରହ୍ମ ଅବଧୂତ ଭଗବାନ ବାବା ଯୋଗଦେବାର କାର୍ଯ୍ୟକ୍ରମ ରହିଛି। ଏହାସହ ଅନେକ ମହିମା ସାଧୁ ଓ ତ୍ୟାଗିବୃନ୍ଦ ଯଜ୍ଞ ପରିଚାଳନାରେ ସହଯୋଗ କରିବେ। ମାର୍ଚ୍ଚ ୨୩ ଶନିବାର ସକାଳ ୭ଟାରେ କଳସ ଯାତ୍ରା, ପୂର୍ବାହ୍ନ ୧୦ଟାରେ ଧୂନୀ ସ୍ଥାପନ, ଅଖଣ୍ଡ ବତୀ ପ୍ରଜ୍ବଳନ ଓ ଆଠ ଭଜନ, ଅପରାହ୍ନ ୨ଟାରେ ପ୍ରବଚନ, ସନ୍ଧ୍ୟା ୭ଟାରେ ଆଠ ଭଜନ, ରାତ୍ର ୯ଟାରେ ସାଂସ୍କୃତିକ କାର୍ଯ୍ୟକ୍ରମ କ୍ରମରେ ବଲାଙ୍ଗୀର ଜିଲ୍ଲା ରଏନମାଲର ମିକ୍ଚର ରାମାୟଣ – ରାମ ବନବାସ ପରିବେଷିତ ହେବ। ମାର୍ଚ୍ଚ ୨୪ ତାରିଖ ରବିବାର ସକାଳ ୭ ଘଣ୍ଟାରେ ପ୍ରବଚନ, ଅପରାହ୍ନ ୨ଘଣ୍ଟା ପ୍ରବଚନ, ସନ୍ଧ୍ୟା ୭ଟାରେ ଆଠ ଭଜନ ଓ ରାତ୍ର ୯ଟାରେ ସାଂସ୍କୃତିକ କାର୍ଯ୍ୟକ୍ରମ ରହିଛି। ସେହିପରି ଭାବେ ମାର୍ଚ୍ଚ ୨୫ ସୋମବାର ବ୍ରହ୍ମ ମୁହୂର୍ତ୍ତରେ ପଣାପାଣି ଅର୍ପଣ, ସକାଳ ୬ଟାରେ ବାଲ୍ୟ ଭୋଜନ, ପୂର୍ଣ୍ଣାହୁତି ଓ ପ୍ରସାଦ ସେବନ କାର୍ଯ୍ୟକ୍ରମ ରହିଥିବା ସିଦ୍ଧ ରତ୍ନକୁଟୀର ଆଶ୍ରମ ପକ୍ଷରୁ ସୂଚନା ଦିଆଯିବା ସହ ଏଥିରେ ଯୋଗଦାନ କରି ଅଲେଖ ମହିମା ପ୍ରଭୁଙ୍କର କୃପା ଭାଜନ ହେବା ସଙ୍ଗେ ସଙ୍ଗେ ପୁଣ୍ୟାର୍ଜନ କରିବାକୁ ସମସ୍ତଙ୍କୁ ନିବେଦନ କରାଯାଇଛି।