ନୂତନ ନଳକୂପ ଖନନ ପାଇଁ ଗ୍ରାମବାସୀଙ୍କ ଦାବି
ଓଡ଼ିଆ ବାର୍ତ୍ତା/ ମୁରିବାହାଲ (ଅମରେଶ ମାଝୀ): ବଲାଙ୍ଗିର ଜିଲ୍ଲାର ମୁରିବାହାଲ ବ୍ଲକ ଅଧୀନ ଲେବଡା ପଞ୍ଚାୟତର ଟଟୋପରା ଗ୍ରାମର ଖେଳ ପଡ଼ିଆରେ ପିଇବା ପାଣିର ସୁବିଧା ନାହିଁ । ପ୍ରତିଦିନ ଏହି ଖେଳ ପଡ଼ିଆରେ ଅନେକ ପିଲା, ଯୁବକ ଓ ସ୍କୁଲ ଛାତ୍ରଛାତ୍ରୀମାନେ ଖେଳିବା ପାଇଁ ଆସିଥାନ୍ତି । ଏହାସହ ବିଭିନ୍ନ କ୍ରୀଡା କାର୍ଯ୍ୟକ୍ରମ ଦେଖିବା ପାଇଁ ଆସୁଥିବା ଜନସାଧାରଣଙ୍କ ପାଇଁ ପାଣିର ସୁବିଧା ନଥିବାରୁ ସେମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ସ୍ଥାନୀୟ ଲୋକଙ୍କ କହିବା ଅନୁସାରେ, ଖେଳ ପଡ଼ିଆରେ ଗ୍ରୀଷ୍ମ ଋତୁରେ ପାଣି ନଥିବା ସମସ୍ୟା ଅଧିକ ଗୁରୁତର ରୂପ ନେଉଛି । ପିଲାମାନେ ଓ ଯୁବକମାନେ ଖେଳ ସମୟରେ ଶୋଷ ଶାନ୍ତ କରିବା ପାଇଁ ଦୂର ଦୂରନ୍ତରୁ ପାଣି ଆଣିବାକୁ ବାଧ୍ୟ ହେଉଛନ୍ତି । ଏହା ସହିତ ଏହି ଅଞ୍ଚଳରେ ଯେକୌଣସି କ୍ରୀଡା ପ୍ରତିଯୋଗିତା ବା ସାମାଜିକ କାର୍ଯ୍ୟକ୍ରମ ଆୟୋଜନ କରିବାରେ ମଧ୍ୟ ବଡ଼ ବାଧା ସୃଷ୍ଟି କରୁଛି । ଗ୍ରାମବାସୀମାନେ ଏହି ସମସ୍ୟାକୁ ନେଇ ପୂର୍ବରୁ ମଧ୍ୟ ସମ୍ପୃକ୍ତ ବିଭାଗ ଓ ପ୍ରଶାସନଙ୍କ ନଜରକୁ ଆଣିଥିବା କହିଛନ୍ତି, କିନ୍ତୁ ଏପର୍ଯ୍ୟନ୍ତ କୌଣସି ପ୍ରକାର ସମାଧାନ ହୋଇନାହିଁ । ଏହା ନେଇ ଲୋକମାନଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଇଛି । “ଖେଳ ପଡ଼ିଆରେ ଦିନକୁ ଦିନ ଲୋକଙ୍କ ଭିଡ଼ ବଢ଼ୁଛି, କିନ୍ତୁ ପିଇବା ପାଣି ପାଇଁ କୌଣସି ବ୍ୟବସ୍ଥା ନଥିବାରୁ ଆମେ ଅସୁବିଧାରେ ପଡ଼ୁଛୁ । ତେଣୁ ଶୀଘ୍ର ଏଠାରେ ଏକ ନଳକୂପ ଖନନ କରାଯିବା ଅତ୍ୟାବଶ୍ୟକ ।” ଏହି ପରିସ୍ଥିତିରେ ଗ୍ରାମବାସୀମାନେ ଜିଲ୍ଲା ପ୍ରଶାସନ ଓ ସମ୍ପୃକ୍ତ ବିଭାଗଙ୍କୁ ଆବେଦନ କରିଛନ୍ତି ଯେ, ଟଟୋପରା ଖେଳ ପଡ଼ିଆରେ ଶୀଘ୍ର ଏକ ନୂତନ ନଳକୂପ ଖନନ କରି ପିଇବା ପାଣି ସୁବିଧା ଯୋଗାଇଦିଆଯାଉ । ଏହା ଦ୍ୱାରା ଏଠାକୁ ଆସୁଥିବା କ୍ରିଡାବିତ୍, ସ୍କୁଲ ଛାତ୍ରଛାତ୍ରୀ ଓ ସ୍ଥାନୀୟ ଲୋକେ ଲାଭାନ୍ୱିତ ହେବେ ।
