ଓଡ଼ିଆ ବାର୍ତ୍ତା/ ଭୁବନେଶ୍ୱର (କୃଷ୍ଣ କୁମାର ମହାନ୍ତି): ଓଡ଼ିଶାର ବିଶେଷ ଭାବେ ବିପନ୍ନ ଜନଜାତି ଗୋଷ୍ଠୀଙ୍କ ସାମାଜିକ, ସାଂସ୍କୃତିକ ଓ ସ୍ୱାସ୍ଥ୍ୟ ସ୍ଥିତି ଉପରେ ଉତ୍କଳ ବିଶ୍ୱବିଦ୍ୟାଳୟ ପକ୍ଷରୁ ଏକ ବ୍ୟାପକ ବୈଷୟିକ ରିପୋର୍ଟ ପ୍ରକାଶ ପାଇଛି। ଏହି ଉପଲକ୍ଷେ ଲୋକସେବା ଭବନ ଠାରେ ଆୟୋଜିତ ସ୍ୱତନ୍ତ୍ର କାର୍ଯ୍ୟକ୍ରମରେ ଓଡ଼ିଶାର ମାନ୍ୟବର ରାଜ୍ୟପାଳ ତଥା ଉତ୍କଳ ବିଶ୍ୱବିଦ୍ୟାଳୟର କୁଳାଧିପତି ଡଃ ହରିବାବୁ କମ୍ଭମପତି ଏହି ସାକ୍ଷ୍ୟ-ଆଧାରିତ ରିପୋର୍ଟକୁ ଆନୁଷ୍ଠାନିକ ଭାବେ ଉନ୍ମୋଚନ କରିଛନ୍ତି। ଉତ୍କଳ ବିଶ୍ୱବିଦ୍ୟାଳୟର ‘ସେଣ୍ଟର ଅଫ୍ ଏକ୍ସଲେନ୍ସ ଇନ୍ ଷ୍ଟଡିଜ୍ ଅନ୍ ଟ୍ରାଇବାଲ୍ ଆଣ୍ଡ ମାର୍ଜିନାଲାଇଜ୍ଡ କମ୍ୟୁନିଟିଜ୍’ ଦ୍ୱାରା ପ୍ରସ୍ତୁତ ଏହି ରିପୋର୍ଟ ପାଇଁ ରାଜ୍ୟର ୭ଟି ପ୍ରମୁଖ ଜିଲ୍ଲାର ୧୦ଟି ବିପନ୍ନ ଜନଜାତି ସମୁଦାୟର ୯,୨୨୨ ଜଣ ବ୍ୟକ୍ତିଙ୍କୁ ନେଇ ଆନ୍ତଃ-ବିଭାଗୀୟ ସର୍ଭେ କରାଯାଇଥିଲା। ଗବେଷଣାରୁ ଜନଜାତି ସମୁଦାୟଙ୍କ ମଧ୍ୟରେ ସୁଦୃଢ଼ ସାଂସ୍କୃତିକ ନିରନ୍ତରତା ଏବଂ ପରିବାର ନିୟୋଜନ ପ୍ରତି ବଢ଼ୁଥିବା ସଚେତନତା ଭଳି ସକାରାତ୍ମକ ଦିଗ ସାମ୍ନାକୁ ଆସିଛି। ଏହା ସହିତ ସେମାନଙ୍କ କ୍ଷେତ୍ରେ ଦୀର୍ଘକାଳୀନ ପୁଷ୍ଟିହୀନତା, ରକ୍ତହୀନତା, ନିମ୍ନ ସାକ୍ଷରତା ଓ ଦୁର୍ବଳ ମାତୃ ସ୍ୱାସ୍ଥ୍ୟ ଭଳି ଗମ୍ଭୀର ଆହ୍ୱାନ ଏପର୍ଯ୍ୟନ୍ତ ରହିଥିବା ମଧ୍ୟ ରିପୋର୍ଟରେ ଚିହ୍ନଟ କରାଯାଇଛି। ଏହି ଅବସରେ ଉତ୍କଳ ବିଶ୍ୱବିଦ୍ୟାଳୟର କୁଳପତି ପ୍ରଫେସର ଚଣ୍ଡୀ ପ୍ରସାଦ ନନ୍ଦ ପ୍ରକାଶ କରିଛନ୍ତି ଯେ, ଏହି ଗବେଷଣା ମଡେଲକୁ ସମଗ୍ର ପୂର୍ବ ଭାରତ ତଥା ଦେଶର ସମସ୍ତ ୭୫ଟି ବିପନ୍ନ ଜନଜାତିଙ୍କ ପାଖକୁ ସମ୍ପ୍ରସାରିତ କରି ସଠିକ୍ ନୀତି ପ୍ରଣୟନ ପାଇଁ ଏକ ଦୃଢ଼ ଜାତୀୟ ତଥ୍ୟ ଭିତ୍ତିଭୂମି ସୃଷ୍ଟି କରିବାକୁ ବିଶ୍ୱବିଦ୍ୟାଳୟ ସମ୍ପୂର୍ଣ୍ଣ ପ୍ରସ୍ତୁତ ରହିଛି। ଜନଜାତିଙ୍କ ସ୍ଥାୟୀ ବିକାଶ ପାଇଁ ପ୍ରତ୍ୟେକ ସମୁଦାୟର ସ୍ୱତନ୍ତ୍ର ଆବଶ୍ୟକତା ଅନୁଯାୟୀ ଭିନ୍ନ ଭିନ୍ନ ଯୋଜନା ପ୍ରସ୍ତୁତ କରିବାକୁ ଏହି ରିପୋର୍ଟରେ ସୁପାରିଶ କରାଯାଇଛି।
