କୋକସରା, (ହିରଣ୍ୟ ବେହେରା): କୋକସରା ବ୍ଲକ ଆମପାଣି ଥାନା ବିଜୁ ଏକ୍ସପ୍ରେସ ୱେ ରାସ୍ତା ବଡ଼କେନ୍ଦୁଗୁଡ଼ା ବଜାର ପଡ଼ିଆ ନିକଟରେ ମଙ୍ଗଳବାର ବିଳମ୍ବିତ ରାତିରେ ବାଇକ୍ ଓ କୁକୁର ମଧ୍ୟରେ ଧକ୍କା ହେବା ଫଳରେ ବାଇକ୍ ଚାଳକଙ୍କ ଘଟଣା ସ୍ଥଳରେ ହିଁ ମୃତ ହୋଇଥିଲା। ମୃତ ବ୍ୟକ୍ତି ଜଣକ ଡୁଡୁକାଠେଙ୍ଗା ଗ୍ରାମର ସଂଜୟ କୁମାର ଦାସ (୩୫) । ସେ ଆମପାଣିରୁ ନିଜ ଘରକୁ ଫେରୁଥିଲେ । ବଡ଼କେନ୍ଦୁଗୁଡ଼ା ନିକଟସ୍ଥ ବଜାର ପଡ଼ିଆ ନିକଟରେ କୁକୁର ସହିତ ତାଙ୍କର ମୁହାଁ ମୁହିଁ ହୋଇଥିଲା । ଫଳରେ ଭାରସାମ୍ୟ ହରାଇ ଘଟଣା ସ୍ଥଳରେ ହିଁ ତାଙ୍କର ମୃତ୍ୟୁ ହୋଇଥିଲା । ଖବର ପାଇ ଆମପାଣି ପୋଲିସ ଘଟଣା ସ୍ଥଳରେ ପହଞ୍ଚି ଶବ ଜବତ କରିବା ସହ ଶବ ବ୍ୟବଚ୍ଛେଦ ପରେ ପରିବାରକୁ ହସ୍ତାନ୍ତର କରିଛନ୍ତି । ଏ ନେଇ ଆମପାଣି ଥାନାରେ ଏକ ଦୁର୍ଘଟଣା ଜନିତ ମାମଲା ରୁଜୁ ହୋଇଥିବା ନେଇ ତଦନ୍ତକାରୀ ପୋଲିସ ଅଧିକାରୀ ରାଜେଶ ପରିଡା ସୂଚନା ଦେଇଛନ୍ତି ।
