ଓଡ଼ିଆ ବାର୍ତ୍ତା/ ଟିକ୍ରାପଡ଼ା (ରମାକାନ୍ତ ରାଜପଲିଆ): ସଇଁତଲା ବ୍ଲକ ଯୁ୍ରାବନ୍ଧ ପଞ୍ଚାୟତ ନୁଆଁମୁଣ୍ଡା ଗ୍ରାମ ନିବାସୀ ତଥା ବଲାଙ୍ଗୀର ସାଂସଦଙ୍କ ସଇଁତଲା ବ୍ଲକ ପ୍ରତିନିଧି ଗଦାଧର ବଗର୍ତ୍ତୀ (୫୫)ଙ୍କ ଶୁକ୍ରବାର ଏକ ସଡ଼କ ଦୁର୍ଘଟଣାରେ ଅକାଳ ମୃତ୍ୟୁ ହୋଇଛି | ଦୁର୍ଘଟଣା ଯୋଗୁଁ ତାଙ୍କୁ ବଲାଙ୍ଗୀର ଭୀମଭୋଇ ମେଡିକାଲରେ ଭର୍ତ୍ତି କରାଯାଇଥିଲା | ବଲାଙ୍ଗୀରରୁ ବୁର୍ଲା ମେଡିକାଲ ନିଆଯାଇଥିବା ବେଳେ ସେଠାରେ ଡାକ୍ତର ଗଦାଧରଙ୍କୁ ମୃତ ଘୋଷଣା କରିଥିଲେ | ଦୀର୍ଘ ୩୦ରୁ ଉର୍ଦ୍ଧ୍ୱ ବର୍ଷ ଧରି ସେ ବିଜେପିରେ ରହି ଅଞ୍ଚଳ ଲୋକଙ୍କ ତୃଣମୂଳ ସ୍ତରର ବିଭିନ୍ନ ସମସ୍ୟା ସମାଧାନ ନେଇ କାର୍ଯ୍ୟ କରି ସାଧାରଣରେ ପ୍ରଶଂସାର ପାତ୍ର ହୋଇପାରିଥିଲେ | ୨ ମାସ ତଳେ ତାଙ୍କୁ ସାଂସଦ ପ୍ରତିନିଧି ଦାୟିତ୍ୱ ମିଳିଥିଲା | ତା’ ପୂର୍ଵରୁ ସେ ଟିକ୍ରାପଡ଼ା ମଣ୍ଡଳ ସଭାପତି ଦାୟିତ୍ୱ ତୁଲାଉଥିଲେ | ଏହା ସହ ସେ ଯୁରାବନ୍ଧ ପଞ୍ଚାୟତ ଯାଦବ ସମାଜ ସଭାପତି ଭାବେ ଦୀର୍ଘ ବର୍ଷ ହେବ ସକ୍ରିୟ ରହି ସମାଜ ଲୋକଙ୍କ ଉନ୍ନତି ପାଇଁ ସତତ ପ୍ରଯତ୍ନଶୀଳ ରହିଥିଲେ |ଗଦାଧର ଜଣେ ମେଳାପୀ ତଥା ସରଳ ସ୍ଵଭାଵର ବ୍ୟକ୍ତି ଥିଲେ | ଗଦାଧରଙ୍କ ୨ ପୁଅ ବାବୁନା (୧୩), ବାପି (୧୦) ଏବଂ ଧର୍ମପତ୍ନୀ ରହିଛନ୍ତି | ତା’ଙ୍କ ବିୟୋଗରେ ବିଭିନ୍ନ ରାଜନୈତିକ ଦଳ, ଯାଦବ ସମାଜ, ସାମାଜିକ ସଂଗଠନ ଓ ଅନ୍ୟାନ୍ୟ ମହଲରେ ଗଭୀର ଶୋକ ପ୍ରକାଶ ପାଇଛି |
