ଓଡ଼ିଆ ବାର୍ତ୍ତା/ ବାଲିଗୁଡା (ସଞ୍ଜୟ କୁମାର ପାଣିଗ୍ରାହୀ): କନ୍ଧମାଳ ଜିଲ୍ଲା ବାଲିଗୁଡ଼ା ନୂଆସାହିର ଅର୍ଜୁନ ନାୟକ ଓ ଫୁଲ ନାୟକଙ୍କ ବଡ଼ ପୁଅ ଅଭିଜ୍ଞାନ ନାୟକ ଷଷ୍ଠ ଶ୍ରେଣୀରୁ ଖେଳପ୍ରତି ଆଗ୍ରହ ରଖି ସ୍କୁଲ ସ୍ତରରେ ଜିଲ୍ଲାସ୍ତରୀୟ କବାଡ଼ି ଖେଳି ପ୍ରଥମ ସ୍ଥାନ ହାସଲ କରିଥିଲେ। ଏହି ପୁରସ୍କାର ଅଭିଜ୍ଞାନଙ୍କୁ ଖେଳ ଜଗତରେ ଆଗକୁ ବଢିବା ପାଇଁ ବେଶ ଉତ୍ସାହ ଦେଇଥିଲା। ଯାହାକି ଆଜି ତାଙ୍କୁ ଜାତୀୟସ୍ତରକୁ ପହଞ୍ଚାଇ ଦେଇଛି। ବର୍ତ୍ତମାନ ଅଭିଜ୍ଞାନ ଯୁକ୍ତ ଦୁଇ ଦ୍ଵିତୀୟ ବର୍ଷର ଦାରିଙ୍ଗବାଡ଼ି ଆମ୍ବେଦକର ମହାବିଦ୍ୟାଳୟର ଛାତ୍ର। ଯୁକ୍ତଦୁଇ ପ୍ରଥମ ବର୍ଷରେ ମହାବିଦ୍ୟାଳୟ କ୍ରୀଡ଼ାରେ ଉତ୍ତୀର୍ଣ୍ଣ ହୋଇ ସେ ଓଡ଼ିଶା କବାଡ଼ି (ଜୁନିୟର) ଦଳର ଅଧିନାୟକ ଭାବେ ମନୋନୀତ ହୋଇଥିଲେ। ତାଙ୍କ ଦଳକୁ ନେଇ ହରିୟାନା, ମଧ୍ୟପ୍ରଦେଶ ଓ କର୍ଣ୍ଣାଟକ ଆଦି ବିଭିନ୍ନ ରାଜ୍ୟକୁ ଯାଇ ଖେଳିଛନ୍ତି। ସେ ହରିୟାନାରେ ଚାଲିଥିବା ପ୍ରତିଯୋଗିତାରେ ଓଡ଼ିଶା ଦଳ ତୃତୀୟ ସ୍ଥାନରେ ରହିଥିଲା। ଅଧିକ ପ୍ରୋତ୍ସାହନ ମିଳିଲେ ଏହି ଯୁବ କ୍ରୀଡ଼ାବିତ ଜାତୀୟସ୍ତରରେ ନାଁ ରଖିବେ ବୋଲି କହିଛନ୍ତି। ଉପଖଣ୍ଡ କ୍ରୀଡ଼ା ସଂଘର ସମ୍ପାଦକ ଡ. ସୁଶାନ୍ତ ଦାସ କହିଛନ୍ତି ଯେ, ଆମ କ୍ରୀଡ଼ାସଂଘ ତରଫରୁ ଏହିଭଳି କ୍ରୀଡ଼ାବିତଙ୍କୁ ସହଯୋଗର ହାତ ବଢ଼ାଇବା ସହ ଏମାନେ କିଭଳି ଭାବେ ଭଲ କ୍ରୀଡ଼ା ପ୍ରଦର୍ଶନ କରିପାରିବେ ତାହାର ଚେଷ୍ଟା ଜାରି ରହିଛି।
