ଓଡ଼ିଆ ବାର୍ତ୍ତା/ ଭବାନୀପାଟଣା: ମାଁ ମାଣିକେଶ୍ଵରୀ ବିଶ୍ୱବିଦ୍ୟାଳୟ କ୍ୟାମ୍ପସରେ ଇନ୍ଦିରାଗାନ୍ଧୀ ଜାତୀୟ ମୁକ୍ତ ବିଶ୍ୱବିଦ୍ୟାଳୟ (ଇଗ୍ନୁ) ପକ୍ଷରୁ ଦ୍ୱିତୀୟ ଡିଗ୍ରୀ ସୁଯୋଗ ଓ ଦୂରଶିକ୍ଷା କାର୍ଯ୍ୟକ୍ରମ ସମ୍ପର୍କରେ ସଚେତନତା ସୃଷ୍ଟି ପାଇଁ ଏକ ପ୍ରଚାରମୂଳକ ସଭା ଅନୁଷ୍ଠିତ ହୋଇଯାଇଛି। ଏହି କାର୍ଯ୍ୟକ୍ରମକୁ ଏମ୍ଏମ୍ୟୁ ଅଧ୍ୟୟନ କେନ୍ଦ୍ରର ସମନ୍ୱୟକ ଡ଼ଃ ସୁବ୍ରତ କୁମାର ପଣିଗ୍ରାହୀ ସମନ୍ୱୟ କରିଥିଲେ। ଏଥିରେ ୨୦୦ରୁ ଅଧିକ ଛାତ୍ରଛାତ୍ରୀ ସକ୍ରିୟଭାବେ ଅଂଶଗ୍ରହଣ କରିଥିଲେ। ସଭାକୁ ସମ୍ବୋଧିତ କରି ଡ଼ଃ ପଣିଗ୍ରାହୀ ଏକାଧାରେ ଦୁଇଟି ଡିଗ୍ରୀ ଅର୍ଜନ କରିବାର ଲାଭ ସମ୍ପର୍କରେ ଆଲୋକପାତ କରିଥିଲେ। ଏକଟି ନିୟମିତ ମୋଡ୍ରେ ଓ ଅନ୍ୟଟି ଦୂରଶିକ୍ଷା ମୋଡ୍ରେ, ଯଥା ଇନ୍ଦିରାଗାନ୍ଧୀ ଜାତୀୟ ମୁକ୍ତ ବିଶ୍ୱବିଦ୍ୟାଳୟ (ଇଗ୍ନୁ) ମାଧ୍ୟମରେ। ସେ କହିଥିଲେ ଯେ ଏହି ବ୍ୟବସ୍ଥା ଜାତୀୟ ଶିକ୍ଷା ନୀତି (ଏନଇପି) ୨୦୨୦ ଅନୁଯାୟୀ ଅନୁମୋଦିତ ଓ ନିର୍ଦ୍ଦିଷ୍ଟ ନିୟମାବଳୀ ଅନୁସାରେ ଛାତ୍ରଛାତ୍ରୀମାନେ ଦୁଇଟି ଡିଗ୍ରୀ ପଢ଼ିପାରିବେ। ଇଗ୍ନୁର ପରାମର୍ଶଦାତା ଆଦିତ୍ୟ ନାରାୟଣ ପ୍ରଧାନ ଅନଲାଇନ୍ ଆବେଦନ ଓ ଭର୍ତ୍ତି ପ୍ରକ୍ରିୟା ବିଷୟରେ ବିସ୍ତୃତ ଭାବେ ଅଲୋଚନା କରି ଛାତ୍ରଛାତ୍ରୀମାନଙ୍କୁ ବିଭିନ୍ନ କୋର୍ସରେ କିପରି ଆବେଦନ କରିବେ ସେଥିପାଇଁ ପରାମର୍ଶ ଦେଇଥିଲେ। ଅନ୍ୟ ଜଣେ ପରାମର୍ଶଦାତା ଡ଼ଃ ଘନଶ୍ୟାମ ବେହେରା କହିଥିଲେ ଯେ ପ୍ରତ୍ୟେକ ଛାତ୍ରଛାତ୍ରୀ ନିଜ କଲେଜ ଜୀବନକାଳରେ କମ୍ ସେ କମ୍ ଏକଟି ସର୍ଟିଫିକେଟ୍ କିମ୍ବା ଡିପ୍ଲୋମା କୋର୍ସ ଇଗ୍ନୁରୁ ଅଧ୍ୟୟନ କରିବା ଉଚିତ, ଯାହା ତାଙ୍କର ଶିକ୍ଷାଗତ ଯୋଗ୍ୟତା ଓ ଚାକିରି ସୁଯୋଗକୁ ବୃଦ୍ଧି କରିବ। ବକ୍ତାମାନେ କହିଥିଲେ ଯେ ଇଗ୍ନୁ ଦୂରଶିକ୍ଷା ଓ ଅନଲାଇନ୍ ମାଧ୍ୟମରେ ସର୍ଟିଫିକେଟ୍, ଡିପ୍ଲୋମା, ସ୍ନାତକ ଓ ସ୍ନାତକୋତ୍ତର ସହ ବିଭିନ୍ନ ପ୍ରକାରର କୋର୍ସ ପ୍ରଦାନ କରୁଛି। ସଂସ୍ଥାର ସହଜ ଶୁଳ୍କ ଗଠନ ଓ ଛାତ୍ରମୁଖୀ ପ୍ରଣାଳୀକୁ ଆର୍ଥିକ ଭାବେ ଅସମର୍ଥ ଓ ଭୌଗୋଳିକ ଭାବେ ପଛୁଆ ଅଞ୍ଚଳର ଛାତ୍ରଛାତ୍ରୀଙ୍କ ପାଇଁ ବିଶେଷ ଲାଭଦାୟକ ବୋଲି ଉଲ୍ଲେଖ କରାଯାଇଥିଲା। ଏହି ସଭାରେ ଅନ୍ୟାନ୍ୟ ଶିକ୍ଷକମାନେ ମଧ୍ୟ ଉପସ୍ଥିତ ଥିଲେ। କାର୍ଯ୍ୟକ୍ରମରେ ଛାତ୍ରଛାତ୍ରୀମାନଙ୍କର ଉତ୍ସାହଜନକ ସହଭାଗିତା ଦେଖାଯାଇଥିଲା ଓ ଅନେକେ ଇଗ୍ନୁ କୋର୍ସରେ ଭର୍ତ୍ତି ହେବାକୁ ଆଗ୍ରହ ପ୍ରକାଶ କରିଥିଲେ। ଛାତ୍ରଛାତ୍ରୀମାନେ ଏହା ଜାଣି ଖୁସି ପ୍ରକାଶ କରିଥିଲେ ଯେ ଏହି କୋର୍ସଗୁଡ଼ିକ ପାଇଁ ଛାତ୍ରବୃତ୍ତି ସୁବିଧା ମଧ୍ୟ ଉପଲବ୍ଧ ଅଛି।
