ଓଡ଼ିଆ ବାର୍ତ୍ତା/ ଭୁବନେଶ୍ୱର (କୃଷ୍ଣ କୁମାର ମହାନ୍ତି): ଉତ୍କଳ ବିଶ୍ୱବିଦ୍ୟାଳୟର ‘ଶକ୍ତିଶ୍ରୀ’ ସଶକ୍ତିକରଣ କେନ୍ଦ୍ର ଏବଂ ସ୍ନାତକୋତ୍ତର ମନୋବିଜ୍ଞାନ ବିଭାଗର ମିଳିତ ଆନୁକୂଲ୍ୟରେ ବିଶ୍ୱବିଦ୍ୟାଳୟର ମନୋବିଜ୍ଞାନ ବିଭାଗ ପରିସରରେ ‘ଆତ୍ମହତ୍ୟା ନିରାକରଣ’ ଉପରେ ଏକ ସଚେତନତା କାର୍ଯ୍ୟକ୍ରମ ଆୟୋଜିତ ହୋଇଯାଇଛି।
ଏହି କାର୍ଯ୍ୟକ୍ରମରେ ତ୍ରିପୁରା ବିଶ୍ୱବିଦ୍ୟାଳୟ ମନୋବିଜ୍ଞାନ ବିଭାଗର ମୁଖ୍ୟ ପ୍ରଫେସର ଅଞ୍ଜନା ଭଟ୍ଟାଚାର୍ଜୀ ମୁଖ୍ୟବକ୍ତା ଭାବେ ଯୋଗଦେଇ ମାନସିକ ସ୍ୱାସ୍ଥ୍ୟ ସଚେତନତାର ଗୁରୁତ୍ୱ ଉପରେ ଆଲୋକପାତ କରିବା ସହ ଆତ୍ମହତ୍ୟା ରୋକିବା ପାଇଁ ପ୍ରଭାବଶାଳୀ କୌଶଳ ବିଷୟରେ ଆଲୋଚନା କରିଥିଲେ। ସେ ଆତ୍ମହତ୍ୟା ପ୍ରବୃତ୍ତି ସହ ଜଡ଼ିତ ବିଭିନ୍ନ ପ୍ରାରମ୍ଭିକ ଲକ୍ଷଣ ବିଷୟରେ ବିସ୍ତୃତ ଭାବେ ବୁଝାଇବା ସହ ଜୀବନ ରକ୍ଷା ପାଇଁ ସଠିକ୍ ସମୟରେ ହସ୍ତକ୍ଷେପ, ସହାନୁଭୂତି ଏବଂ ମାନସିକ ସହଯୋଗର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ।
ଏହି ସ୍ୱତନ୍ତ୍ର ଆଲୋଚନାଚକ୍ରରେ ବିଶ୍ୱବିଦ୍ୟାଳୟର ବିଭିନ୍ନ ବିଭାଗର ଛାତ୍ରଛାତ୍ରୀମାନେ ଉତ୍ସାହର ସହ ଅଂଶଗ୍ରହଣ କରିଥିଲେ। ପ୍ରଫେସର ଭଟ୍ଟାଚାର୍ଜୀ ଛାତ୍ରଛାତ୍ରୀମାନଙ୍କର ସମସ୍ତ ପ୍ରଶ୍ନର ଅତି ଧୈର୍ଯ୍ୟର ସହ ଉତ୍ତର ଦେଇଥିଲେ, ଯାହା ଏହି କାର୍ଯ୍ୟକ୍ରମକୁ ଅତ୍ୟନ୍ତ ସୂଚନାପ୍ରଦ ଏବଂ ପ୍ରଭାବଶାଳୀ କରିଥିଲା। ଉତ୍କଳ ବିଶ୍ୱବିଦ୍ୟାଳୟର ମନୋବିଜ୍ଞାନ ବିଭାଗର ମୁଖ୍ୟ ପ୍ରଫେସର ଭାସ୍ୱତୀ ପଟ୍ଟନାୟକ ସମସ୍ତ ଅଂଶୀଦାରମାନଙ୍କୁ ସ୍ୱାଗତ କରିଥିବା ବେଳେ ଶକ୍ତିଶ୍ରୀ ସଶକ୍ତିକରଣ କେନ୍ଦ୍ରର ସଂଯୋଜିକା ଡଃ ସ୍ୱପ୍ନା ପ୍ରଭୁ ଧନ୍ୟବାଦ ଅର୍ପଣ କରିଥିଲେ। ମାନସିକ ସୁସ୍ଥତା ଏବଂ ଆତ୍ମହତ୍ୟା ନିରାକରଣ କ୍ଷେତ୍ରରେ ଏହି କାର୍ଯ୍ୟକ୍ରମର ପ୍ରାସଙ୍ଗିକତା ଓ ମୂଲ୍ୟବାନ ତଥ୍ୟକୁ ସମସ୍ତ ଅଂଶଗ୍ରହଣକାରୀ ଉଚ୍ଚ ପ୍ରଶଂସା କରିଥିଲେ।
