ଓଡ଼ିଆ ବାର୍ତ୍ତା/ ବାଲେଶ୍ଵର (କୃଷ୍ଣ କୁମାର ମହାନ୍ତି): ଲଗାଣ ବର୍ଷା ଯୋଗୁଁ ବାଙ୍ଗିରିପୋଷି–ରୂପସା ରେଳପଥର ଭଞ୍ଜପୁର–ବେତନଟୀ ମଧ୍ୟରେ ରେଳଧାରଣା ତଳୁ ମାଟି ଧୋଇଯିବା ପରେ ଖରଗପୁର ଡିଭିଜନ ପକ୍ଷରୁ ଯୁଦ୍ଧକାଳୀନ ଭିତ୍ତିରେ ପୁନରୁଦ୍ଧାର କାର୍ଯ୍ୟ ଆରମ୍ଭ କରାଯାଇଛି। ରେଳପଥର ସୁରକ୍ଷା ଓ ସ୍ଥିରତା ସୁନିଶ୍ଚିତ କରିବା ସହ ଯଥାଶୀଘ୍ର ଟ୍ରେନ୍ ଚଳାଚଳ ସ୍ୱାଭାବିକ କରିବା ଲକ୍ଷ୍ୟରେ କାର୍ଯ୍ୟ ଜୋରଦାର କରାଯାଇଛି। ଲଗାଣ ଓ ଅବିରତ ବର୍ଷା ଯୋଗୁଁ ଭଞ୍ଜପୁର ଓ ବେତନଟୀ ମଧ୍ୟରେ ରେଳପଥର ବ୍ୟାଙ୍କ ସ୍ଲିପ୍ ହୋଇଥିଲା। ଫଳରେ ରେଳଧାରଣା ତଳେ ଥିବା ମାଟିର ଏକ ଅଂଶ ଧୋଇଯାଇଥିଲା। ଘଟଣା ସମ୍ପର୍କରେ ଖରଗପୁର ଡିଭିଜନ ପକ୍ଷରୁ ତୁରନ୍ତ ସ୍ଥିତି ସମୀକ୍ଷା କରାଯାଇ ରେଳପଥର ସୁରକ୍ଷା ଓ ସ୍ଥାୟୀତ୍ୱ ପାଇଁ ଜରୁରୀ ପୁନରୁଦ୍ଧାର କାର୍ଯ୍ୟ ହାତକୁ ନିଆଯାଇଛି। ପ୍ରଭାବିତ ଅଞ୍ଚଳକୁ ମଜବୁତ କରିବା ସହ ନିକଟସ୍ଥ ରେଳପଥର ଫର୍ମେସନକୁ ସୁଦୃଢ଼ କରିବା ଏବଂ ଆଗକୁ ମାଟି ଧୋଇଯିବା ରୋକିବାକୁ ପ୍ରାଥମିକତା ଦିଆଯାଇଛି। ନିର୍ଦ୍ଧାରିତ ସମସ୍ତ ସୁରକ୍ଷା ମାନଦଣ୍ଡକୁ ପାଳନ କରି ଯଥାଶୀଘ୍ର ରେଳପଥ ପୁନରୁଦ୍ଧାର ପାଇଁ ପଦକ୍ଷେପ ନିଆଯାଉଛି।ଖରଗପୁର ଡିଭିଜନର ଡିଆରଏମ୍ ଶ୍ରୀ ଲଲିତ ମୋହନ ପାଣ୍ଡେ ପ୍ରଭାବିତ ସ୍ଥାନ ପରିଦର୍ଶନ କରି ଚାଲିଥିବା ପୁନରୁଦ୍ଧାର କାର୍ଯ୍ୟର ସମୀକ୍ଷା କରିଛନ୍ତି। ରେଳପଥର ସୁରକ୍ଷା ଓ ଗୁଣବତ୍ତାକୁ ସର୍ବୋଚ୍ଚ ପ୍ରାଥମିକତା ଦେଇ କାର୍ଯ୍ୟକୁ ତ୍ୱରାନ୍ୱିତ କରିବା ପାଇଁ ସେ ସମ୍ପୃକ୍ତ ଅଧିକାରୀଙ୍କୁ ଆବଶ୍ୟକ ନିର୍ଦ୍ଦେଶ ଦେଇଛନ୍ତି। ରେଳବାଇର ଇଞ୍ଜିନିୟରିଂ ସମେତ ବିଭିନ୍ନ ବିଭାଗର ଅଧିକାରୀ ଓ କର୍ମଚାରୀମାନେ ସକାଳୁ ଘଟଣାସ୍ଥଳରେ ଉପସ୍ଥିତ ରହି ପୁନରୁଦ୍ଧାର କାର୍ଯ୍ୟର ତଦାରଖ ଓ ନିରୀକ୍ଷଣ କରୁଛନ୍ତି। ଆବଶ୍ୟକତା ଅନୁଯାୟୀ ପର୍ଯ୍ୟାପ୍ତ ମାନବ ସମ୍ବଳ, ଯନ୍ତ୍ରପାତି ଓ ନିର୍ମାଣ ସାମଗ୍ରୀ ମୁତୟନ କରାଯାଇଛି। ବାଙ୍ଗିରିପୋଷି–ରୂପସା ରେଳପଥରେ ସୁରକ୍ଷିତ ଓ ଶୀଘ୍ର ଟ୍ରେନ୍ ଚଳାଚଳ ପୁନଃ ଆରମ୍ଭ କରିବା ଲକ୍ଷ୍ୟରେ ଖରଗପୁର ଡିଭିଜନ ପକ୍ଷରୁ ପୁନରୁଦ୍ଧାର କାର୍ଯ୍ୟକୁ ସମ୍ପୂର୍ଣ୍ଣ ଗୁରୁତ୍ୱ ଦିଆଯାଇଛି।
