ନୂଆପଡା: ନୂଆପଡା ଜିଲ୍ଲପାଳଙ୍କ କାର୍ଯ୍ୟାଳୟରେ କାର୍ଯ୍ୟରତ ଆସିଷ୍ଟାଣ୍ଟ କଲେକ୍ଟର ଜୟଲାଲ ବେଶ୍ରାଙ୍କ ଦୁର୍ଘଟଣା ଜନିତ ମୃତ୍ୟୁ ହୋଇଥିଲା। ପୋଲିସ ତଦନ୍ତରେ ଅସନ୍ତୋଷ ପ୍ରକାଶ କରି ମୃତକଙ୍କ ସ୍ତ୍ରୀ ବୈଜୟନ୍ତି କୋର୍ଟର ଆଶ୍ରୟ ନେଇଥିଲେ। ଏହି ଘଟଣାରେ କୋର୍ଟ ତତ୍କାଳୀନ ଦୁଇ ଜଣ ଆସିଷ୍ଟାଣ୍ଟ କଲେକ୍ଟର ତଥା ବର୍ତମାନର ସଦର ତହସିଲଦାର ଦେବେନ୍ଦ୍ର ରାଉତ, ଖରିଆର ରୋଡ ଏନଏସି ଇଓ କର୍ଣ୍ଣ ସୁନା ଓ ନଜିର ମଦନ ସାହୁଙ୍କ ବିରୋଧରେ ହତ୍ୟା ମାମଲା ରୁଜୁ କରିବାକୁ ନିର୍ଦ୍ଦେଶ ଦେଇଛନ୍ତି। ପ୍ରକାଶ ଯେ, ନୂଆପଡା ଜିଲ୍ଲପାଳ ଅଫିସରେ ଶ୍ରୀ ବେଶ୍ରା ଆସିଷ୍ଟାଣ୍ଟ କଲେକ୍ଟର ଭାବେ ନିୟୋଜିତ ଥିଲେ। ଗତ ୨୦୧୯ ଡିସେମ୍ବର ୩୦ରେ ତତ୍କାଳୀନ ଆସିଷ୍ଟାଣ୍ଟ କଲେକ୍ଟର ଶ୍ରୀ ସୁନା ଓ ଶ୍ରୀ ରାଉତ ଓ ନଜିର ମଦନ ସାହୁ ସହିତ ଅଫିସ କାମରେ ଖରିଆର ରୋଡ ଯାଉଥିଲେ। ଏହି ସମୟରେ ବସରୁ କୌଣସି ଏକ ସାମଗ୍ରୀ ଓହ୍ଲାଇବା ପାଇଁ ରାସ୍ତା ଅତିକ୍ରମ କରୁଥିବା ବେଳେ ଏକ ଅଜଣା ଗାଡି ତାଙ୍କୁ ଧକ୍କା ଦେଇଥିଲା। ତାଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ଜିଲ୍ଲା ମୁଖ୍ୟ ଚିକିତ୍ସାଲୟରେ ଭର୍ତ୍ତି କରିଥିଲେ। ସଂନ୍ଧ୍ୟାରେ ଆସିଷ୍ଟାଣ୍ଟ କଲେକ୍ଟର ଶ୍ରୀ ସୁନା, ଶ୍ରୀ ବେଶ୍ରାଙ୍କ ଘରକୁ ଆସି ଦୁର୍ଘଟଣା ବିଷୟରେ ଜଣାଇ ଥିଲେ। ପରେ ଆସିଷ୍ଟାଣ୍ଟ କଲେକ୍ଟର ଶ୍ରୀ ସୁନାଙ୍କ ସହ ବୈଜୟନ୍ତି ଡାକ୍ତରଖାନାକୁ ଯାଇଥିଲେ। ସେତେ ବେଳେ ଶ୍ରୀ ବେଶ୍ରା ଚେତାଶୁନ୍ୟ ଅବସ୍ଥାରେ ଥିଲେ। ତାଙ୍କର ସ୍ୱାସ୍ଥ୍ୟ ଅବସ୍ଥା ଶଙ୍କଟାପର୍ଣ୍ଣ ହେବାରୁ ରାୟପୁର ସ୍ଥିତ ଏକ ଘରୋଇ ଡାକରାଖାନାକୁ ସ୍ଥାନାନ୍ତର କରିଥିଲେ। ସେଠାରେ ଶ୍ରୀ ବେଶ୍ରା କୋମାରେ ରହିଥିଲେ। ଗତ ୨୦୨୦ ଜାନୁଆରୀ ୧୯ରେ ରାୟପୁରର ଅନ୍ୟ ଏକ ଘରୋଇ ଡାକ୍ତରଖାନାକୁ ସ୍ଥାନାନ୍ତର ହୋଇଥିଲେ। ଫେବୃଆରୀ ୨୨ରେ ଚିକିତ୍ସାଧିନ ଅବସ୍ଥା ରେ ତାଙ୍କର ମୃତ୍ୟୁ ହୋଇଥିଲା। ଗତ ୨୦୨୦ ଜାନୁଆରୀ ୩ରେ ସଦର ପୋଲିସ ବୈଜୟନ୍ତିଙ୍କ ଠାରୁ ଏକ ସାଧା କାଗଜରେ ଏକ ଦସ୍ତଖତ ନେଇଥିଲେ। ଏହି ଘଟଣାର ତଦନ୍ତ ବେଳେ ପୋଲିସ ପରିବାର ଲୋକଙ୍କୁ ସାମିଲ କରି ନଥିବା ବେଳେ ସହରର ସିସିଟିଭି ଫୁଟେଜ ମଧ୍ୟ ଯାଞ୍ଚ କରି ନଥିଲା। ଘଟଣାକୁ ହାଲୁକା ଭାବେ ନେଇ ତଦନ୍ତ ସାରି କୌଣସି ପ୍ରମାଣ ନଥିବା ଦର୍ଶାଇ ଦୁର୍ଘଟଣା ମାମଲା ରୁଜୁ କରି କୋର୍ଟକୁ ରିପୋର୍ଟ ପ୍ରଦାନ କରିଥିଲା। ପୋଲିସର ତଦନ୍ତ ରିପୋର୍ଟରେ ମୃତକଙ୍କ ସ୍ତ୍ରୀ ଅସନ୍ତୋଷ ପ୍ରକାଶ କରି ନୂଆପଡା କୋର୍ଟର ଦ୍ୱାରସ୍ଥ ହୋଇଥିଲେ। ପୂର୍ବରୁ ଆସିଷ୍ଟାଣ୍ଟ କଲେକ୍ଟର ଶ୍ରୀ ବେଶ୍ରାଙ୍କୁ ଦୁଇ ଆସିଷ୍ଟାଣ୍ଟ କଲେକ୍ଟର ଓ ନଜିର ଇର୍ଷା ହୋଇ ବଦନାମ କରିବାକୁ ଷଢଯନ୍ତ୍ର କରୁଥିବା ଏବଂ ତାଙ୍କ ଜୀବନ ପ୍ରତି ବିପଦ ରହିଥିବା ସ୍ୱାଗତ ବେଶ୍ରା ପୂର୍ବରୁ କହିଥିବା ସ୍ତ୍ରୀ ବୈଜୟନ୍ତୀ କୋର୍ଟରେ ଅଭିଯୋଗ କରିଥିଲେ। ଏହି ମାମଲା ଏସଡିଜେଏମ କୋର୍ଟରେ ବିଚାରଧିନ ଥିଲା। ଗତ ନଭେମ୍ବର ୧୬ରେ ଏସ. ଡି. ଜେ. ଏମ କୋର୍ଟ ଏହି ମାମଲାର ଶୁଣାଣି କରି ତତ୍କାଳୀନ ଆସିଷ୍ଟାଣ୍ଟ କଲେକ୍ଟର କର୍ଣ୍ଣ ସୁନା, ଦେବେନ୍ଦ୍ର ରାଉତ ଓ ନଜିର ମଦନ ସାହୁ ଙ୍କ ହତ୍ୟା ମାମଲା ରୁଜୁ କରି ଅଧିକ ତଦନ୍ତ ସହ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ସଦର ଥାନା ଅଧିକାରୀଙ୍କୁ ନିର୍ଦେଶ ଦେଇଛନ୍ତି।‌ଅଭିଯୋଗକାରୀ ବୈଜୟନ୍ତୀଙ୍କ ପକ୍ଷରୁ ଆଇନଜୀବୀ ଜୟ ଦେବ ସୁନାନୀ ମାମଲା ପରିଚାଳନା କରୁଥିଲେ। ଏହି ଘଟଣା ବର୍ତମାନ ଜିଲ୍ଲାରେ ଚର୍ଚ୍ଚାର ବିଷୟ ପାଲଟିଛି।