ଓଡ଼ିଆ ବାର୍ତ୍ତା/ ବାଲେଶ୍ୱର (କୃଷ୍ଣ କୁମାର ମହାନ୍ତି): ସ୍ଥାନୀୟ ରିଜର୍ଭ ପୋଲିସ ପ୍ୟାରେଡ଼ ପଡ଼ିଆଠାରେ ୬୧ତମ ବାଲେଶ୍ୱର ଗୃହରକ୍ଷୀ ବାହିନୀ ପ୍ରତିଷ୍ଠା ଦିବସ-୨୦୨୩ ଅନୁଷ୍ଠିତ ହୋଇ ଯାଇଛି। ଏହି ଅବସରରେ ମୁଖ୍ୟ ଅତିଥି ହିମାଂଶୁ କୁମାର ଲାଲ (ଭା.ପୁ.ସେ), ପୂର୍ବାଞ୍ଚଳ ଆଇ.ଜି ଏବଂ ଆରକ୍ଷୀ ଅଧିକ୍ଷକ ତଥା ଦୁର୍ଗପତି ଗୃହରକ୍ଷୀ ବାହିନୀ ସାଗରିକା ନାଥଙ୍କ ଉପସ୍ଥିତିରେ ପତାକା ଉତ୍ତୋଳନ ସମାରୋହ ଅନୁଷ୍ଠିତ ହୋଇଥିଲା। ମୁଖ୍ୟ ଅତିଥି ଭାବେ ଯୋଗଦେଇ ହିମାଂଶୁ କୁମାର ଲାଲ୍ (ଭା.ପୁ.ସେ) ଏହି ସମାବେଶକୁ ସମ୍ବୋଧିତ କରି ତଥା ଗୃହରକ୍ଷୀଙ୍କ ଦ୍ୱାରା ପ୍ରଦତ୍ତ ଆଦର୍ଶ ସେବାକୁ ପ୍ରଶଂସା କରି ପୋଲିସର ଉଦ୍ୟମକୁ ବୃଦ୍ଧି କରିବାରେ ସେମାନଙ୍କର ଗୁରୁତ୍ୱପୂର୍ଣ୍ଣ ଭୂମିକାକୁ ସ୍ୱୀକୃତି ଦେଇଥିଲେ। ଜନ ନିରାପତ୍ତା ପ୍ରତି ସେମାନଙ୍କର ନିରନ୍ତର ଉତ୍ସର୍ଗୀକୃତତା ପାଇଁ ସେ କୃତଜ୍ଞତା ଜଣାଇବା ସହ ସମାଜର ସୁରକ୍ଷା ସୁନିଶ୍ଚିତ କରିବାରେ ସହଯୋଗୀ ପ୍ରୟାସ ଉପରେ ଗୁରୁତ୍ୱାରୋପ କରିଥିଲେ। ଆଗାମୀ ସମୟରେ ମଧ୍ୟ ନିଷ୍ଠା ଓ ଅଧିକ ଉତ୍ସର୍ଗୀକୃତ ହୋଇ କର୍ତ୍ତବ୍ୟ କରିବା ପାଇଁ ଗୃହରକ୍ଷୀ ବାହିନୀକୁ ପ୍ରୋତ୍ସାହିତ କରିଥିଲେ। ଏହି ଅବସରରେ ଶ୍ରୀ ଲାଲ୍ ମହାମହିମ ରାଷ୍ଟ୍ରପତି, ମାନନୀୟ ରାଜ୍ୟପାଳ, ମାନ୍ୟବର ମୁଖ୍ୟମନ୍ତ୍ରୀ ଏବଂ ବରିଷ୍ଠ କେନ୍ଦ୍ର ଓ ରାଜ୍ୟସ୍ତରୀୟ ପଦାଧିକାରୀଙ୍କ ଅଭିନନ୍ଦନ ବାର୍ତ୍ତା ପଠନ କରିଥିଲେ। ଏହି ଅବସରରେ ବାଲେଶ୍ୱର ପୋଲିସ ବିଭାଗର ଅଧିକାରୀବୃନ୍ଦ, ଗୃହରକ୍ଷୀ ବାହିନୀର ଅଧିକାରୀ ଓ ଗଣମାଧ୍ୟମ ପ୍ରତିନିଧିମାନେ ଯୋଗ ଦେଇଥିଲେ।
