ଓଡ଼ିଆ ବାର୍ତ୍ତା/ ଜୟପୁର: ସଦଗୁରୁଦେବ ସତ୍ୟାନନ୍ଦ ସରସ୍ଵତୀ ମହାରାଜାଙ୍କ ୩୦ତମ ମହାପ୍ରୟାଣ ଦିବସ କାଳୀକୃଷ୍ଣ ମନ୍ଦିର, ଜୟପୁର ଠାରେ ପାଳିତ ହୋଇଯାଇଛି। ଗୁରୁ ଭ୍ରାତା ବଳଦେବାନନ୍ଦଜୀ ଗୁରୁଦେବଙ୍କ ଉଦ୍ଦେଶ୍ୟରେ ଶ୍ରାଦ୍ଧ ଓ ବ୍ରହ୍ମାଣ ଭୋଜନ କରିଥିଲେ। ସଂଧ୍ୟାରେ ଆୟୋଜିତ ସତସଙ୍ଗ କାର୍ଯ୍ୟକ୍ରମରେ ସଂଘ ପରିଚାଳକ ଜଗଦାନନ୍ଦଜୀ କହିଥିଲେ: ସତ୍ୟାନନ୍ଦ ସରସ୍ଵତୀଙ୍କ ଦର୍ଶନ ଅନନ୍ୟ, ଯାହାର ମହକରେ ମହକି ଯାଏ ଜୀବନ ଠାରୁ ଜଗତ, ମାଟି ଠାରୁ ଆକାଶ, ପିଣ୍ଡରୁ ବ୍ରହ୍ମାଣ୍ଡ, ଜନ୍ମରୁ କର୍ମ। ସମଗ୍ର ବିଶ୍ୱବାସୀଙ୍କ ଦୁଃଖ, ଶୋକ, ଦୈନ୍ୟତା ଯାହାଙ୍କ ହୃଦୟକୁ ମ୍ରିୟମାଣ କରୁଥିଲା ସେଥିପାଇଁ ତ ଉଦାର କଣ୍ଠରେ ଘୋଷଣା କରିଥିଲେ: “ଜଗତବାସୀଙ୍କ ଯେତେ ଦୁଃଖ ଅଛି ସବୁ ମୋର ମୁଣ୍ଡେ ଥୁଅ ମୋର ପୁଣ୍ୟ ଫଳ ସମସ୍ତେ ଭୋଗନ୍ତୁ ପାପ ସବୁ ମୋତେ ଦିଅ”। ଏହିପରି ଏକ ଉତ୍କର୍ଷ ତ୍ୟାଗ ଓ ଆଦର୍ଶରେ ଅନୁପ୍ରାଣୀତ ହୋଇ ଜନ ଜୀବନ ପାଇଁ ପ୍ରତିଷ୍ଠା କରିଥିଲେ କାଳୀକୃଷ୍ଣ ସଂଘ ଓ ଜଗତ କଲ୍ୟାଣ ସକାଶେ ଶନିବାର ଦିନ କାଳୀକୃଷ୍ଣ ମେଳା କରିବା କହିଥିଲେ।
ମଣିଷ ସବୁବେଳେ କିଛି ପ୍ରାପ୍ତି ଉଦ୍ଦେଶ୍ୟରେ କାର୍ଯ୍ୟ କରିବାକୁ ଭଲ ପାଏ। ସେଥିପାଇଁ ସତ୍ୟାନନ୍ଦ ସରସ୍ୱତୀ ମହାରାଜା ଜଗତ କଲ୍ୟାଣ ପାଇଁ ମାଁଙ୍କ ଠାରୁ ବରପ୍ରାପ୍ତି ହୋଇ କହିଥିଲେ: ଏହି ବର ଦିଅ ମାଗୋ ହୋଇଣ ହରଷ ଯେପରି ମାନବ ଜନ୍ମ ହୋଇବ ସରସ। ଆଉ ଦେବୀଙ୍କ ନିର୍ଦ୍ଦେଶ ଅନୁସାରେ ଯେଉଁ ଜନ ଶ୍ରଦ୍ଧା, ସମର୍ପଣ ଓ ଭକ୍ତି ସହ କାଳୀକୃଷ୍ଣ ଏକାଦଶ ମେଳା ବିଧାନ ଅନୁସାରେ ପାଳନ କରିବ ତାର ନିଶ୍ଚିତ ଇପ୍ସିତ କାମନା ପୂର୍ଣ୍ଣ ହୋଇଥାଏ। ପୂଜ୍ୟଶ୍ରୀ ଜଗଦାନନ୍ଦଜୀଙ୍କ ପ୍ରତ୍ୟକ୍ଷ ତତ୍ବାବଧାନରେ ସମସ୍ତ ଆୟୋଜିତ କାର୍ଯ୍ୟକ୍ରମରେ ଜୟପୁର ଭାଇ, ଭଉଣୀମାନେ ପରିଚାଳନାରେ ସହଯୋଗ କରିଥିଲେ।
