ଓଡ଼ିଆ ବାର୍ତ୍ତା/ ବାଲେଶ୍ୱର (କୃଷ୍ଣ କୁମାର ମହାନ୍ତି): ବାଲେଶ୍ୱର ସହରରେ ଅଗ୍ନିକାଣ୍ଡ ଘଟଣା ଥମିବାର ନାଁ ନେଉନାହିଁ। କିଛିଦିନ ତଳେ ଡିଆଇସି ଛକ ନିକଟସ୍ଥ ଏକ ହୋଟେଲରେ ଅଗ୍ନିକାଣ୍ଡ ପରେ ଆଜି ବୁଧବାର ସହଦେବଖୁଣ୍ଟା ନିକଟରେ ଥିବା ଏକ ହୀରୋ ସୋରୁମ୍ରେ ଭୟାବହ ଅଗ୍ନିକାଣ୍ଡ ଘଟିଛି। ଏଥିରେ ସୋରୁମ୍ରେ ଥିବା ଏକାଧିକ ଦୁଇଚକିଆ ଯାନ ସମେତ ବିଭିନ୍ନ ଉପକରଣ ଓ ସାମଗ୍ରୀ ଜଳିଯାଇଥିବା ବେଳେ ଲକ୍ଷାଧିକ ଟଙ୍କାର ସମ୍ପତ୍ତି ନଷ୍ଟ ହୋଇଥିବା ପ୍ରାଥମିକ ଆକଳନରୁ ଜଣାପଡିଛି। ବୁଧବାର ସକାଳେ ସୋରୁମ୍ ଭିତରୁ ଘନ ଧୂଆଁ ବାହାରୁଥିବା କର୍ମଚାରୀ ଓ ସ୍ଥାନୀୟ ଲୋକେ ଦେଖି ତୁରନ୍ତ ଅଗ୍ନିଶମ ବିଭାଗକୁ ଖବର ଦିଆଯାଇଥିଲା। ଖବର ପାଇ ପ୍ରଥମେ ଗୋଟିଏ ଦମକଳ ଗାଡ଼ି ଘଟଣାସ୍ଥଳରେ ପହଞ୍ଚି ନିଆଁ ଲିଭାଇବା ଆରମ୍ଭ କରିଥିଲା। କିନ୍ତୁ ନିଆଁର ତୀବ୍ରତାକୁ ଦେଖି ପରେ ଆଉ ଦୁଇଟି ଦମକଳ ଗାଡ଼ି ପହଞ୍ଚିଥିଲା। ମୋଟ ୩ଟି ଦମକଳ ଗାଡ଼ିର ଦୀର୍ଘ ସମୟର ଉଦ୍ୟମ ପରେ ନିଆଁକୁ ଆୟତ୍ତ କରାଯାଇଥିଲା।
ଅଗ୍ନିଶମ ବିଭାଗର ପ୍ରାଥମିକ ଅନୁମାନ ଅନୁଯାୟୀ, ସଟ୍ସର୍କିଟ୍ ଯୋଗୁଁ ଅଗ୍ନିକାଣ୍ଡ ଘଟି ଥାଇପାରେ ବୋଲି କୁହାଯାଉଛି। ତେବେ ସୋରୁମ୍ରେ ଇଭି ଚାର୍ଜିଂ ବ୍ୟବସ୍ଥା ଓ ଇଲେକ୍ଟ୍ରିକ୍ ଯାନ ଥିବାରୁ ଏହାର ବିଦ୍ୟୁତ୍ ବ୍ୟବସ୍ଥା ସହ ଅଗ୍ନିକାଣ୍ଡର କୌଣସି ସମ୍ପର୍କ ରହିଛି କି ନାହିଁ, ତାହା ତଦନ୍ତ ପରେ ସ୍ପଷ୍ଟ ହେବ।
ଘଟଣାରେ ଏପର୍ଯ୍ୟନ୍ତ କେହି ମୃତାହତ ହୋଇନଥିବା ଜଣାପଡ଼ିଛି। ତେବେ ନିଆଁ ଯୋଗୁଁ ସୋରୁମ୍ ଭିତରେ ଥିବା କିଛି ହୋଣ୍ଡା ବାଇକ୍ ଓ ସ୍କୁଟି ସମେତ ଅନ୍ୟାନ୍ୟ ସାମଗ୍ରୀ ନଷ୍ଟ ହୋଇଛି। ସମ୍ପୂର୍ଣ୍ଣ କ୍ଷୟକ୍ଷତିର ଆକଳନ ଏ ପର୍ଯ୍ୟନ୍ତ ହୋଇନାହିଁ। ଏହି ଅଗ୍ନିକାଣ୍ଡ ପରେ ସହରର ବ୍ୟବସାୟିକ ପ୍ରତିଷ୍ଠାନଗୁଡ଼ିକର ଅଗ୍ନି ନିରାପତ୍ତା ବ୍ୟବସ୍ଥାକୁ ନେଇ ପୁଣିଥରେ ପ୍ରଶ୍ନ ଉଠିଛି।
ନିକଟ ଅତୀତରେ ଡିଆଇସି ଛକ ନିକଟସ୍ଥ ଏକ ହୋଟେଲରେ ଅଗ୍ନିକାଣ୍ଡ ଘଟିଥିବା ବେଳେ ଏବେ ଏକ ବଡ଼ ବ୍ୟବସାୟିକ ପ୍ରତିଷ୍ଠାନରେ ନିଆଁ ଲାଗିଛି। ତେଣୁ ସହରର ବିଭିନ୍ନ ସୋରୁମ୍, ହୋଟେଲ ଓ ଅନ୍ୟ ବ୍ୟବସାୟିକ ପ୍ରତିଷ୍ଠାନରେ ଫାୟାର ସେଫ୍ଟି ବ୍ୟବସ୍ଥାର ଯାଞ୍ଚ ଆବଶ୍ୟକ ବୋଲି ମତ ପ୍ରକାଶ ପାଇଛି। ବିଶେଷକରି ଇଭି ଚାର୍ଜିଂ ଷ୍ଟେସନ୍ ଥିବା ପ୍ରତିଷ୍ଠାନଗୁଡ଼ିକରେ ବିଦ୍ୟୁତ୍ ଲୋଡ୍, ଚାର୍ଜିଂ ସିଷ୍ଟମ୍, ବିଦ୍ୟୁତ୍ ତାର ଓ ଅଗ୍ନି ନିର୍ବାପକ ବ୍ୟବସ୍ଥାର ନିୟମିତ ଯାଞ୍ଚ ହେଉଛି କି ନାହିଁ, ତାହା ଯାଞ୍ଚ କରିବାର ଆବଶ୍ୟକତା ରହିଛି। ସୋରୁମ୍ର ଫାୟାର ସେଫ୍ଟି ବ୍ୟବସ୍ଥା କାର୍ଯ୍ୟକ୍ଷମ ଥିଲା କି ନାହିଁ ଏବଂ ବିଦ୍ୟୁତ୍ ବ୍ୟବସ୍ଥାରେ କୌଣସି ତ୍ରୁଟି ଥିଲା କି ନାହିଁ, ତଦନ୍ତରେ ତାହା ସ୍ପଷ୍ଟ ହେବ। ବଡ଼ ଅଘଟଣ ପୂର୍ବରୁ ସହରର ବ୍ୟବସାୟିକ ପ୍ରତିଷ୍ଠାନଗୁଡ଼ିକର ଅଗ୍ନି ନିରାପତ୍ତା ବ୍ୟବସ୍ଥା ଯାଞ୍ଚ କରିବାକୁ ଦାବି ହୋଇଛି। ଏବେ ଅଗ୍ନିଶମ ବିଭାଗର ତଦନ୍ତ ରିପୋର୍ଟ ଉପରେ ସମସ୍ତଙ୍କ ନଜର ରହିଛି।
