● ମରାମତି ପରେ ବି କେଉଁ କାମକୁ ନୁହଁ, ତେବେ କ’ଣ ପାଣିରେ ପଡ଼ିଲା ରେନୋଭେସନର ୭୪ ଲକ୍ଷ!
● ଚାଷ କାମ ଠପ, ମୁଣ୍ଡରେ ହାତ ଦେଇ ବସିଛି ଚାଷୀ
କଳାହାଣ୍ଡି, (ଲିଙ୍ଗରାଜ ମିଶ୍ର) : ନର୍ଲାରୁ କମର୍ଦ୍ଧା ଯିବା ରାସ୍ତା ପାଶ୍ୱର୍ରେ ରହିଛି ଗାଡିଆଯୋର ନାଳ । ନାଳ ଉପରେ ନିର୍ମିତ ହୋଇଛି ବାଗପୁର ଯୁଦ୍ର ଜଳସେଚନ ପ୍ରକଳ୍ପ । ଯାହା ନର୍ଲା ଏମଆଇପି ବିଭାଗ ଅଧିନରେ ରହିଛି । ଗତ ୩୦ ବର୍ଷ ତଳେ ନିର୍ମିତ ଉକ୍ତ ଜଳ ସେଚନ ଯୋଜନାଟି ଛୋଟିଆ ହେଲେ ମଧ୍ୟ ନର୍ଲା, ଡଙ୍ଗରମାଳ, ରେଗିଡିମାଲ, ରେଖପୁର, ଦେହେଲି, ଗଡରାପଡା ଭଳି ଛଅ ଖଣ୍ଡ ଗାଁର ଚାଷ ଜମି ପାଇଁ ଲାଇଫ ଲାଇନ ସାଜିଛି । ହେଲେ ବିଭାଗୀୟ ସ୍ଥାଣୁତା ଓ ଉଦାସୀନତା ପାଇଁ ଡଙ୍ଗରମାଳ, ରେଗଡିମାଳ ଉପର ମୁଣ୍ଡରୁ ନର୍ଲା ଦେଇ, ରେଖପୁର ଯାଏଁ ଯାଇଥିବା ଏହି କେନାଲଟି ସମ୍ପୂର୍ଣ୍ଣ ପୋତି ହୋଇ ପଡିଥିବା ଯୋଗୁଁ କେନାଲରେ ପାଣି ବିଲକୁଲ ବି ଯାଇ ପାରୁନି । କେନାଲଟି ଅମରି ଗଛ, ଘାସ, ବୁଦା ମାଟିରେ ସମ୍ପୂର୍ଣ୍ଣ ପୋତି ହୋଇ ପଡିଛି । ୬ ଖଣ୍ଡ ଗାଁର ୬୦୦ ଏକରରୁ ଉର୍ଦ୍ଧ୍ବ ଚାଷ ଜମିକୁ ଜଳ ଯୋଗାଉଥିବା କେନାଲଟି ବର୍ତ୍ତମାନ ପୋତି ହୋଇ ପଡ଼ିଥିବା ଯୋଗୁଁ ଚାଷ କାର୍ଯ୍ୟ ରେ ବାଧା ସୃଷ୍ଟି ହେଉଥିବା ଅଭିଯୋଗ କରିଛନ୍ତି ଚାଷୀ । ୨୦୧୮-୧୯ ରେ ଜନୈକ ଠିକାଦାର ବିମଲ କୁମାର ଅଗ୍ରୱାଲା କେନାଲଟିର ପଙ୍କ ଉଦ୍ଧାର କାର୍ଯ୍ୟ କରିଥିବା ସୂଚନାରୁ ଜଣାପଡେ । ବିଭାଗ ତରଫରୁ ୭୪.୮୦ ଲକ୍ଷ ଟଙ୍କା ବ୍ୟୟ ଅଟକଳରେ କରାଯାଇଥିଲା କେନାଲର ରେନୋଭେସନ କାର୍ଯ୍ୟ । ଯଦି ଦୁଇ ବର୍ଷ ତଳେ ଏତେ ଟଙ୍କା ବ୍ୟୟ ଅଟକଳରେ କରାଯାଇଥିବା କାର୍ଯ୍ୟ ଏହି ଦୁଇ ବର୍ଷ ମଧ୍ୟରେ ୨୦୨୧ ରେ ସମ୍ପୂର୍ଣ୍ଣ ପୋତି ହୋଇଗଲା କେମିତି ବୋଲି ଚାଷୀ ମହଲରେ ପ୍ରଶ୍ନବାଚୀ ସୃଷ୍ଟି ହୋଇଛି । ଏହା ବିଭାଗୀୟ ଅଧିକାରୀ ମାନଙ୍କ ଠିକାଦାର ପୋଷା ନୀତି ନୁହେଁ ତ?
ନର୍ଲା ଏକ ଅଣ ଜଳସେଚିତ ଅଞ୍ଚଳ ହୋଇଥିବା ବେଳେ ଏଠିକାର ଚାଷୀ ଚାଷ କାର୍ଯ୍ୟ ପାଇଁ ବର୍ଷାପାଣି ଉପରେ ସମ୍ପୁର୍ଣ୍ଣ ଭାବରେ ନିର୍ଭର କରିଥାନ୍ତି । ଆଉ ଭଲ ବର୍ଷା ହେଲେ ତ ଠିକ୍ । ନହେଲେ ମରୁଡିର କଷାଘାତରେ ଚାଷୀଙ୍କ ମେରୁଦଣ୍ଡ ଦୋହଲି ପଡିଥାଏ । ନର୍ଲାରେ ୨୦୧୬ ରେ ମରୁଡି ପରିସ୍ଥିତି ସୃଷ୍ଟି ହୋଇଥିଲା । ପୂର୍ବବର୍ଷ ୨୦୧୭ ଓ ଗତବର୍ଷ ୨୦୧୮ ମସିହାରେ ବର୍ଷା ଠିକ୍ ଅନୁପାତରେ ହୋଇଥିଲା । ହେଲେ ବାରମ୍ବାର ଲଘୁଚାପ ଜନିତ ବନ୍ୟା ଓ ଚକଡା ରୋଗ ଯୋଗୁଁ ଅନେକ ଚାଷୀ ନୟାନ୍ତ ହୋଇପଡିଥିଲେ । ୨୦୧୯/୨୦ ରେ ମଧ୍ୟମ ଭାବରେ ବର୍ଷା ହୋଇଥିଲେ ମଧ୍ୟ ନର୍ଲା ଅଞ୍ଚଳର ଧାନ ଚାଷ ମଧ୍ୟ ଭଲ ହୋଇଥିବାରୁ ଧାନ ବିକ୍ରୟ କରି ଅଞ୍ଚଳର ଚାଷୀକୁଳ ଭଲ ଦୁଇ ପଇସା ପାଇଥିଲେ ସେମାନଙ୍କର କଷ୍ଟ ଅର୍ଜିତ ଚାଷରୁ । ଏବର୍ଷ ମଧ୍ୟ ବର୍ଷା ଭଲ ହେବ ବୋଲି ପାଣିପାଗ ବିଭାଗର ପୂର୍ବାନୁମାନରେ ଅଞ୍ଚଳର ଚାଷୀ ଖୁସି ଥିଲେ । ଗତ ତିନି ମାସ ଧରି ପ୍ରଚଣ୍ଡ ରୌଦ୍ର ତାପରେ ମାଟି ଶୁଖିଲା ପଡି ସଂପୁର୍ଣ୍ଣ ଆଁ କରି ରହିଥିଲା । ଅନ୍ୟ ବର୍ଷ ଗୁଡିକରେ ଖରାଦିନରେ ମଧ୍ୟ ଯେପରି ଲଘୁଚାପ ବର୍ଷା ହୋଇଥାଏ, ଏବର୍ଷ ତା’ ମଧ୍ୟ ନର୍ଲା ଅଞ୍ଚଳରେ ହୋଇ ନାହିଁ । ଗତ ସପ୍ତାହରେ ତିନିଦିନ ଧରି ଲଘୁଚାପ ବର୍ଷା ହୋଇଥିଲେ ମଧ୍ୟ ଝିପି ଝିପି ବର୍ଷା ଯୋଗୁଁ କପା ଚାଷ ଠିକ ରହିଥିବା ବେଳେ ଅଞ୍ଚଳର ମୁଖ୍ୟ ଫସଲ ଧାନ ଚାଷ ପାଇଁ ଆବଶ୍ୟକ ପରିମାଣର ପାଣି ହୋଇ ପାରିନାହିଁ । ଏହି ସମୟରେ ନର୍ଲା ଚାଷୀଙ୍କ ପାଇଁ ଲାଇଫଲାଇନ ସାଜିଥିବା ଗାଡିଆଯୋର ନଦୀରୁ ବାହାରିଥିବା ବାଗପୁର ଏମଆଇପି କେନାଲ ପୋତି ହୋଇପଡି ଥିବା ଯୋଗୁଁ ଚାଷୀଙ୍କ ପରିସ୍ଥିତି ଦୟନୀୟ ହୋଇପଡିଛି ।
କେନାଲ ସମ୍ପୂର୍ଣ୍ଣ ପୋତି ହୋଇଥିବା ଯୋଗୁଁ ଚାଷୀ ପାଣି ପାଇ ପାରୁ ନଥିବାରୁ ମୁଣ୍ଡରେ ହାତ ଦେଇ ବସିଛନ୍ତି । ଚାଷୀ ଭଜରାମ ମାଝୀ, ସଞ୍ଜୀବ କୁମାର ଚାନ୍ଦ, ବିରେନ୍ଦ୍ର ଚାନ୍ଦ, ଯୁଗଳ କିଶୋର ବିଶ୍ୱାଳ, ଅନିରୁଦ୍ଧ ବିଶ୍ୱାଳ, ସଂଗ୍ରାମ ପୁଝାରୀ ପ୍ରମୁଖ ନର୍ଲା ଓ ରେଗଡିମାଳର ଚାଷୀ ଉକ୍ତ କେନାଲ ଉପରେ ନିର୍ଭର କରି ରହି ଚାଷ କରୁଥିବା ବେଳେ ବର୍ତ୍ତମାନ ନର୍ଲାରେ ହୀନ ବୃଷ୍ଟି ରହିଥିବାରୁ ଏବଂ କେନାଲ ପୋତି ହୋଇ ପଡିଥିବାରୁ ଚାଷ କାର୍ଯ୍ୟ ଆଗେଇ ପାରୁନି ବୋଲି କ୍ଷୋଭ ବ୍ୟକ୍ତ କରିଛନ୍ତି । ଏବଂ ତୁରନ୍ତ ଯଦି ଉକ୍ତ କେନାଲକୁ କାର୍ଯ୍ୟକ୍ଷମ କରାନଯାଏ ତା ହେଲେଆନ୍ଦୋଳନ ର ପନ୍ଥା ଗ୍ରହଣ କରାଯିବ ବୋଲି ଚେତାବନି ଦେଇଛନ୍ତି ।
ଅନ୍ୟପକ୍ଷରେ ଗତମାସରେ ବିଭାଗୀୟ ଏସଡିଓ ଆସି କନିଷ୍ଠଯନ୍ତ୍ରୀଙ୍କୁ ସାଙ୍ଗରେ ଧରି କେନାଲର ସ୍ଥିତି ଅନୁଧ୍ୟାନ କରିଥିଲେ । କିନ୍ତୁ ସେ ଫେରିଯାଇ ହାତ ବାନ୍ଧି ବସିଯାଇଥିବାରୁ ଚାଷୀମାନେ ଆଶ୍ଚର୍ଯ୍ୟ ପ୍ରକଟ କରିବାସହ ବିଭାଗୀୟ ଉଦାସୀନତା ଯୋଗୁଁ ଅସନ୍ତୋଷ ବ୍ୟକ୍ତ କରିଛନ୍ତିି । ଏହି ପୋତି ହୋଇ ପଡିଥିବା କେନାଲ ଟିର ପୁନଃଉଦ୍ଧାର କାର୍ଯ୍ୟ କାହିଁକି କରାଯାଉନି ବୋଲି ନର୍ଲା ଦାଇତ୍ୱରେ ରହିଥିବା କ୍ଷୁଦ୍ର ଜଳସେଚନ ଯୋଜନା ପ୍ରକଳ୍ପ ର କନିଷ୍ଠ ଯନ୍ତ୍ରୀ ସୌମ୍ୟ ରଞ୍ଜନ ମାଝୀଙ୍କୁ ପଚାରିବାରୁ ଆମେ ବିଭାଗ ତରଫରୁ ସରକାରଙ୍କୁ ଲେଖିକି ଜଣାଇଛୁ । ହେଲେ ଏଥିପାଇଁ ଏଯାଏଁ କୌଣସୀ ଗ୍ରାଣ୍ଟ ଆସି ନାହିଁ । କିମ୍ବା ସରକାରଙ୍କ ତରଫରୁ ଟଙ୍କା ମଞ୍ଜୁର ହୋଇନାହିଁ । ଏଣୁ କାମ କରାଯାଇପାରୁ ନାହିଁ ବୋଲି କହିଥିଲେ ।
