କଳାହାଣ୍ଡି,୧୯|୮ (ସୁଶାନ୍ତ କୁମାର ଦଳେଇ): ଗୋଲାମୁଣ୍ଡା ବ୍ଲକ କାର୍ଯ୍ୟରତ ସାମ୍ବାଦିକ ସଂଘ ପକ୍ଷରୁ ଆଜି ଏକ ଗୁରୁତ୍ୱପୂର୍ଣ୍ଣ ବୈଠକ ଓ ବନ୍ଧୁ ମିଳନ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଏହି ଅବସରରେ ବିଭିନ୍ନ ବିଷୟ ତଥା ନିର୍ଭୀକ ଓ ସତ୍ୟ ଉପରେ ପ୍ରମାଣ ଯୋଗାଡ଼ କରିବା ଏବଂ କାହା ଚାପରେ ବିଚଳିତ ନ ହୋଇ ସଚ୍ଚୋଟ ଭାବରେ ଦୁର୍ନୀତି ଉପରେ ନିଃସ୍ୱାର୍ଥପର ଭାବରେ ଖବର ପରିବେଷଣ କରିବା ସମ୍ବନ୍ଧରେ ଆଲୋକପାତ ହୋଇଥିଲା । ଏହି କାର୍ଯ୍ୟକ୍ରମରେ ପ୍ରମେୟ ପ୍ରତିନିଧି ଆଶୁତୋଷ ରାଉତ, ସମାଜ ପ୍ରତିନିଧି ବିନ୍ଦୁ ମହାନନ୍ଦ, ଧରିତ୍ରୀ ପ୍ରତିନିଧି ବଟକୃଷ୍ଣ ପଣ୍ଡା, ସମ୍ବାଦ ପ୍ରତିନିଧି ସୁଧୀର ସାହୁ, ସକାଳ ପ୍ରତିନିଧି ରମେଶ ଅଗ୍ରୱାଲ , ନିତିଦିନ ପ୍ରତିନିଧି ନଉକେଶ୍ୱର ପଟେଲ , ପ୍ରଗତିବାଦୀ ପ୍ରତିନିଧି ସୁଶାନ୍ତ ଦଳେଇ, ନକ୍ଷେତ୍ରଜ୍ୟୋତି ପ୍ରତିନିଧି ଚିତରଞ୍ଜନ ବାଗ, ପ୍ରଗତିବାଦୀ ପ୍ରତିନିଧି ସୋମ୍ୟରଞ୍ଜନ ଅଗସ୍ତି ପ୍ରମୁଖ ଯୋଗଦେଇଥିଲେ । ପରିଶେଷରେ ଗୋଲାମୁଣ୍ଡା ତହସିଲଦାର ସର୍ବେଶ୍ୱର ଜାଲଙ୍କୁ ଗୋଲାମୁଣ୍ଡା ସଦର ମହକୁମା ଠାରେ ଏକ ସ୍ୱତନ୍ତ୍ର ସାମ୍ବାଦିକ ଭବନ ନିର୍ମାଣ ନିମନ୍ତେ ଜାଗା ଚିହ୍ନଟ ପାଇଁ ଏକ ଦାବି ପତ୍ର ପ୍ରଦାନ କରାଯାଇଥିଲା । ଉକ୍ତ ଦାବିପତ୍ରରୁ ଜଣାଯାଏ ଯେ, ଗୋଲାମୁଣ୍ଡା ବ୍ଲକଟି ୨୮ଗୋଟି ଗ୍ରାମପଞ୍ଚାୟତକୁ ନେଇ ଗଠିତ ହୋଇଥିବା ବେଳେ କୋଣ ଅନୁକୋଣରୁ କାର୍ଯ୍ୟରତ ଗଣମାଧ୍ୟମ ପ୍ରତିନିଧି ଗୋଲାମୁଣ୍ଡା ସଦର ମହୁକୁମାରେ ନିର୍ଭର କରିଥାନ୍ତି । ଦୀର୍ଘ ଦିନର ଦାବି, ଗୋଲାମୁଣ୍ଡା ଠାରେ ଏକ ସାମ୍ବାଦିକ ସଙ୍ଘର କାର୍ଯ୍ୟାଳୟ ନିର୍ମାଣ ସତ୍ୱେ ଆଜି ସୁଦ୍ଧା କୌଣସି ପ୍ରକାରରେ ଜାଗା ଚିହ୍ନଟ ହୋଇନାହିଁ କି ସାମ୍ବାଦିକ ସଂଘର କାର୍ଯ୍ୟାଳୟ ନିର୍ମାଣ ହୋଇନାହିଁ । ଏନେଇ ଏକ ଦାବି ପତ୍ର ଦେଇ ଯଥା ଶୀଘ୍ର ସାମ୍ବାଦିକ ଭବନ ନିର୍ମାଣ ସକାଶେ ଜାଗା ଚିହ୍ନଟ କରିବା ପାଇଁ ଦାବୀ କରାଯାଇଛି ।
