ଓଡ଼ିଆ ବାର୍ତ୍ତା/ କୋକସରା (ହିରଣ୍ୟ ବେହେରା): ରାଜ୍ୟ ଓ କେନ୍ଦ୍ର ସରକାର ଗ୍ରାମାଂଚଳର ଉନ୍ନତି ପାଇଁ ବିଭିନ୍ନ ଯୋଜନା କରିଥିଲେ ମଧ୍ୟ ବାସ୍ତବ କ୍ଷେତ୍ରରେ ଗାଁ ଗଣ୍ଡାର ଲୋକଙ୍କ ପାଖରେ ଅନେକ ଯୋଜନାର ସୁଫଳ ପହଂଚି ପାରୁନାହିଁ । ଯାହାର ଜ୍ୱଳନ୍ତ ଉଦାହରଣ ଦେଖିବାକୁ ମିଳିଛି କୋକସରା ବ୍ଲକ କାସିବାହାଲ ପଂଚାୟତ ଧନସରା ଗ୍ରାମରେ । ଧନସରା ପୁରୁଣା ଟ୍ରାନ୍ସଫର୍ମର ରୁ ହାଇସ୍କୁଲକୁ ଯିବା ରାସ୍ତାର ଅବସ୍ଥା ଶୋଚନୀୟ ହୋଇପଡ଼ିଛି । ସାମାନ୍ୟ ବର୍ଷା ହେଲେ ରାସ୍ତାର ଅବସ୍ଥା ବେହାଲ ହୋଇ ପଡୁଛି । ଏହି ରାସ୍ତା ଦେଇ ପ୍ରତିଦିନ ସ୍କୁଲ ଛାତ୍ର ଛାତ୍ରୀ ଓ ସାଧାରଣ ଲୋକ ପଂଚାୟତକୁ ପିଡ଼ିଏସ ସାମଗ୍ରୀ ଆଣିବାକୁ ଯାଇଥାନ୍ତି। ଏହାସହ ଆରଆଇ ଅଫିସ ଓ ଦୈନନ୍ଦିନ ଯାତାୟତ ପାଇଁ ଏହି ରାସ୍ତା ହିଁ ଭରସା । ତେବେ ରାସ୍ତାରେ ଆଣ୍ଠୁଏ କାଦୁଅ ହେଉଥିବାରୁ ମୋଟର ସାଇକେଲ ଟିଏ କିମ୍ବା ଜରୁରୀ କାଳୀନ ସମୟରେ ଆମ୍ବୁଲାନ୍ସ ଯିବା ସମ୍ଭବ ନୁହେଁ, ଯାହା ନିଜ ଆଖିରେ ନ ଦେଖିଲେ ରାସ୍ତାର ଅବସ୍ଥାକୁ କେହି ବିଶ୍ୱାସ କରିବେନି ।
ଏନେଇ ଆଜି ଧନସରା ଗ୍ରାମବାସୀ କୋକସରା ବ୍ଲକ କାର୍ଯ୍ୟାଳୟରେ ପହଞ୍ଚି ଧନସରା ପୁରୁଣା ଟ୍ରାନ୍ସଫର୍ମରରୁ ହାଇସ୍କୁଲ ରାସ୍ତା ମରାମତି କରିବାକୁ ବ୍ଲକ ଉପାଧ୍ୟକ୍ଷ ରାଜୀବ ଅଗ୍ରୱାଲଙ୍କ ଠାରେ ଅଭିଯୋଗ କରିଛନ୍ତି । ଅଭିଯୋଗ ଗ୍ରହଣ ପରେ ବିଭାଗୀୟ ଯନ୍ତ୍ରୀଙ୍କ ସହିତ ଆଲୋଚନା କରି ବ୍ଲକ ଉପାଧ୍ୟକ୍ଷ ଶୀଘ୍ର ରାସ୍ତା ମରାମତି କରିବାକୁ ପ୍ରତିଶ୍ରୁତି ଦେଇଛନ୍ତି ।
