ଓଡ଼ିଆ ବାର୍ତ୍ତା/ କଳାହାଣ୍ଡି (ସୁଶାନ୍ତ କୁମାର ଦଳେଇ): କଳାହାଣ୍ଡି ଜିଲ୍ଲା କେଗାଁ ଥାନା ଫଟାମୁଣ୍ଡା ଖେଳ ପଡିଆ ନିକଟରେ ଏକ ଅଜଣା ଅଟୋ ଗାଡି ଧକ୍କାରେ ଜଣେ ବାଇକ ଚାଳକ ଗୁରୁତର ହୋଇ ଭବାନିପାଟଣା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଥିବା ବେଳେ ସେଠାରେ ତାଙ୍କର ମୃତ୍ୟୁ ହୋଇଛି । ମୃତକ ଜଣକ ଜଣକ ଦଶପୁର ଫାଣ୍ଡି ଅନ୍ତର୍ଗତ କୁମ୍ଭାରି ଗ୍ରାମର ଧୁବଲେ ଗୋପାଳ ବୋଲି ଜଣାପଡିଛି । ଶ୍ରୀ ଗୋପାଳ ତାଙ୍କ ଶ୍ୱଶୁର ଘର ବଡଚେରଗାଁରୁ ଗତକାଲି ଅପରାହ୍ନ ସମୟରେ ବାଇକରେ ନିଜ ଗାଁକୁ ଫେରୁଥିବା ସମୟରେ ଫଟାମୁଣ୍ଡା ଖେଳ ପଡିଆ ନିକଟରେ ସାମ୍ନା ପଟୁ ଏକ ଅଜଣା ଅଟୋ ଗାଡି ଧକ୍କା ଦେଇଥିଲା । ଅଟୋ ସହିତ ଧକ୍କା ହେବା ଫଳରେ ସେ ଛିଟିକି ପଡିଥିବା ବେଳେ ତାଙ୍କ ଡାହାଣ ଗୋଡ ସଂପୂର୍ଣ୍ଣ ଭାଙ୍ଗି ଯାଇ ପ୍ରଚୁର ରକ୍ତସ୍ରାବ ହୋଇଥିଲା । ସ୍ଥାନୀୟ ଲୋକେ ତାଙ୍କୁ ଉଦ୍ଧାର କରି ତାଙ୍କ ଶ୍ୱଶୁର ଘର ଲୋକଙ୍କୁ ଫୋନ କରିଥିଲେ । ଘଟଣାସ୍ଥଳକୁ ତାଙ୍କ ଶ୍ୱଶୁର ଘର ଲୋକେ ପହଞ୍ଚି ତାଙ୍କୁ ଚିକିତ୍ସା ପାଇଁ ଭବାନୀପାଟଣା ମୁଖ୍ୟ ଚିକିତ୍ସାଳୟକୁ ନେଇଥିଲେ । ଜିଲ୍ଲା ମୁଖ୍ୟ ଚିକିତ୍ସାଳୟରେ ଚିକିତ୍ସା ଚାଲିଥିବା ସମୟରେ ଗତକାଲି ମଧ୍ୟ ରାତ୍ରିରେ ତାଙ୍କର ମୃତ୍ୟୁ ହୋଇଥିଲା ।
ଅପରପକ୍ଷରେ ଦୁର୍ଘଟଣା ଘଟାଇ ଅଟୋ ଗାଡିଟି ଫେରାର ମାରିଥିବାରୁ ପୋଲିସ ଏହାର ତଦନ୍ତ କରି କଡା କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ମୃତକଙ୍କ ପରିବାର ଲୋକେ ଦାବି କରିଛନ୍ତି । କେଗାଁ ପୋଲିସ ଭବାନୀପାଟଣା ଜିଲ୍ଲା ମୁଖ୍ୟ ଚିକିତ୍ସାଳୟରେ ପହଂଚି ଶବ ବ୍ୟବଚ୍ଛେଦ ପରେ ଶବ ପରିବାରକୁ ହସ୍ତାନ୍ତର କରିଛି । ଅପରପକ୍ଷରେ ଦୁର୍ଘଟଣା ଘଟଣାଇଥିବା ଅଟୋ ଗାଡିର ସନ୍ଧାନ କରି ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କେଗାଁ ଥାନାଧିକାରୀ ପ୍ରଶାନ୍ତ କୁମାର କୋଲାହାସର ସୂଚନା ଦେଇଛନ୍ତି ।
