୨୩ ରେ କନହେଇ ସ୍ମୃତି ସମାରୋହ, କନହେଇ କଥା ପୁରସ୍କାର ପାଇବେ ଗାଳ୍ପିକ ରାଜେନ୍ଦ୍ର ରାଉଳ

ଓଡ଼ିଆ ବାର୍ତ୍ତା/ ବାଲେଶ୍ଵର (କୃଷ୍ଣ କୁମାର ମହାନ୍ତି): ଆଗାମୀ ୨୩ ତାରିଖ ରବିବାର ସନ୍ଧ୍ୟାରେ ବାଲେଶ୍ବର ସ୍ଥିତ ଷ୍ଟେସନ କ୍ଲବ୍ ସଭାଗୃହରେ କନହେଇଲାଲ ଦାସ ସ୍ମୃତି ସଂସଦ ଓ ଓଡିଶା ସାହିତ୍ୟ ଏକାଡେମୀର ମିଳିତ ସହଭାଗିତାରେ ୭୬ତମ କନହେଇ ସ୍ମୃତି ସମାରୋହ ଅନୁଷ୍ଠିତ ହେବ। ଏ ନେଇ ଶନିବାର ସନ୍ଧ୍ୟାରେ ‘ସଂକେତ’ ପରିସରରେ ସଂସଦ ପକ୍ଷରୁ କବି ଶ୍ରୀଦେବ ଓ ଗାଳ୍ପିକ ଗୌତମବୁଦ୍ଧ ଦାସଙ୍କ ଆବାହକତ୍ଵରେ ଚୂଡାନ୍ତ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି।

ସଂସଦର ସଭାପତି ଡକ୍ଟର ସୁବାସ ଚନ୍ଦ୍ର ପାତ୍ରଙ୍କ ଅଧ୍ୟକ୍ଷତାରେ ଏହି ବୈଠକ ଅନୁଷ୍ଠିତ ହୋଇଥିବା ବେଳେ ଏଥିରେ କାର୍ଯ୍ୟକ୍ରମର ଏଜେଣ୍ଡା ପ୍ରସ୍ତୁତ ହେବା ସହ ବଜେଟ୍ ଓ କାର୍ଯ୍ୟକ୍ରମର ବିଭିନ୍ନ ଦାୟିତ୍ୱ ବଣ୍ଟନ କରା ଯାଇଥିଲା। ଏହି ବୈଠକରେ କାର୍ଯ୍ୟକାରୀ ସଭାପତି କୃଷ୍ଣ କୁମାର ମହାନ୍ତି ଚଳିତ ବର୍ଷ ପାଇଁ କନହେଇ କଥା ପୁରସ୍କାର ନିମନ୍ତେ ସର୍ଟ ଲିଷ୍ଟ୍ ନାମ ଘୋଷଣା ପରେ ଯୁବ ଗାଳ୍ପିକ ରାଜେନ୍ଦ୍ର ରାଉଳଙ୍କୁ ସର୍ବ ସମ୍ମତି କ୍ରମେ ବିଜେତା ଭାବେ ଚୟନ କରା ଯାଇଥିଲା। ପ୍ରତି ବର୍ଷ ୫୦ ବର୍ଷ ବୟସ ସୀମା ଭିତରେ ଜଣେ ଯୋଗ୍ୟ ଗାଳ୍ପିକଙ୍କୁ ଚୟନ କରାଯାଇ ପୁରସ୍କୃତ କରା ଯାଇଥାଏ। ଏହି କ୍ରମରେ ବିଗତ ବର୍ଷ ମାନଙ୍କରେ ଚିରଶ୍ରୀ ଇନ୍ଦ୍ରସିଂ, ହିରଣ୍ମୟୀ ମିଶ୍ର, ଆଦିତେଶ୍ଵର ମିଶ୍ର, ମୋନାଲିସା ଜେନା, ଅମରେଶ ବିଶ୍ଵାଳ ଓ ବିରଜା ରାଉତରାୟ ପ୍ରମୁଖ ଏହି ପୁରସ୍କାର ଲାଭ କରିଛନ୍ତି। ପୁରସ୍କାର ସ୍ଵରୂପ ଦଶ ହଜାର ଟଙ୍କା ନଗଦ ଅର୍ଥରାଶି ଓ ମାନପତ୍ର ପ୍ରଦାନ କରା ଯାଇଥାଏ।

୧୯୭୬ରେ ବାଲେଶ୍ଵର ଜିଲ୍ଲାରେ ଜନ୍ମିତ ରାଜେନ୍ଦ୍ର ତିନୋଟି ଭାଷାରେ ଲେଖାଲେଖି କରନ୍ତି। ପ୍ରାୟ ୧୦ ଖଣ୍ଡ ପୁସ୍ତକର ସ୍ରଷ୍ଟା ସେ ବହୁ ପୁରସ୍କାରରେ ସମ୍ମାନିତ। ସେ ଏକାଧାରରେ ଲେଖକ, ନାଟ୍ୟକାର ଓ ସଙ୍ଗୀତକାର ମଧ୍ୟ।

ଏହି ପ୍ରସ୍ତୁତି ବୈଠକରେ ସମ୍ପାଦକ ଉତ୍ପଳ ମହାନ୍ତି, କୋଷାଧ୍ୟକ୍ଷ ବ୍ୟୋମନାଥ ରଥ, ସହ ସମ୍ପାଦକ ଶୁଭେନ୍ଦୁ ଦାସ, ସାହିତ୍ୟିକ ପ୍ରଶାନ୍ତ ଦାସ, ଗାଳ୍ପିକ ଗଙ୍ଗାଧର ବିଶ୍ଵାଳ, ଗାଳ୍ପିକ ନିବାରଣ ଜେନା, ଆଡଭୋକେଟ୍ ରାମ ନାରାୟଣ ଦେ, ଗାଳ୍ପିକ ସଞ୍ଜୟ ପଣ୍ଡା, ଗାଳ୍ପିକା ସ୍ମୃତି ଦାସ, ସମାଜସେବୀ ରାଜେଶ ଗିରି ପ୍ରମୁଖ ଯୋଗ ଦେଇ ଆଲୋଚନାରେ ଅଂଶ ଗ୍ରହଣ କରିଥିଲେ। ଏହି ସ୍ମୃତି ସମାରୋହରେ ସମ୍ମାନନୀୟ ଅତିଥି ଭାବରେ ବିଶିଷ୍ଟ ଗାଳ୍ପିକ ପରେଶ କୁମାର ପଟ୍ଟନାୟକ, ବିଶିଷ୍ଟ ଲେଖକ ଡକ୍ଟର ମଣୀନ୍ଦ୍ର କୁମାର ମେହେର ଏବଂ କବି ଓ ଗାଳ୍ପିକ ସରୋଜ ବଳ ଯୋଗ ଦେବାର କାର୍ଯ୍ୟକ୍ରମ ସ୍ଥିରୀକୃତ ହେଇଛି। ଏହି ଅବସରରେ ଚଳିତ ବର୍ଷର ମର୍ଯ୍ୟାଦାଜନକ ‘କନହେଇ କଥା ପୁରସ୍କାର’ ବାଲେଶ୍ଵରର ଯୁବ ଗାଳ୍ପିକ ରାଜେନ୍ଦ୍ର ରାଉଳଙ୍କୁ ପ୍ରଦାନ କରାଯିବ ବୋଲି ସ୍ମୃତି ସଂସଦ ପକ୍ଷରୁ କୁହାଯାଇଛି। ଶେଷରେ ସଞ୍ଜୟ ପଣ୍ଡା ଧନ୍ୟବାଦ ଅର୍ପଣ କରିଥିଲେ।

Sunil Kumar Dhangadamajhi

𝐸𝑑𝑖𝑡𝑜𝑟, 𝑂𝑑𝑖𝑎𝐵𝑎𝑟𝑡𝑎.𝑖𝑛

http://odiabarta.in
error: You are not allowed to copy this content. Thank you.