ଓଡ଼ିଆ ବାର୍ତ୍ତା/ ମୁମ୍ବାଇ: ମୁମ୍ବାଇ କ୍ରାଇମ ବ୍ରାଞ୍ଚ ୨୬/୧୧ ଆତଙ୍କବାଦୀ ଆକ୍ରମଣର ଦୋଷୀ ତହବ୍ବୁର ରାଣାଙ୍କ ବିରୋଧରେ ୪୦୫ ପୃଷ୍ଠାର ଚାର୍ଜସିଟ ଦାଖଲ କରିଛି। ପାକିସ୍ତାନୀ ମୂଳର କାନାଡିୟ ନାଗରିକଙ୍କ ବିରୋଧରେ ଏହା ହେଉଛି ଚତୁର୍ଥ ସପ୍ଲିମେଣ୍ଟାରୀ ଚାର୍ଜ ସିଟ୍। ୟୁଏପିଏ ଏବଂ ଏକ୍ସପ୍ଲେସିଭ ଅଧିନିୟମ ଅନୁଯାୟୀ ତହବ୍ବୁର ବିରୁଦ୍ଧରେ ଏକ ମାମଲା ରୁଜୁ ହୋଇଥିଲା। ତହବ୍ବୁର ବର୍ତ୍ତମାନ ଆମେରିକାର ଲସ୍ ଏଞ୍ଜେଲସ୍ ଜେଲରେ ବନ୍ଦି ଅଛି। ଚଳିତ ବର୍ଷ ମେ ମାସରେ ଆମେରିକାର ଏକ କୋର୍ଟ ତହବ୍ବୁର ରାଣାଙ୍କୁ ଭାରତ ପଠାଇବାକୁ ଅନୁମୋଦନ କରିଥିଲେ। କୁହାଯାଉଛି ଯେ ରାଣାକୁ ଶୀଘ୍ର ଭାରତକୁ ଅଣାଯିବ ଏବଂ କୋର୍ଟରେ ହାଜର କରାଯିବ। ସୂଚନା ଥାଉକି ଯେ ୨୦୦୮ରେ ମୁମ୍ବାଇ ଆତଙ୍କବାଦୀ ଆକ୍ରମଣରେ ମୋଟ ୧୬୬ ଜଣଙ୍କର ମୃତ୍ୟୁ ଘଟିଥିଲା। ଏଥିରେ ୬ଜଣ ଆମେରିକୀୟ ମଧ୍ୟ ସାମିଲ ହୋଇଥିଲେ। ମୁମ୍ବାଇରେ ଲସ୍କର ଆତଙ୍କବାଦୀଙ୍କ ୧୦ରୁ ଅଧିକ ସ୍ଥାନ ଉପରେ ଆକ୍ରମଣ କରାଯାଇଥିଲା। ଏହି ଆକ୍ରମଣରେ ତହବ୍ବୁର ମଧ୍ୟ ସମ୍ପୃକ୍ତ ଥିଲା। ଆମେରିକାରେ ତହବ୍ବୁରକୁ ଗିରଫ କରାଯାଇଥିଲା। ମୁମ୍ବାଇ କ୍ରାଇମ ବ୍ରାଞ୍ଚ ତହବ୍ବୁରର ଅନେକ ରହସ୍ୟ ଏହାର ଚାର୍ଜସିଟରେ ପ୍ରକାଶ କରିଛି। କ୍ରାଇମ ବ୍ରାଞ୍ଚ କହିଛି ଯେ ଆତଙ୍କବାଦୀ ଆକ୍ରମଣ ପୂର୍ବରୁ ତହବ୍ବୁର ମୁମ୍ବାଇର ପୱଇରେ ଥିବା ଏକ ପାଞ୍ଚ ତାରକା ହୋଟେଲରେ ରହିଥିଲେ। ଚାର୍ଜସିଟରେ ପୋଲିସ ତହବ୍ବୁରର ପାସପୋର୍ଟ ଏବଂ ହୋଟେଲରେ ଜମା କରିଥିବା ଅନ୍ୟାନ୍ୟ ଦଲିଲର ବିବରଣୀ ପ୍ରଦାନ କରିଛି। ତହବ୍ବୁର ୧୧-୨୧ ନଭେମ୍ବର ମଧ୍ୟରେ ପୱଇର ଏକ ହୋଟେଲରେ ରହିଥିଲା।ଆକ୍ରମଣର ପାଞ୍ଚ ଦିନ ପୂର୍ବରୁ ସେ ଦେଶ ଛାଡିଥିଲା। ସେ ସେଠାରୁ ଦୁବାଇ ଅଭିମୁଖେ ଯାତ୍ରା କଲା। ଏହା ବ୍ୟତୀତ ଡେଭିଡ ହେଡଲି ତହବ୍ବୁର ରାଣା ନିକଟକୁ ଯାହା ମେଲ ଜରିଆରେ ପଠାଯାଇଥିଲା ତାହା ଚାର୍ଜସିଟରେ ମଧ୍ୟ ଉଲ୍ଲେଖ କରାଯାଇଛି। ମୁମ୍ବାଇ ଆତଙ୍କବାଦୀ ଆକ୍ରମଣର ମାଷ୍ଟରମାଇଣ୍ଡ ଥିଲା ଡେଭିଡ ହେଡଲି। ତହବ୍ବୁର ରାଣା ହେଡଲିର ଏକ ବିଶେଷ ବନ୍ଧୁ ଥିଲା। ଏହି ଆତଙ୍କବାଦୀ ଆକ୍ରମଣରେ ହେଡଲିକୁ ରାଣା ହିଁ ସାହାଯ୍ୟ କରିଥିଲା। ହେଡଲିକୁ ୨୦୦୯ରେ ଗିରଫ କରାଯାଇଥିଲା ଏବଂ ତାକୁ ୩୫ ବର୍ଷ କାରାଦଣ୍ଡରେ ଦଣ୍ଡିତ କରାଯାଇଥିଲା।
